ଭାରତୀୟ ସେନାରେ ଯୋଗ ଦେବାକୁ ଲକ୍ଷ୍ୟ ରଖିଥିଲେ କିନ୍ତୁ ବ୍ୟକ୍ତିଗତ କାରଣ ଯୋଗୁ ସଫଳ ହୋଇପାରି ନ ଥିଲେ ହର୍ଷ ଗଲଓ୍ବାଲି। ଏଥିପାଇଁ ସେ ଭାଙ୍ଗି ନ ପଡ଼ି ପ୍ରାକୃତିକ ବିପର୍ଯ୍ୟୟରେ ଲୋକଙ୍କୁ ଉଦ୍ଧାର କରିବାରେ ଲାଗିଛନ୍ତି। ଏବେସୁଦ୍ଧା ସେ ୩୦୦ରୁ ଊର୍ଦ୍ଧ୍ୱ ଲୋକଙ୍କୁ ଭୟଙ୍କର ବିପର୍ଯ୍ୟୟ ମୁହଁରୁ ଉଦ୍ଧାର କରିସାରିଲେଣି। ହର୍ଷଙ୍କ ବୟସ ୨୫। ସେ ଜଣେ ଆଇଟି ପ୍ରଫେସନାଲ। ଚାକିରି କରିବା ସହ ସେ ଉଦ୍ଧାର କାର୍ଯ୍ୟରେ ଲାଗିଛନ୍ତି। ଏଥିପାଇଁ ହର୍ଷ ପ୍ରଶିକ୍ଷଣ ନେଇଛନ୍ତି ଓ ଏବେ ମହାରାଷ୍ଟ୍ର ସିଭିଲ ଫୋର୍ସର ଜଣେ କ୍ୟାଡେଟ୍ ଭାବେ ରହିଛନ୍ତି। ମହାରାଷ୍ଟ୍ରର ୨୦୧୯ ପ୍ରଳୟଙ୍କରୀ ବନ୍ୟା ସମୟରେ ସେ ତାଙ୍କ ପ୍ରଥମ ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ ଏନ୍ଡିଆର୍ଏଫ୍ ସହ। ତା’ପରଠାରୁ ଯେକୌଣସି ବିପର୍ଯ୍ୟୟ ଆସିଛି ସେ ଏନ୍ଡିଆର୍ଏଫ୍ ଡକରା ପାଇ ଉଦ୍ଧାର କାର୍ଯ୍ୟରେ ସାମିଲ ହେଉଛନ୍ତି। ଏପରିକି ଅଫିସ୍ ସମୟ ମଧ୍ୟରେ ଖବର ପାଇବା କ୍ଷଣି ଉଦ୍ଧାରକାରୀ ଦଳ ସହ ସାମିଲ ହୋଇ ବିପର୍ଯ୍ୟୟ କ୍ଷେତ୍ରକୁ ବାହାରିଯାଆନ୍ତି। ଅତ୍ୟନ୍ତ କଷ୍ଟକର ପରିସ୍ଥିତିରେ ଏପରିକି ବନ୍ୟା ସମୟରେ କୁମ୍ଭୀର ପାଖରେ ରହିଯାଇଥିବା ଲୋକଙ୍କୁ ଉଦ୍ଧାର କରି ସାହସିକତାର ପରିଚୟ ଦେଇଛନ୍ତି। ଉଦ୍ଧାର କାର୍ଯ୍ୟରେ ଥିବା ସମୟରେ ସେ ବହୁବାର ଆହତ ହୋଇଛନ୍ତି ସତ କିନ୍ତୁ ଆଇଟି ବୃତ୍ତିର ଶୀତତାପ ନିୟନ୍ତ୍ରିତ କୋଠରି ତାଙ୍କୁ ସେତିକି ଖୁସି ଦେଇପାରି ନାହିଁ ଯାହା ଲୋକଙ୍କୁ ଉଦ୍ଧାର କରିପାରିବାରେ ପାଇଛନ୍ତି ହର୍ଷ। ପୁଣେର କ୍ୟାଣ୍ଟନମେଣ୍ଟ ରୋଡ୍ରେ ତାଙ୍କ ପିଲାଦିନ କଟିଥିଲା। ସେଠାରେ ସେ ବୁଲା କୁକୁର, ଗୋରୁ ଓ ଅନ୍ୟ ପ୍ରାଣୀମାନଙ୍କୁ ବିପଦରୁ ଉଦ୍ଧାର କରିବା ଆରମ୍ଭ କରିଥିଲେ, ଯାହା ତାଙ୍କୁ ଏବେ ଉଦ୍ଧାର କାର୍ଯ୍ୟ କରିବାକୁ ପ୍ରେରଣା ଦେଇଥିଲା ବୋଲି କହନ୍ତି ହର୍ଷ। ୨୦୨୧ ମହାରାଷ୍ଟ୍ର ବନ୍ୟାରେ ତାଙ୍କ ଉଦ୍ଧାର କାର୍ଯ୍ୟ ମଧ୍ୟ ବେଶ୍ ପ୍ରଶଂସନୀୟ।
