ଜୈବିକ କୃଷିର ଆକର୍ଷଣ କେତେ ତାହା ସ୍ପଷ୍ଟ ହୋଇଛି ତାମିଲନାଡୁର ଏସ୍. ଜୟଲକ୍ଷ୍ମୀଙ୍କ କ୍ଷେତ୍ରରେ। ସେ କାନାଡ଼ାରେ ୧୪ ବର୍ଷ ଚାକିରି କରିବା ପରେ ତାହା ଛାଡ଼ି ଭାରତ ଫେରି ଜୈବିକ ଚାଷ କରିବା ସହ ତାଙ୍କ ଅଞ୍ଚଳର ମହିଳାମାନଙ୍କୁ ଏହି ଚାଷ କରିବାକୁ ଉତ୍ସାହିତ କରୁଛନ୍ତି। ୧୯୯୨ରେ ଜୟଲକ୍ଷ୍ମୀ ଚେନ୍ନାଇ ଫେରିବା ପରେ ପ୍ରଥମେ ତାଙ୍କର ଜଣେ ସମ୍ପର୍କୀୟ ଭଉଣୀଠାରୁ ୫ ଏକର ଜମି ଆଣି ଚାଷ ଆରମ୍ଭ କରିଥିଲେ। ଏଥିରେ କ୍ଷତି ହେବା ପରେ ସେ ଓହରି ଗଲେ, କିନ୍ତୁ ଚାଷର ଆକର୍ଷଣ ତାଙ୍କୁ ଛାଡ଼ିଲା ନାହିଁ। ତାଙ୍କ ସ୍ବାମୀ ରୋଜଗାର ପାଇଁ କାନାଡ଼ା ଫେରିଗଲେ ମଧ୍ୟ ଜୟଲକ୍ଷ୍ମୀ ତାଙ୍କ ଝିଅ ସହ ଭାରତରେ ରହି ଚାଷ କରିବାକୁ ନିଷ୍ପତ୍ତି ନେଇ ୨୦୦୨ରେ ରାମକୃଷ୍ଣ ଆଶ୍ରମ ମିଶନ୍ ସ୍କୁଲର ଡ. ଶନମୁଗା ସୁନ୍ଦରମ୍ଙ୍କ ସହାୟତାରେ ୩ ଏକର ଜମିରେ ପୁଣି ଚାଷ କଲେ। ଏଥର ସଫଳ ହେଲେ ଓ ଚାଷ ୧୦ ଏକରକୁ ବଢ଼ାଇଲେ। ଜୟଲକ୍ଷ୍ମୀ ଧାନ ସହ ବିଭିନ୍ନ ପ୍ରକାର ପରିବା, ଶାଗ, ଫଳ ଚାଷ କରୁଛନ୍ତି। ସେ ୭୫ ପ୍ରକାର ଦେଶୀ ଧାନ ଚାଷ କରୁଛନ୍ତି ଓ ଏହାର ବିହନ ଚାଷୀମାନଙ୍କୁ ଦେଉଛନ୍ତି। ବିଭିନ୍ନ ପରିବେଶ ଉପଯୋଗୀ କାର୍ଯ୍ୟରେ ଜଡ଼ିତ ଚେନ୍ନାଇର ଆରୁଲପିୟା କୁମାରଙ୍କ ସହ ମିଶି ଏବେ କେମିକାଲମୁକ୍ତ କୃଷି ଉପତ୍ାଦର ମାର୍କେଟିଂ କରୁଛନ୍ତି। ଉପତ୍ାଦଗୁଡ଼ିକୁ ଚେନ୍ନାଇରେ ବହୁ ଲୋକଙ୍କ ଘରେ ପହଞ୍ଚାଉଛନ୍ତି। ଜୟଲକ୍ଷ୍ମୀ ‘ନାମ୍ମା ଭୂମି’ ଗଠନ କରି ଏହି ବ୍ରାଣ୍ଡ୍ରେ ଚେନ୍ନାଇରେ କେମିକାଲମୁକ୍ତ ଖାଦ୍ୟ ବିକ୍ରି କରୁଛନ୍ତି। କେମିକାଲମୁକ୍ତ ଜୀବନଶୈଳୀର ବାର୍ତ୍ତା ମଧ୍ୟ ଲୋକଙ୍କ ପାଖରେ ପହଞ୍ଚାଉଛନ୍ତି।
