କୋଭିଡ୍ ମହାମାରୀ ସମୟରେ ମାଗଣାରେ ଆମ୍ବୁଲାନ୍ସ ସେବା ଯୋଗାଇଦେବାର ଅନେକ ଉଦାହରଣ ସାମ୍ନାକୁ ଆସିଛି। କିନ୍ତୁ ଦୀର୍ଘ ୨୦ ବର୍ଷ ଧରି ମାଗଣାରେ ଏକ ଦମ୍ପତି ୮୦,୦୦୦ ରୋଗୀଙ୍କୁ ନେବା ଆଣିବା କରି ତ୍ୟାଗର ଏକ ଦୃଷ୍ଟାନ୍ତ ପ୍ରତିଷ୍ଠା କରିଛନ୍ତି। ଏହି ଦମ୍ପତିି ହେଲେ ଦିଲ୍ଲୀର ହିମାଂଶୁ କଲିଆ ଏବଂ ତାଙ୍କ ସ୍ତ୍ରୀ ଟ୍ବିଙ୍କିଲ । ଆମ୍ବୁଲାନ୍ସ ବିଳମ୍ବ ଯୋଗୁ ହିମାଂଶୁଙ୍କ ପିତାଙ୍କ ମୃତ୍ୟୁ ଘଟିବା ପରେ ସେ ଏହି ସେବା ଆରମ୍ଭ କରିଛନ୍ତି। ଟ୍ବିଙ୍କିଲ ନିଜେ ଆମ୍ବୁଲାନ୍ସ ଚଳାଉଛନ୍ତି। ୨୦୦୨ରେ ହିମାଂଶୁ ଓ ଟ୍ବିଙ୍କିଲ୍ଙ୍କ ବିବାହ ସମୟରେ ତାଙ୍କୁ ପରିବାର ତରଫରୁ ଏକ ଆମ୍ବୁଲାନ୍ସ ଉପହାର ମିଳିଥିଲା। ଏଭଳି ନିଆରା ଉପହାର ପଛରେ ରହିଥିତ୍ଲା ଏକ ପ୍ରେରଣା, ଯାହାକୁ ନେଇ ଆଗେଇ ଚାଲିଛନ୍ତି କଲିଆ ଦମ୍ପତି। ଦିନରାତି ଯେତେବେଳେ କଲ୍ ଆସେ ସେମାନେ ରୋଗୀକୁ ମାଗଣାରେ ହସ୍ପିଟାଲରେ ପହଞ୍ଚାଉଛନ୍ତି। ଶହୀଦ ଭଗତ ସିଂ ହେଲ୍ପ ଆଣ୍ଡ୍ କେୟାର ଫର୍ ସୋସାଇଟି ଟ୍ରଷ୍ଟ୍ ମାଧ୍ୟମରେ ଏହି ସେବା କରୁଛନ୍ତି। ୨୦୦୨ରେ ଗୋଟିଏ ଆମ୍ବୁଲାନ୍ସରୁ ଆରମ୍ଭ କରି ଏବେ ୧୪ଟି ଆମ୍ବୁଲାନ୍ସ ଓ ୧୦ ଜଣ ଡ୍ରାଇଭରଙ୍କୁ ନେଇ ସେବା ଚାଲିଛି। ଯେଉଁ ମୃତଦେହକୁ ପରିବାର ଲୋକେ ଛାଡ଼ି ଚାଲିଯାଆନ୍ତି କଲିଆ ଦମ୍ପତି ତାହାର ଅନ୍ତିମ ସଂସ୍କାର କରୁଛନ୍ତି।
