ଉତ୍ତରପ୍ରଦେଶର ଦୁଇ ଭାଇ ମୁକେଶ ଏବଂ ଚନ୍ଦ୍ରମୌଳି ପାଣ୍ଡେ ବର୍ଷକୁ ଦୁଇ ଶହ କୁଇଣ୍ଟାଲ ଗୋବର୍ଜ୍ୟ (ଗୋବର, ନଷ୍ଟ ହେଉଥିବା ନଡ଼ା ଓ ଘାସ)ରୁ ଜିଆଖତ ପ୍ରସ୍ତୁତ କରି ୨୦ଲକ୍ଷ ଟଙ୍କା ରୋଜଗାର କରିପାରୁଛନ୍ତି। ସେମାନେ ୨୦୧୭ରେ ନବଚେତନ ଆଗ୍ରୋ ସେଣ୍ଟର ପ୍ରଡ୍ୟୁସର କମ୍ପାନୀ ଲିମିଟେଡ ଗଠନ କରି ତା’ ମାଧ୍ୟମରେ ଏହି କାର୍ଯ୍ୟ ଜାରି ରଖିଛନ୍ତି। ଏହି ଦୁଇ ଭାଇ ମିର୍ଜାପୁର ଜିଲା ଶିଖର ବ୍ଲକର ୨୧ଟି ଗାଁରେ ଗୋବର୍ଜ୍ୟ ସଂଗ୍ରହ କରି ସେଥିରୁ ଜିଆଖତ ପ୍ରସ୍ତୁତ କରୁଛନ୍ତି। ଏହି ଗାଁଗୁଡ଼ିକରୁ ଗୋ ବର୍ଜ୍ୟ ସଂଗ୍ରହ କରିବା ପାଇଁ ୨୭ ଜଣଙ୍କୁ ବି ନିଯୁକ୍ତି ଦେଇଛନ୍ତି। ଜିଆଖତକୁ ସେମାନେ ଦେଶର ବିଭିନ୍ନ ସ୍ଥାନରେ ବିକ୍ରି କରିବା ସହ ମାଲଡେଭିସ, ଶ୍ରୀଲଙ୍କା ଏବଂ ନେପାଳକୁ ରପ୍ତାନି କରୁଛନ୍ତି। ଶିଖର ବ୍ଲକର ଗାଁଗୁଡ଼ିକରେ ଲୋକମାନେ ବହୁଳ ଭାବେ ଗୋବର ଗ୍ୟାସକୁ ଜାଳେଣି ଇନ୍ଧନ ଭାବେ ଉପଯୋଗ କରୁଥିଲେ। କିନ୍ତୁ ଉଜ୍ୱଳା ଯୋଜନାରେ ସବସିଡିରେ ଏଲ୍ପିଜି ସିଲିଣ୍ଡର ପାଇବା ପରେ ଗାଁଗୁଡ଼ିକରେ ଗୋ-ବର୍ଜ୍ୟ ଠୁଳ ହେବାରେ ଲାଗିଲା। ପୂରା ପରିବେଶ ପ୍ରଦୂଷିତ ହୋଇଗଲା। ଏହାକୁ ଦୂର କରିବା ଲାଗି ମୁକେଶ ଓ ଚନ୍ଦ୍ରମୌଳି ଗୋବର୍ଜ୍ୟରୁ ଜିଆଖତ ପ୍ରସ୍ତୁତ କରିବା ଆରମ୍ଭ କରିଥିଲେ। କୃଷକଙ୍କଠାରୁ ଯେତିକି ଗୋବର୍ଜ୍ୟ ସଂଗ୍ରହ କରୁଛନ୍ତି ତା’ବଦଳରେ ୬୦% ଖତ ଦେଇ ସେମାନଙ୍କୁ ଜୈବିକ କୃଷି କରିବାକୁ ଉତ୍ସାହିତ କରିଆସୁଛନ୍ତି। ଦୁଇ ଭାଇ ଆଇଆଇଟି କାନପୁର, ବନାରସ ହିନ୍ଦୁ ବିଶ୍ୱବିଦ୍ୟାଳୟ, ନ୍ୟାଶନାଲ ବ୍ୟାଙ୍କ ଫର ଏଗ୍ରିକଲଚର ଅଣ୍ଡର ରୁରାଲ ଡେଭେଲପମେଣ୍ଟରୁ ଏହି ଖତ ପ୍ରସ୍ତୁତି ସମ୍ପର୍କରେ ପ୍ରଶିକ୍ଷଣ ନେଇଛନ୍ତିି।
