ଫୁଟ୍ବଲ ଖେଳ ମାଧ୍ୟମରେ ଜାତିଗତ ହିଂସା ଓ ବିଦ୍ୱେଷ କମାଇବା ସହ ପିଲାମାନଙ୍କୁ ସ୍କୁଲ୍ ଆଣିବାରେ ଲାଗିଛନ୍ତି ମଣିପୁରର ମାଥାନମୀ ହୁଙ୍ଗୟୋ । ତାଙ୍କ ବୟସ ୨୭। ରେକଗନାଇଜ ରାଇଜ ଆଣ୍ଡ ଏମ୍ପାଓ୍ବାର ଆସୋସିଏଶନ (ଆର୍ଆର୍ଇଏ) ନାମକ ଏନ୍ଜିଓ ଗଢ଼ି ତା’ ମାଧ୍ୟମରେ କ୍ରୀଡ଼ା ଓ ଶିକ୍ଷାର ବିକାଶ କରୁଛନ୍ତି । ମୁଖ୍ୟତଃ ମଣିପୁରର ସୀମାନ୍ତରେ ସେ ତାଙ୍କ ଅଭିଯାନ ଜାରି ରଖିଛନ୍ତି । କାମ୍ଜୋଙ୍ଗ ଜିଲାର ସୀମାନ୍ତରେ ଥିବା କାମ୍ଜୋଙ୍ଗ ହାଇସ୍କୁଲରେ ପ୍ରଥମେ ସେ ଟାଟା ଟ୍ରଷ୍ଟ ସହଯୋଗରେ ଫୁଟ୍ବଲ ସେଣ୍ଟର ଖୋଲି ପିଲାଙ୍କୁ ପ୍ରଶିକ୍ଷଣ ଦେବା ଆରମ୍ଭ କରିଥିଲେ ୨୦୧୮ରେ । ପିଲାମାନଙ୍କ ପ୍ରଦର୍ଶନ ଉନ୍ନତ ହେବା ସହ ସେମାନଙ୍କ ମଧ୍ୟରେ ଥିବା ଜାତିଗତ ବିଦ୍ୱେଷ ଦୂର ହେବା ସେ ଲକ୍ଷ୍ୟ ରଖିଥିଲେ । କାରଣ ମଣିପୁରରେ କୁବି ଓ ନାଗା ଆଦିବାସୀ ସମ୍ପ୍ରଦାୟ ମଧ୍ୟରେ ଲାଗି ରହିଥିବା ହିଂସା ପିଲାଙ୍କୁ ପ୍ରଭାବିତ କରି ଆସିଛି । ତେବେ ହୁଙ୍ଗୟୋ ଖେଳଦ୍ୱାରା ଏଥିରେ କିଛିଟା ପରିବର୍ତ୍ତନ ଆସିବା ଲକ୍ଷ୍ୟ କରିବା ପରେ ତାଙ୍କ ଅଭିଯାନକୁ ଅନ୍ୟ ସ୍କୁଲଗୁଡିକୁ ସମ୍ପ୍ରସାରଣ କରିବା ଲକ୍ଷ୍ୟ ନେଇ ଆଉ ଦୁଇଟି ସରକାରୀ ସ୍କୁଲକୁ ତାଙ୍କ ଫୁଟ୍ବଲ ପ୍ରୋଗ୍ରାମରେ ସାମିଲ କରିଛନ୍ତି। ଏହାଦ୍ୱାରା ଉକ୍ତ ସ୍କୁଲଗୁଡିକରେ ପିଲାଙ୍କ ସଂଖ୍ୟା ୫୦୦ ବୃଦ୍ଧି ପାଇଛି। ଆର୍ଆର୍ଇଏରେ ଏବେ ୧୪ ଜଣ ପ୍ରଶିକ୍ଷକ ରହି ପ୍ରଶିକ୍ଷଣ ଦେଉଛନ୍ତି। ଏପରିକି ସର୍ବଭାରତୀୟ ଫୁଟ୍ବଲ ସଂଘର କେଓ ଭିସୋ ଶ୍ରୀମୟ ମଧ୍ୟ ଏଭଳି କାର୍ଯ୍ୟରେ ହୁଙ୍ଗୟୋଙ୍କ ସହ ସାମିଲ ହୋଇଛନ୍ତି।
ପିଲାମାନଙ୍କୁ ଆବଶ୍ୟକ ଖେଳ ଉପକରଣ ଯୋଗାଇ ଦେଉଛନ୍ତି ହୁଙ୍ଗୟୋ। ସ୍କୁଲ ପରେ ଦେଢଘଣ୍ଟା ପ୍ରଶିକ୍ଷଣ ଦିଆଯାଉଛି। ଫୁଟ୍ବଲ, ଭଲିବଲ, ଟେବୁଲ ଟେନିସ ଏବଂ ବ୍ୟାଡ୍ମିଣ୍ଟନ ଉପରେ ଏବେ ପ୍ରଶିକ୍ଷଣ ଦିଆଯାଉଛି। ଏଥିରେ ୧୦୦୦ ପିଲା ଭାଗ ନେଉଛନ୍ତି । ଜିଲା, ରାଜ୍ୟ ଓ ଜାତୀୟ ସ୍ତରର ଖେଳାଳି ହେବାରେ ଏମାନଙ୍କ ମଧ୍ୟରୁ ଅନେକ ଯୋଗ୍ୟତା ହାସଲ କରିସାରିଲେଣି।
