ବର୍ଷା ଓ ବନ୍ୟା ବହୁ ସମୟରେ ପିିଆଜ ଚାଷକୁ ବିପର୍ଯ୍ୟୟ କରିଦେଉଛି । ଅନ୍ୟପକ୍ଷରେ ଭଣ୍ଡାର ବ୍ୟବସ୍ଥାର ଅଭାବ ପିଆଜ ଦରବୃଦ୍ଧିର କାରଣ ପାଲଟୁଛି । ତେବେ ଭଣ୍ଡାର ବ୍ୟବସ୍ଥା ବିନା ବହୁଦିନ ରଖାଯାଇପାରୁଥିବା ଏକ କିସମର ପିଆଜ ପ୍ରସ୍ତୁତ କରିଛନ୍ତି ମହାରାଷ୍ଟ୍ରର ଜଣେ କୃଷକ । ମହାରାଷ୍ଟ୍ରର ଡୁଆଣ୍ଡ ନିବାସୀ ସନ୍ଦୀପ ଘୋଲେ ଏହି ପିଆଜର ନାମ ରଖିଛନ୍ତି ‘ସନ୍ଦିପ ଓନିୟନ’ । ସନ୍ଦିପ ୨୦୦୮ରେ ପିଆଜ ଚାଷ କରିଥିଲେ । ଅମଳ ପରେ ତାହା କିପରି ବହୁଦିନ ଧରି ଗଚ୍ଛିତ ରଖାଯାଇପାରିବ, ସେ ସମ୍ପର୍କରେ ଗବେଷଣା ଜାରି ରଖିଥିଲେ। ୨୦୧୨ରୁ ନୂଆ କିସମର ପିଆଜ ବିହନ ବିକାଶ କରିବାର କାର୍ଯ୍ୟକୁ ବ୍ୟାପକ କରି ଦୀର୍ଘ ଆଠବର୍ଷ ପରେ ସଫଳ ହୋଇଛନ୍ତି । ‘ସନ୍ଦିପ ଓନିୟନ’ର ରୋଗ ପ୍ରତିରୋଧକ ଶକ୍ତି ଅଧିକ । ଅମଳ ପରେ ନ ପଚି ବହୁଦିନ ରହୁଥିବା ପିଆଜକୁ ସେ ଲଗାଇ ସେଥିରୁ ମଞ୍ଜି ସଂଗ୍ରହ କରୁଥିଲେ । ପୁଣି ସେହି ମଞ୍ଜିକୁ ଲଗାଇ ଅମଳ ପରେ ସମାନ ପଦ୍ଧତିରେ ମଞ୍ଜି ସଂଗ୍ରହ କରି ପରବର୍ତ୍ତୀ ଚାଷକୁ ଆଗଉଥିଲେ। ଏହିପରି ବର୍ଷ ପରେ ବର୍ଷ ଚାଷ କରିବା ପରେ ଏବେ ସମ୍ପୂର୍ଣ୍ଣ ନୂଆ କିସମ ବିହନ ପ୍ରସ୍ତୁତ କରିଛନ୍ତି । ଯାହା ଅମଳ ପରେ ଶୀଘ୍ର ନଷ୍ଟ ହେଉନି । ଏହି ନୂଆ କିସମର ପିଆଜର ରଙ୍ଗ ଫିକା ନାଲି । ଏହା ଉପରେ ଦୁଇଟି ଚୋପା ବି ରହୁଛି । ସନ୍ଦିପ କଳାରେ ଡିଗ୍ରୀ ହାସଲ କରିବାପରେ ପିଆଜ ଚାଷ କରି ଏଭଳି ସଫଳତା ପାଇଥିବାରୁ ଡାଇରେକ୍ଟୋରେଟ ଅଫ ଓନିୟନ ଆଣ୍ଡ ଗାର୍ଲିକ ରିସର୍ଚ୍ଚ ପକ୍ଷରୁ ତାଙ୍କୁ ପ୍ରଗତିଶୀଳ କୃଷକ ପୁରସ୍କାର ପ୍ରଦାନ କରାଯାଇଛି । ସନ୍ଦିପ ବିକାଶ କରିଥିବା ପିଆଜକୁ କୋଙ୍କୋଣର କୃଷି ବିଶ୍ୱବିଦ୍ୟାଳୟ ଅଧିକ ଅମଳକ୍ଷମ ବିହନର ସ୍ବୀକୃତି ଦେବାପରେ ଏହି ବିହନକୁ ବିଭିନ୍ନ ରାଜ୍ୟକୁ କୃଷକମାନଙ୍କୁ ପ୍ରଦାନ କରାଯାଇଛି ।
