ତ୍ରିପୁରାରେ ବାଲ୍ୟବିବାହ ବନ୍ଦ କରିବା ସହ ପଢ଼ା ଛାଡ଼ୁଥିବା ଝିଅମାନଙ୍କୁ ପୁଣି ସ୍କୁଲକୁ ଫେରାଇ ଆଣିବା ଲାଗି ଆଇଏଏସ୍ ଅଧିକାରୀ ସାଜୁ ବହିଦଙ୍କ ପ୍ରୟାସ ପ୍ରଶଂସନୀୟ। ସେ ଦକ୍ଷିଣ ତ୍ରିପୁରା ଜିଲାର ଜିଲାପାଳ ଅଛନ୍ତି। ପ୍ରତି ୧୦ ଜଣରେ ଜଣେ ଝିଅ ୧୮ ବର୍ଷ ବୟସ ପୂର୍ବରୁ ତ୍ରିପୁରାରେ ବିବାହ କରୁଥିବାରୁ ସେଠାରେ ଏଭଳି ଏକ ପ୍ରଥାକୁ ରୋକିବା ଲାଗି ସେ ଜିଲାର ୧୫୮ଟି ସ୍କୁଲରେ ସ୍କୁଲ କ୍ଲବ ସହିତ ମଞ୍ଚ ଗଠନ କରାଯାଇଛି। ଏହାର ନାମ ରଖିଥିଲେ ‘ବାଳିକା ମଞ୍ଚ’ ଓ ଏହା ମାଧ୍ୟମରେ ବହିଦ କାର୍ଯ୍ୟ ସଂଚାଳନ କରୁଛନ୍ତି। ଏହି ମଞ୍ଚ ୨୦୨୦ରେ ଜିଲାର ପୂର୍ବତନ ଜିଲାପାଳ ଦେବପ୍ରିୟ ବର୍ଦ୍ଧନଙ୍କ ଦ୍ୱାରା ଗଠନ କରାଯାଇଥିଲା। କୋଭିଡ୍ରେ ଏହା ବନ୍ଦ ରହିଥିଲା ଓ ପରେ ବହିଦ ତାକୁ ପୁନର୍ଗଠନ କରିଛନ୍ତି। ସ୍କୁଲରେ ଗଠିତ ବାଳିକା ମଞ୍ଚର ଅଧ୍ୟକ୍ଷା ରହିଛନ୍ତି ଜଣେ ଶିକ୍ଷୟିତ୍ରୀ ଓ ଜଣେ ଛାତ୍ରୀ ସଂଯୋଜକ ଭାବେ କାର୍ଯ୍ୟ କରୁଛନ୍ତି। ୬-୧୨ ଶ୍ରେଣୀର ଝିଅମାନେ କ୍ଲବର ସଦସ୍ୟ ଅଛନ୍ତି। ବାଲ୍ୟବିବାହ ସମ୍ପର୍କରେ ଖବର ପାଇବା କ୍ଷଣି ଏହି ମଞ୍ଚ ଜିଲାପାଳଙ୍କୁ ଅବଗତ କରୁଛି। ପରେ ଜିଲାପାଳ ସ୍ଥାନୀୟ ଅଧିକାରୀମାନଙ୍କ ସହାୟତାରେ ତାହାକୁ ରୋକିପାରୁଛନ୍ତି। ଗତ ବର୍ଷ ୯୦ଟି ବାଲ୍ୟବିବାହକୁ ରୋକାଯାଇଛି। ତେବେ ଏବେ ସୁଦ୍ଧା ଜିଲାରେ ମୋଟ ୯୦% ବାଲ୍ୟବିବାହ ବନ୍ଦ କରାଯାଇପାରିଛି। ଏହା ବ୍ୟତୀତ ଯେଉଁ ଛାତ୍ରୀ ସପ୍ତାହରୁ ଅଧିକ ସମୟ ସ୍କୁଲକୁ ଆସୁନାହାନ୍ତି ସେମାନଙ୍କ ଘରେ ଏହି ମଞ୍ଚ ପହଞ୍ଚି ବାସ୍ତବତା ଅନୁଧ୍ୟାନ କରୁଛନ୍ତି ଓ ପିଲାକୁ ବୁଝାଇ ପୁଣି ସ୍କୁଲକୁ ଆଣିବାରେ ସକ୍ଷମ ହେଉଛନ୍ତି।
