ଖଣ୍ଡପଡ଼ା,୨୧ା୪(ଅଜୟ କୁମାର ମହାରଣା)ନୀଳମାଧବ ଜୀଉଙ୍କ ଚନ୍ଦନ ପୋଖରୀର ନବୀକରଣ କାର୍ଯ୍ୟ ସହ ପଙ୍କ ଉଦ୍ଧାର କାମ ସରିଛି। କାମ ସରିବା ପରେ ପାଣି ଭରି ଦିଆଯାଇଛି। ହେଲେ ଠିକ୍ ଭାବେ ପଙ୍କ ଉଠାଯାଇ ନ ଥିବାକୁ ସାଧାରଣରେ ପ୍ରତିକ୍ରିୟା ପ୍ରକାଶ ପାଇଥିଲା। ଅଭିଯୋଗ ପରେ ବି କୌଣସି ପଦକ୍ଷେପ ଗ୍ରହଣ କରି ନ ଥିଲା ଠିକାସଂସ୍ଥା। ଫଳରେ ପୋଖରୀରେ ପାଣି ଭରିବା ପରେ ଏବେ ପଦ୍ମ ଓ କଇଁ କାୟା ବିସ୍ତାର କରୁଛି। ଏହାକୁ ନେଇ ବୁଦ୍ଧିଜୀବି ଓ ଅଞ୍ଚଳବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
କଣ୍ଟିଲୋର ଶ୍ରୀନୀଳମାଧବ ଜୀଉଙ୍କ ଚନ୍ଦନ ଯାତ୍ରା ଅକ୍ଷୟ ତୃତୀୟାଠାରୁ ୨୧ ଦିନ ବ୍ୟାପୀ ପାରମ୍ପରିକ ରୀତିରେ ପ୍ରତିବର୍ଷ ହୋଇ ଆସୁଛି। ପ୍ରତ୍ୟେହ ଅପରାହ୍ନରେ ନୀଳମାଧବଙ୍କ ଚଳନ୍ତି ପ୍ରତିମା ମଦନ ମୋହନ ଓ ଲକ୍ଷ୍ମୀ ସରସ୍ବତୀ, ଶିବ ପାର୍ବତୀ ପୃଥକ ବିମାନରେ ଆରୁଢ ହୋଇ ଜଳକ୍ରୀଡା କରିବା ପାଇଁ ଚନ୍ଦନ ପୋଖରୀକୁ ବିଜେ ହୋଇଥାଆନ୍ତି। ଦୁଇଟି ବଡ଼ ଚାପ ଡଙ୍ଗାରେ ଠାକୁରଙ୍କ ଜଳକ୍ରୀଡା ନୀତି ସମ୍ପନ୍ନ ହୋଇଥାଏ। ତେବେ ପୋଖରୀଟି ଦୀର୍ଘ ବର୍ଷରୁ ପରିତ୍ୟକ୍ତ ତଥା ଦଳ ଓ ପଦ୍ମବଣରେ ପରିପୂର୍ଣ୍ଣ ହୋଇଥିବାରୁ ବିଗତ ବର୍ଷରେ ଠାକୁରଙ୍କ ଚାପ ନୀତିରେ ସମସ୍ୟା ସୃଷ୍ଟି ହୋଇଥିଲା। ରାଜ୍ୟ ସରକାରଙ୍କ ପକ୍ଷରୁ ନୀଳମାଧବ ବିକାଶ ପ୍ରକଳ୍ପ ନିମନ୍ତେ ୧୦୦ କୋଟି ଟଙ୍କାର ଅନୁଦାନ ରାଶି ମଞ୍ଜୁର ହୋଇଥିଲା। ଏହି ପ୍ରକଳ୍ପ ଅନୁଯାୟୀ ଚନ୍ଦନ ପୋଖରୀର ପୁନରୁଦ୍ଧାର ଓ ନବୀକରଣ କାର୍ଯ୍ୟ ଚାଲୁ ରହିଛି ା ତେବେ ଧର୍ମକୁ ଆଖିଠାର ପରି ଯେଭଳି ଭାବେ କାର୍ଯ୍ୟ ସମ୍ପାଦନ ହେଉଛି ଏହାର ସ୍ଥାୟୀତ୍ୱ ନେଇ ସାଧାରଣରେ ପ୍ରଶ୍ନବାଚୀ ସୃଷ୍ଟି ହୋଇଛି। ପଦ୍ମବଣରେ ପରିପୂର୍ଣ୍ଣ ଥିବା ପୋଖରୀର ପଙ୍କକୁ ଜେସିବ ମେଶିନରେ ଖୋଳାଯାଇଥିଲେ ମଧ୍ୟ ପରବର୍ତ୍ତୀ ସମୟରେ ସେହି ପଙ୍କକୁ ପୁନର୍ବାର ପୋଖରୀରେ ବିଛାଯାଇ ନିକଟସ୍ଥ ମହାନଦୀର ପାଣି ଭରି ଦିଆଯିବାକୁ ନେଇ ସାଧାରଣରେ ପ୍ରତିକ୍ରିୟା ସୃଷ୍ଟି ହୋଇଛି। ପଙ୍କରେ ରହିଥିବା ପଦ୍ମ ଓ କଇଁ ନାଡ ଓ ଚେର ଧିରେ ଧିରେ କାୟା ବିସ୍ତାର କରିବ ବୋଲି ଅଭିଯୋଗ ହୋଇଛି। ହେଲେ ଏଥିପ୍ରତି କାର୍ଯ୍ୟନିର୍ବାହୀ ଅଧିକାରୀ କର୍ଣ୍ଣପାତ କରି ନ ଥିଲେ। ଫଳରେ ପୋଖରୀରେ ପାଣି ଭର୍ତ୍ତି କରାଯିବାର ଏକମାସ ମଧ୍ୟରେ ଏବେ ପଦ୍ମ ଓ କଇଁ ଫୁଲ ଗଛ ପୋଖରୀରେ କାୟା ବିସ୍ତାର କରୁଛି। ଏହାକୁ ନେଇ ଚନ୍ଦନ ପୋଖରୀରେ ପଦ୍ମ ଫୁଟିବ କେବେ ବୋଲି ସାଧାରଣରେ ଆଲୋଚନା ହେଉଛି।
ସୂଚନାଯୋଗ୍ୟ, ରାଜ୍ୟ ନିର୍ମାଣ ବିଭାଗ ଶାସନ ସଚିବ ଭି. କେ. ଯାଦବ ଗତ ଫେବୃଆରୀ ୨୦ରେ ଏହି ପ୍ରକଳ୍ପର କାର୍ଯ୍ୟ ସମୀକ୍ଷା କରିଥିଲେ ା ଶୀଘ୍ର କାମ ଶେଷ କରିବାକୁ ଓଡ଼ିଶା ସେତୁ ନିର୍ମାଣ ନିଗମ ଯନ୍ତ୍ରୀମାନଙ୍କୁ ନିର୍ଦ୍ଦେଶ ଦେଇଥିଲେ। ଏହି ଅବସରରେ ଶ୍ରୀଜୀଉଙ୍କ ଚନ୍ଦନ ପୁଷ୍କରିଣୀରୁ ପୁରୁଣା ମାଟି ତଥା ପଙ୍କକୁ ଉଠା ନ ଯାଇ ସେହିମାଟିକୁ ପୋଖରୀରେ ବିଛାଯାଉଥିବା କଣ୍ଟିଲୋ ବିକାଶ ପରିଷଦର ସଭାପତି ଯୁଗଳ କିଶୋର ନାୟକ, ପୂଜକ ସମାଜର ପୂର୍ବତନ ସଭାପତି ନିହାର ରଞ୍ଜନ ମିଶ୍ରଙ୍କ ସମେତ ସ୍ଥାନୀୟ ସଚେତନ ନାଗରିକମାନେ ସଚିବଙ୍କ ଦୃଷ୍ଟି ଆକର୍ଷଣ କରିଥିଲେ। ସଚିବ ଯାଦବ ଚନ୍ଦନ ପୋଖରୀ ପରିଦର୍ଶନ କରି ଅଭିଯୋଗର ସତ୍ୟତା ଦୃଷ୍ଟିରୁ ଅଭିଯୋଗ କ୍ରମେ ପୋଖରୀରୁ ଆବଶ୍ୟକ ପଙ୍କ ଉଠାଇବାକୁ ନିର୍ଦ୍ଦେଶ ଦେଇଥିଲେ ା ମାତ୍ର ସଚିବ ଫେରିବା ପରେ ତାଙ୍କ ନିର୍ଦ୍ଦେଶକୁ ଗୁରୁତ୍ୱ ନ ଦେଇ ପଙ୍କ ଅନ୍ୟତ୍ର ନ ଉଠାଯାଇ ସେଠାରେ ଖେଳାଇ ଦିଆଯାଉଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଇଥିଲା। ଏ ସଂକ୍ରାନ୍ତରେ ସଚିବଙ୍କ ପରାମର୍ଶକୁ ଗୁରୁତ୍ୱ ଦେଉନାହାନ୍ତି ଠିକାସଂସ୍ଥା’ ଶୀର୍ଷକ ଏକ ଖବର ଫେବୃଆରୀ ୨୨ରେ ଧରିତ୍ରୀରେ ପ୍ରକାଶ ପାଇଥିଲା।
