ଭୁବନେଶ୍ୱର, ୧ା୧୦ (ବ୍ୟୁରୋ):ମହାମାରୀ ପରିଚାଳନାରେ ରାଜ୍ୟ ସରକାର ଉତ୍କୃଷ୍ଟ ପଦକ୍ଷେପ ନେଇଥିବାରୁ ଅନ୍ୟରାଜ୍ୟ ତୁଳନାରେ ଓଡ଼ିଶାରେ କୋଭିଡ୍ ସ୍ଥିତି ନିୟନ୍ତ୍ରଣରେ ରହିଛି। ବୁଧବାର ବିଧାନସଭାରେ ବିରୋଧୀଙ୍କ କୋଭିଡ୍ ସଂକ୍ରାନ୍ତ ମୁଲତବୀ ନୋଟିସ୍ ପରେ ବୁଧବାର ସ୍ବାସ୍ଥ୍ୟମନ୍ତ୍ରୀ ନବକିଶୋର ଦାସ ନିଜ ବିବୃତିରେ ଏହା କହିଛନ୍ତି। ସେ କହିଲେ, ରାଜ୍ୟ ଓ କେନ୍ଦ୍ର ସରକାରଙ୍କ ଲକ୍ଡାଉନ୍ କଟକଣା ଯୋଗୁ ପ୍ରଥମ ଦୁଇମାସ ସଂକ୍ରମଣ ସମ୍ପୂର୍ଣ୍ଣ ନିୟନ୍ତ୍ରଣାଧୀନ ଥିଲା। କିନ୍ତୁ ଅନ୍ୟ ରାଜ୍ୟରେ ଫସିଥିବା ପ୍ରବାସୀ ଓଡ଼ିଆଙ୍କ ପ୍ରତ୍ୟାବର୍ତ୍ତନ ପରେ ସଂକ୍ରମଣ ବୃଦ୍ଧି ପାଇଥିଲା। ତେବେ ୭.୬୭ ଲକ୍ଷ ପ୍ରବାସୀଙ୍କୁ ରଖିବା ଲାଗି ୧୬ ହଜାର ୮୨୪ଟି ଟିଏମ୍ସି ବ୍ୟବସ୍ଥା କରାଯାଇଥିଲା। ପ୍ରଥମ ପର୍ଯ୍ୟାୟରେ କେବଳ ଆର୍ଏମ୍ଆରସିରେ କୋଭିଡ୍-୧୯ ନମୁନା ପରୀକ୍ଷା ହେଉଥିଲା। ଏବେ କିନ୍ତୁ ୫୧ଟି ପରୀକ୍ଷଣ କେନ୍ଦ୍ରରେ ପାଖାପାଖି ଦୈନିକ ୫୦ ହଜାର ନମୁନା ଟେଷ୍ଟିଂ କରାଯାଉଛି। ଘରୋଇ ହସ୍ପିଟାଲରେ ଆର୍ଟି-ପିସିଆର୍ ପରୀକ୍ଷା ପାଇଁ ପ୍ରତି ଟେଷ୍ଟ ପିଛା ୧୨୦୦ ଟଙ୍କା ଓ ରାପିଡ୍ ଆଣ୍ଟିଜେନ୍ ଟେଷ୍ଟ ଲାଗି ୪୫୦ ଟଙ୍କା ମୂଲ୍ୟ ନିର୍ଦ୍ଧାରଣ ହୋଇଥିବା କହିଥିଲେ।
ଅନ୍ୟପକ୍ଷରେ ମଙ୍ଗଳବାର ବିଧାନସଭାରେ ଉଠିଥିବା ମାସ୍କ ଓ ପିପିଇ କିଟ୍ ଦୁର୍ନୀତି ପ୍ରସଙ୍ଗକୁ ନେଇ ମଧ୍ୟ ସ୍ବାସ୍ଥ୍ୟମନ୍ତ୍ରୀ ଏହାଉପରେ ସ୍ପଷ୍ଟ କରିଥିଲେ। ସେ କହିଲେ, କୋଭିଡ୍ କିଟ୍ କିଣାରେ ଆସିଥିବା ଦୁର୍ନୀତି ଅଭିଯୋଗ ଲୋକାୟୁକ୍ତଙ୍କ ପାଖରେ ବିଚାରାଧୀନ ଅଛି। ତଦନ୍ତ ପରେ ଯିଏ ଦୋଷୀ ସାବ୍ୟସ୍ତ ହେବେ ତାଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ତେବେ କୋଭିଡ୍-୧୯ ଜରୁରୀକାଳୀନ ପରିସ୍ଥିତିର ମୁକାବିଲା ଲାଗି ଇମରଜେନ୍ସି ପ୍ରୋକ୍ୟୁର୍ମେଣ୍ଟ କମିଟି ଏବଂ ଅର୍ଥ ଓ ଅବକାରୀ ମନ୍ତ୍ରୀଙ୍କ ଅଧ୍ୟକ୍ଷତାରେ ଏକ ମନ୍ତ୍ରୀସ୍ତରୀୟ କମିଟି ଗଠନ କରାଯାଇଥିଲା। ଏହି ଅନୁଯାୟୀ ଓଡ଼ିଶା ରାଜ୍ୟ ଔଷଧ ନିଗମ ଯୁଦ୍ଧକାଳୀନଭିତ୍ତିରେ ଜରୁରିକାଳୀନ ପରିସ୍ଥିତିର ମୁକାବିଲା ନିମନ୍ତେ ଇମରଜେନ୍ସି ପ୍ରୋକ୍ୟୁରମେଣ୍ଟ କମିଟି, ମନ୍ତ୍ରୀସ୍ତରୀୟ କମିଟି ଓ ରାଜ୍ୟ କ୍ୟାବିନେଟ୍ ଅନୁମୋଦନ ପୂର୍ବକ ସମସ୍ତ ସମୟୋଚିତ ପଦକ୍ଷେପ ଗ୍ରହଣ କରିଥିଲା। ସେପ୍ଟେମ୍ବର ୨୯ ସୁଦ୍ଧା ନିଗମରେ ୧୧ କୋଟି ୧୦ ଲକ୍ଷ ୧୯ ହଜାର ୩୩୩ ପାରାସିଟାମଲ୍, ୪ କୋଟି ୧୩ ଲକ୍ଷ ୬୮ ହଜାର ୮୬୪ଟି ସେଟ୍ରିଜିନ୍ ଡିହାଇଡ୍ରୋକ୍ଲୋରାଇଡ୍, ୨ କୋଟି ୩୨ ଲକ୍ଷ ୮୬ ହଜାର ୧୬୮ଟି ଆଜିଥ୍ରୋମାଇସିନ୍, ୬ ଲକ୍ଷ ୬୫ ହଜାର ୯୫୩ ଲିଟର ସାନିଟାଇଜର ଓ ୫ ଲକ୍ଷ ୯୭ ହଜାର ୫୮୪ ଏନ୍-୯୫ ଓ କେଏନ୍-୯୫ ମାସ୍କ ଗଚ୍ଛିତ ରହିଛି। ୧ କୋଟି ୭୫ ଲକ୍ଷ ୭୭ ହଜାର ଟ୍ରିପଲ୍ ଲେୟାର ଫେସ୍ ମାସ୍କ ରହିଛି। ୩ ଲକ୍ଷ ୭୦ ହଜାର ୮୭୨ ପିପିଇ କିଟ୍, ୧୭ ହଜାର ୭୩୫ ଅକ୍ସିଜେନ୍ ସିଲିଣ୍ଡର, ୨ ଲକ୍ଷ ୭ ହଜାର ୭୨୬ ଫାଭିପିଆର୍ଭି, ୪୮ ଲକ୍ଷ ୩୫ ହଜାର ୫୬୫ ହାଇଡ୍ରୋକ୍ଲୋରକୁଇନ୍(୨୦୦ ଏମ୍ଜି) ଓ ୯୧ ଲକ୍ଷ ୪୦ ହଜାର ୫୭୦ ହାଇଡ୍ରୋକ୍ଲୋରକୁଇନ୍(୪୦୦ ଏମ୍ଜି), ୧୨ ଲକ୍ଷ ୨୯ ହଜାର ୬୫୦ ରାପିଡ୍ ଆଣ୍ଟିଜେନ୍ ଟେଷ୍ଟ କିଟ୍ ଗଚ୍ଛିତ ରହିଛି। ସେହିଭଳି କୋଭିଡ୍ ମୁକାବିଲା ପାଇଁ ଡିସିଏଚ୍/ଡିସିଏଚ୍ସିରେ ୮୨୫୫ ବେଡ୍ ଥିବାବେଳେ ୪୫୪୪ କରୋନା ଆକ୍ରାନ୍ତ ଚିକିତ୍ସିତ ହେଉଛନ୍ତି। କୋଭିଡ୍ କେୟାର ସେଣ୍ଟରରେ ୧୬ ହଜାର ୮୨୮ ବେଡ୍ ଥିବାବେଳେ ୨୮୫୯ ରୋଗୀ ଚିକିତ୍ସିତ ହେଉଛନ୍ତି। ୧୪୨୬ ଆଇସିୟୁରୁ ୮୦୮ ଓ ୫୩୧ ଭେଣ୍ଟିଲେଟର ମଧ୍ୟରୁ ୨୨୬ରେ ରୋଗୀ ଅଛନ୍ତି। ଭୁବନେଶ୍ବର, କଟକ ସମେତ ୫ଟି ମହାନଗର ନିଗମ ଅଞ୍ଚଳରେ ଏବେ ବି ଶଯ୍ୟା ଖାଲିରହିଛି। ଏଥିସହ ସରକାରୀ ଓ ବେସରକାରୀ କୋଭିଡ୍ ହସ୍ପିଟାଲରେ ୨୪ ଘଣ୍ଟିଆ ହେଲ୍ପଡେସ୍କ କାର୍ଯ୍ୟ କରିବାକୁ ନିର୍ଦ୍ଦେଶ ଦିଆଯାଇଥିବା ମନ୍ତ୍ରୀ ସୂଚନା ଦେଇଛନ୍ତି।
