ସ୍ବାର୍ଥ ପାଇଁ ବେଳେବେଳେ ରକ୍ତସମ୍ପର୍କୀୟମାନେ ବି ବିଶ୍ୱାସଘାତକତା କରିବାକୁ ପଛାନ୍ତି ନାହିଁ। ହେଲେ ବିଶ୍ୱସ୍ତ ପ୍ରାଣୀ କୁକୁର କିନ୍ତୁ ଆବଶ୍ୟକସ୍ଥଳେ ମାଲିକର ଜୀବନ ରକ୍ଷା କରିବା ପାଇଁ ନିଜ ଜୀବନକୁ ବି ବାଜି ଲଗାଇ ଦେଇଥାଏ। ଠିକ୍ ଏମିତି ଏକ ଉଦାହରଣ ଦେଖିବାକୁ ମିଳିଛି ଉତ୍ତରପ୍ରଦେଶର ମେରଠ ଥାନା ଅଧୀନରେ ଥିବା ରାମପୁରୀ ଗାଁରେ। ଏହି ଗାଁର ଅଜୟ କୁମାରଙ୍କ ପରିବାର ରାତିରେ ବାଲ୍କୋନୀରେ ଶୋଇଥିବା ସମୟରେ ଘର ଭିତରକୁ ଏକ ବିଷାକ୍ତ ସାପ ପଶି ଆସିଥିଲା। ସେହି ସମୟରେ ଘରର ପୋଷାକୁକୁର ଭୁକିବା ଆରମ୍ଭ କରି ସମସ୍ତଙ୍କୁ ଉଠାଇବାକୁ ଚେଷ୍ଟା କରିଥିଲା। କିନ୍ତୁ ଏତେ ଶୀଘ୍ର କେହି ବି ନିଦରୁ ଉଠି ନ ଥିଲେ। ମାତ୍ର ସାପଟି ହଠାତ୍ କାମୁଡିବାକୁ ଯାଉଥିବା ଦେଖିବା ପରେ କୁକୁର ସାପକୁ ଦାନ୍ତରେ ଭିଡି ଆଣିଥିଲା। ଫଳରେ ସାପଟି କୁକୁରକୁ ବାରମ୍ବାର ଦଂଶନ କରି ଚାଲିଥିଲା, କିନ୍ତୁ କୁକୁର ସାପକୁ ଆଦୌ ଛାଡି ନ ଥିଲା। ଏହି ସମୟ ଭିତରେ ଘର ଲୋକ ଉଠି ଯାଇଥିଲେ। କୁକୁର ମୁହଁରେ ସାପକୁ ଦେଖି ସେମାନେ ସବୁ ଘଟଣା ବୁଝି ସାରିଥିଲେ। ତେଣୁ ତୁରନ୍ତ ସାପକୁ ଧରି ଜଙ୍ଗଲରେ ଛାଡିଥିଲେ। କିନ୍ତୁ କୁକୁରକୁ ବଞ୍ଚାଇ ପାରି ନ ଥିଲେ। ସାପ କାମୁଡିବା ଫଳରେ କୁକୁରଟି କିଛି ସମୟ ମଧ୍ୟରେ ସେହିଠାରେ ମୃତ୍ୟୁମୁଖରେ ପଡିଥିଲା।
