ଭବାନୀପାଟଣା,୨୦।୯(ଡି.ଏନ୍.ଏ.): ବର୍ଷା ଓ ବନ୍ୟା ପରିବା ବଜାରରେ ନିଆଁ ଲଗାଇଲା ଭଳି ସ୍ଥିତି ସୃଷ୍ଟି କଲାଣି। ରାଜ୍ୟ ବାହାରୁ ଆମଦାନୀ ହେଉଥିବା ପନିପରିବା ଦର ଆକାଶଛୁଆଁ ହେବାରେ ଲାଗିଥିବା ବେଳେ ଏପଟେ ରାଜ୍ୟ ଭିତରେ ଚାଷ ହହେଉଥିବା ପନିପରିବା ଦର ଉପରେ ଭରସା ନାହିଁ। ବନ୍ୟା ଯୋଗୁ ରାଜର ବିଭିନ୍ନ ଜିଲାରୁ ଏବେ ଠିକ୍ ଭାବେ ପରିବା ଆସୁ ନାହିଁ। କରୋନା ଯୋଗୁ ରୋଜଗାର ହ୍ରାସ ପାଇଥିବା ବେଳେ ଏଭଳି ସ୍ଥିତିରେ ଏବେ ଗ୍ରାହକ ମୁଣ୍ଡରେ ହାତ ଦେଲେଣି। ଏପ୍ରିଲ ମାସରେ ଆଳୁ ପିଆଜ, ଟମାଟୋ, ଦର ଯାହା ଥିଲା ଏବେ ପାଖାପାଖି ଦୁଇ ଗୁଣରୁ ଅଧିକ ହେଲାଣି। ଭବାନୀପାଟଣା ପରିବା ବଜାର ଆଳୁ ଦର ୩ କିଲୋକୁ ୧୦୦ ଟଙ୍କାରେ ବିକ୍ରି ହେଉଛି। ନୂଆ ଆଳୁ ବଜାରକୁ ଆସିବା ପର୍ଯ୍ୟନ୍ତ ଆଳୁ ଦର ଏପରି ବଢିିବ ବୋଲି ପରିବା ବ୍ୟବସାୟୀ କାଶିନାଥ ରାଉତ ପ୍ରକାଶ କରିଛନ୍ତି।
ପିଆଜ ଦର କିଲୋ ପ୍ରତି ୪୦ ରୁ ଅଧିକ ଟଙ୍କାରେ ବଜାରରେ ବିକ୍ରି ହେଉଛି। ଯାହା ଫଳରେ ଖାଉଟି ନାହିଁ ନଥିବା ହନ୍ତସନ୍ତ ହେଉଛନ୍ତି। ସେହିପରି ଆଳୁ ଦର କିଲୋ ପ୍ରତି ୩୦ ଟଙ୍କା, ସାରୁ ୩୦ ଟଙ୍କା, ଟମାଟୋ ୫୦ ଟଙ୍କା, ବାଇଗଣ ୩୦ ରୁ ୪୦ ଟଙ୍କା, କଲରା ୪୦, କାକୁଡି ୩୦, ଝୁଡୁଙ୍ଗ ୩୦, ଲଙ୍କା ୧୦୦ ଟଙ୍କା, ବନ୍ଧାକୋବି ୪୦ ଟଙ୍କା, ପୋଟଳ ୪୦ ଟଙ୍କା, ଜହ୍ନି ୪୦ ଟଙ୍କା, ଅଦା୨୦୦ ଟଙ୍କା, ରଷୁଣ ୧୨୦ ଟଙ୍କା, ଗାଜର ୬୦ ଟଙ୍କା, କାଙ୍କଡ ୧୨୦ ଟଙ୍କା କିଲୋ ପ୍ରତିଥିବା ଜଣାପଡିଛି। ଜିଲା ପ୍ରଶାସନ ପକ୍ଷରୁ ବଜାର ଦର ଉପରେ କୌଣସି କଟକଣା ରହୁନ ଥିବାରୁ ଦର ହୁହୁ ହୋଇ ପଡୁଛି ବୋଲି ଖାଉଟି ମହଲରୁ ଅଭିଯୋଗ ହେଉଛି।
