ବେଙ୍ଗାଲୁରୁ,୧୨।୮: ଆମେରିକା ସମେତ ପୃଥିବୀର ବହୁ ଦେଶରେ କରୋନା ସଂକ୍ରମଣ ପୁଣିଥରେ ବିପଦ ସୃଷ୍ଟି କରିଛି। ବିଶେଷଜ୍ଞମାନେ ଏହାକୁ ତୃତୀୟ ଲହର ଭାବରେ ବିଚାର କରୁଛନ୍ତି। ଏପରିସ୍ଥଳେ ଭାରତର କର୍ନାଟକରେ ଛୋଟ ପିଲାମାନଙ୍କ ମଧ୍ୟରେ କରୋନା ସଂକ୍ରମଣ ବଢ଼ିବାରେ ଲାଗିଛି। ଗତ ୭ ଦିନ ମଧ୍ୟରେ କେବଳ ୩୦୦ ଛୋଟ ପିଲାଙ୍କ ନମୁନା ରିପୋର୍ଟ କରୋନା ପଜିଟିଭ ଆସିିଛି। ଆଗାମୀ ସମୟରେ ଏହି ସଂଖ୍ୟା ବୃଦ୍ଧି ପାଇପାରେ ବୋଲି ସ୍ବାସ୍ଥ୍ୟ ଅଧିକାରୀ ଚେତାବନୀ ଦେଇଛନ୍ତି। ବିଶେଷଜ୍ଞମାନେ ପୂର୍ବରୁ ସତର୍କ କରିଥିଲେ ଯେ କରୋନାର ତୃତୀୟ ଲହର ଛୋଟ ପିଲାମାନଙ୍କ ଉପରେ ସବୁଠାରୁ ଅଧିକ ପ୍ରଭାବ ପକାଇବ। ଏଭଳି ପରିସ୍ଥିତିରେ ପିଲାମାନଙ୍କଠାରେ କରୋନା ସଂକ୍ରମଣ ସଂଖ୍ୟା ବଢ଼ିବା ଯୋଗୁ ସରକାରଙ୍କ ଚିନ୍ତା ବଢ଼ିବାରେ ଲାଗିଛି।
ବେଙ୍ଗାଲୁରୁ ମହାନଗର ପାଳିକା କହିଛି ଯେ କରୋନାରେ ଆକ୍ରାନ୍ତ ହୋଇଥିବା ପିଲାଙ୍କ ବୟସ ୧୯ ବର୍ଷରୁ କମ୍। ସେମାନଙ୍କ ମଧ୍ୟରେ ୯ ବର୍ଷରୁ କମ୍ ୧୨୭ ପିଲା ରହିଥିବାବେଳେ ଏବଂ ୯ ରୁ ୧୯ ବର୍ଷ ମଧ୍ୟରେ ୧୭୪ ପିଲା କରୋନା ପଜିଟିଭ ଥିବା ଜଣାପଡିଛି। ଆଗାମୀ ଦିନରେ ପିଲାମାନଙ୍କ ସଂକ୍ରମଣ ମାମଲା ବଢ଼ିପାରେ ବୋଲି ସ୍ବାସ୍ଥ୍ୟ ବିଭାଗ ପକ୍ଷରୁ ସର୍ତକ ସୂଚନା ଜାରି କରାଯାଇଛି। ସ୍ବାସ୍ଥ୍ୟ ବିଭାଗର ଜଣେ ଅଧିକାରୀ କହିଛନ୍ତି ଯେ କିଛି ଦିନ ମଧ୍ୟରେ ଏହି ସଂଖ୍ୟା ତିନିଗୁଣ ହେବାର ଆଶଙ୍କା ରହିଛି। ଏହା ଏକ ବଡ ବିପଦ ସୃଷ୍ଟି କରିପାରେ। ଅଧିକାରୀ କହିଛନ୍ତି, ପିଲାମାନଙ୍କୁ କେବଳ ଘର ଭିତରେ ରଖି ସଂକ୍ରମଣରୁ ଦୂରେଇ ରଖି ହେବ। କର୍ନାଟକ ସରକାର ସମସ୍ତ ଜିଲାରେ ରାତି ଓ ସପ୍ତାହ ଶେଷରେ କର୍ଫ୍ୟୁ ନିର୍ଦ୍ଦେଶ ଦେଇଛନ୍ତି। ଏହା ବ୍ୟତୀତ କେରଳ-କର୍ଣ୍ଣାଟକ, ମହାରାଷ୍ଟ୍ର-କର୍ନାଟକ ସୀମାରେ ପ୍ରବେଶ ଉପରେ କଟକଣା ଲଗାଯାଇଛି। ସୁରକ୍ଷା ଦୃଷ୍ଟିରୁ ସରକାର ଅଗଷ୍ଟ ୧୬ରୁ ରାଜ୍ୟରେ ଆଂଶିକ ଲକ୍ଡାଉନ୍ ଘୋଷଣା କରିବାକୁ ଯୋଜନା କରୁଛନ୍ତି।
