ନାଉଗଁା,୨୦ା୯(ସ୍ବ.ପ୍ର.):ସରକାର ରାସ୍ତା ଉନ୍ନତୀକରଣ ଉପରେ ଧ୍ୟାନ ଦେଉଥିବାବେଳେ ବହୁ ସମୟରେ ନିମ୍ନମାନର କାମ ଯୋଗୁ ଏହାର ଉଦ୍ଦେଶ୍ୟ ପୂରଣ ହୋଇପାରୁନାହିଁ। ନାଉଗଁା ବ୍ଲକରେ ଏହାର ଉଦାହରଣ ଦେଖିବାକୁ ମିଳିଛି। ନାଉଗଁା ବଜାରଠାରୁ କୋକିଢିହ-ତେଲସରାକୁ ଏକ ସଂଯୋଗୀକରଣ ରାସ୍ତା ରହିଛି। ରାସ୍ତାର ଲମ୍ବ ୧୨ କି.ମି. ହୋଇଥିବାବେଳେ ଏହା ପୂର୍ତ୍ତ ବିଭାଗ ଅଧୀନରେ ରହିଛି। ଏହି ରାସ୍ତାକୁ ବିଭାଗ ତରଫରୁ ବାରମ୍ବାର ମରାମତି କରାଯାଇଛି। ମାତ୍ର ନିମ୍ନମାନର କାମଯୋଗୁ ଏହା ଫାଟିଯାଉଥିବା ଅଭିଯୋଗ ହୋଇଛି। ୨ ବର୍ଷ ପୂର୍ବେ ଏହି ରାସ୍ତା ମରାମତି ହୋଇଥିଲା। ମାତ୍ର ଏବେ ପୁଣି ଗଙ୍ଗଦାହାଟରୁ କୋରୁଅ ପର୍ଯ୍ୟନ୍ତ ନିର୍ମିତ କଂକ୍ରିଟ ରାସ୍ତାରୁ ଗୋଡି ଉଠିଯାଇଛି। ଫଳରେ ଯାତାୟାତରେ ସମସ୍ୟା ସୃଷ୍ଟି ହୋଇଛି। ସେହିପର ତେଣ୍ଟୋଇଠାରେ ରାସ୍ତା ମଝିରେ ଏକ ବଡ଼ ଖାଲ ସୃଷ୍ଟି ହୋଇଛି। ଏଥିଯୋଗୁ ଯାନବାହନ ଯାତାୟାତ ବେଳେ ଅସୁବିଧା ଉପୁଜିଛି।
ଖାଲ ହୋଇଥିବା ସ୍ଥାନ ନିକଟରେ ଏକ କଲଭର୍ଟ ରହିଥିବାବେଳେ ପାର୍ଶ୍ୱରେ ଗୋବରୀ ନାଳ ରହିଛି। କୌଣସି ଅଜଣା ଗାଡି ଚାଳକ ଏହି ବାଟ ଦେଇ ଗଲେ ଦୁର୍ଘଟଣା ଘଟିବାର ଆଶଙ୍କା ରହିଛି। ରାସ୍ତାଟି ନାଉଗଁା ବ୍ଳକକୁ ସଂଯୋଗ କରିବାର ମୁଖ୍ୟ ରାସ୍ତା ହୋଇଥିବା ବେଳେ ଏହି ବାଟ ଦେଇ ପ୍ରତ୍ୟହ ବିଭିନ୍ନ ଭାରିଯାନ, ଯାତ୍ରୀବାହୀଯାନ ଆଦି ଚଳପ୍ରଚଳ ହୋଇଥାଏ। ତୁରନ୍ତ ରାସ୍ତା ମରାମତି କରିବା ପାଇଁ ସ୍ଥାନୀୟ ଲୋକେ ପ୍ରଶାସନ ନିକଟରେ ଦାବି କରିଛନ୍ତି। ଏ ସମ୍ପର୍କରେ ବିଭାଗୀୟ ଯନ୍ତ୍ରୀ ବଳରାମ ସ୍ବାଇଁ କହିଛନ୍ତି, ଏହି ରାସ୍ତା କାର୍ଯ୍ୟ ପାଇଁ ଟେଣ୍ଡର ସରିଛି। ଏନେଇ ଖୁବ୍ଶୀଘ୍ର କାର୍ଯ୍ୟ ଆରମ୍ଭ ହେବ ବୋଲି ସେ କହିଛନ୍ତି।
