ନୂଆଦିଲ୍ଲୀ,୨୯।୮(ପି.ଟି.): ଦେଶରୁ କୁପୋଷଣ ଦୂର କରିବା ଏବଂ ଜଳ ସଂରକ୍ଷଣ ବଢ଼ାଇବା ଉପରେ ସାମାଜିକ ସଚେତନତାର ଗୁରୁତ୍ୱ ସମ୍ପର୍କରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ରବିବାର ଜୋର୍ ଦେଇଛନ୍ତି। ଏଥିସହିତ ଇଣ୍ଟରନେଟ ସଂଯୋଗର ପ୍ରସାରଣ ଦୁର୍ଗମ ଅଞ୍ଚଳ ବିଶେଷ କରି ଉତ୍ତରପୂର୍ବାଞ୍ଚଳରେ ନୂଆ ସୂର୍ଯ୍ୟୋଦୟ ଆଣିବ ବୋଲି ମନ୍ କୀ ବାତ୍ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ କହିଛନ୍ତି। ସ୍ବାଧୀନତାର ୭୫ ବର୍ଷ ପୂର୍ତ୍ତି ଅବସରରେ ଦେଶ ଆଜାଦୀ କା ଅମୃତ ମହୋତ୍ସବ ପାଳନ କରୁଥିବାବେଳେ ଆମେ ସାମୂହିକ ଶକ୍ତି ଦେଖିବାକୁ ପାଇଛେ। ବିଶାଳ ଦେଶରେ ଏତେ ସଂଖ୍ୟାରେ ବିବିଧତା ସତ୍ତ୍ୱେ ତ୍ରିରଙ୍ଗା ଉତ୍ତୋଳନ ବେଳେ ସମସ୍ତେ ସମାନ ଉତ୍ସାହର ସହ ତାହା ଉଡ଼ାଇଥିବା ଦେଖାଯାଇଛି। ସେପ୍ଟେମ୍ବରକୁ କୁପୋଷଣ ମାସ ଭାବେ ପାଳନ କରାଯାଉଛି। ସରକାର କୁପୋଷଣ ହଟାଇବା ଲାଗି ବିଭିନ୍ନ ପଦକ୍ଷେପ ନେଇଛନ୍ତି। ଜନସଚେତନତା ଏବଂ ସାମୂହିକ ଉଦ୍ୟମ ବଳରେ ଏହି ସମସ୍ୟାରୁ ଦେଶକୁ ମୁକ୍ତ କରାଯାଇପାରିବ ବୋଲି ମୋଦି କହିଛନ୍ତି।
ସ୍ବାଧୀନତା ସଂଗ୍ରାମୀ ବିଶେଷ କରି ଅଖ୍ୟାତ ହିରୋମାନଙ୍କ ଅବଦାନ ଉପରେ ଦୂରଦର୍ଶନରେ ପ୍ରସାରିତ ‘ସ୍ବରାଜ’ ସିରିଏଲ୍ ଦେଖିବା ଲାଗି ମୋଦି ଜନସାଧାରଣଙ୍କୁ ଆହ୍ବାନ ଦେଇଛନ୍ତି। ସ୍ବାଧୀନତା ସଂଗ୍ରାମରେ ସେମାନଙ୍କ ଉଦ୍ୟମ ଓ ଭୂମିକା ସମ୍ପର୍କରେ ଯୁବପିଢ଼ିଙ୍କୁ ଅବଗତ କରାଇବା ଏହାର ଉଦ୍ଦେଶ୍ୟ। ସେହିପରି ଜଳ ସଂରକ୍ଷଣ ଉପରେ ଗୁରୁତ୍ୱ ଦେଇ ମୋଦି କହିଥିଲେ, ବିଭିନ୍ନ ଅଞ୍ଚଳରେ ଲୋକେ ଜଳାଶୟ ନିର୍ମାଣ ଲାଗି ସ୍ବତନ୍ତ୍ର ଉଦ୍ୟମ କରୁଛନ୍ତି। ଅମୃତ ସରୋବର ଅଭିଯାନ କେବଳ ବର୍ତ୍ତମାନର ସମସ୍ୟା ସମାଧାନ କରିବ ନାହିଁ, ଆଗାମୀ ପିଢ଼ିଙ୍କ ପାଇଁ ଏହା ସମାନ ଗୁରୁତ୍ୱପୂର୍ଣ୍ଣ ବୋଲି ପ୍ରଧାନମନ୍ତ୍ରୀ କହିଛନ୍ତି।
