ମହାକାଳପଡ଼ା,୨୪ା୪(ଡି.ଏନ.ଏ.): କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଧୀନ ମହାନଦୀ, ଲୁଣା, ପାଇକା ଓ ଗୋବରୀ ନଦୀରୁ ବେଆଇନ ବାଲି ଚାଲାଣ ଚାଲିଛି। କେତେଜଣ ବାଲି ବ୍ୟବସାୟୀ ବଡ଼ ବଡ଼ ଯନ୍ତ୍ର ଚାଳିତ ଡଙ୍ଗାରେ ଗୋଟିଏ ପଟରୁ ବାଲି ଆଣି ଅନ୍ୟପଟେ ବିକ୍ରି କରୁଛନ୍ତି। ଏଥିପାଇଁ ସେମାନେ ଶ୍ରମିକମାନଙ୍କୁ ନିୟୋଜିତ କରିଛନ୍ତି। ଅବାଧରେ ଦିନରାତି ବାଲି ଚାଲାଣ ଚାଲିଛି। ଏ ସଂକ୍ରାନ୍ତରେ ବିଭାଗୀୟ ଅଧିକାରୀ ଓ କର୍ମଚାରୀମାନେ ଅବଗତ ଥିଲେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଯାଉନାହିଁ। ବାଲି ବ୍ୟବସାୟୀଙ୍କ ସହିତ ସେହି କର୍ମଚାରୀଙ୍କ ସୁସମ୍ପର୍କ ରହିଛି। ଏଥିଯୋଗୁ ସରକାର ରାଜସ୍ବ ହରାଇ ଚାଲିଛନ୍ତି ବୋଲି ଅଭିଯୋଗ ହୋଇଛି।
ଏପରି ବାଲି ଚାଲାଣ ଯୋଗୁ ବନ୍ୟା ଆସିଲେ ନଦୀର ଗତିପଥ ପରିବର୍ତ୍ତନ ହେଉଛି। ନଦୀ କୂଳରୁ ଅତଡ଼ା ଖସୁଛି ବୋଲି ସ୍ଥାନୀୟ ଗ୍ରାମବାସୀ କହିଛନ୍ତି। ଅପରପକ୍ଷେ ଶ୍ରମିକମାନେ ନିଜ ଜୀବନକୁ ବାଜି ଲଗାଇ ନଦୀରୁ ବାଲି ସଂଗ୍ରହ କରୁଛନ୍ତି। କେତେଜଣ ଶ୍ରମିକ ନିଜ ନାମ ଗୋପନ ରଖିବା ସର୍ତ୍ତରେ କହିଛନ୍ତି, ପରିବାର ଚଳାଇବା ପାଇଁ ଆମେ ଜୀବନକୁ ବାଜି ଲଗାଇ କାମ କରୁଛୁ। ନଦୀ ପାଣିରେ ବୁଡ଼ି ବାଲ୍ଟିରେ ବାଲି ଉଠାଇ ଡଙ୍ଗାରେ ଲୋଡ୍ କରୁଛୁ। ସେହି ବାଲିକୁ ଡଙ୍ଗାରେ ଆଣି ଅନ୍ୟପଟେ ଅନ୍ଲୋଡ୍ କରୁଛୁ। ଏହା ବହୁ କଷ୍ଟକର ଓ ବିପଦସଙ୍କୁଳ କାମ ହୋଇଥିଲେ ମଧ୍ୟ ପେଟ ପାଇଁ ସବୁ କିଛି କରିବାକୁ ପଡୁଛି।
ସୂଚନା ଅନୁଯାୟୀ ପ୍ରତିଦିନ ୧୦ରୁ ଅଧିକ ଡଙ୍ଗାରେ ବାଲି ଚାଲାଣ ହେଉଛି। ଏଥିପାଇଁ ୨୫ରୁ ଊର୍ଦ୍ଧ୍ୱ ଶ୍ରମିକ ନିୟୋଜିତ ହୋଇଛନ୍ତି। ନିଲାମ ହୋଇଥିବା ଘାଟରୁ ବାଲି ଆଣିଲେ ସେଥିପାଇଁ ନିର୍ଦ୍ଧାରିତ ଟଙ୍କା ଦେବାକୁ ପଡ଼ିବ। ହେଲେ ନଦୀ ମଝିରୁ କିମ୍ବା କୂଳରୁ ବାଲି ଆଣିଲେ କୌଣସି ଟଙ୍କା ଦେବାକୁ ପଡୁନାହିଁ। ସେଥିପାଇଁ ବାଲି ବ୍ୟବସାୟୀମାନେ ଶ୍ରମିକ ଲଗାଇ ନଦୀରୁ ବାଲି ସଂଗ୍ରହ କରି ଭଲ ରୋଜଗାର କରୁଛନ୍ତି ବୋଲି ସ୍ଥାନୀୟ ଲୋକେ କହିଛନ୍ତି। ଏପରି କି ବ୍ୟବସାୟୀମାନେ ନଦୀ କୂଳରେ ଡଙ୍ଗା ଲଙ୍ଗର ପକାଇ ବାଲିକୁ ଅନ୍ଲୋଡ କରୁଛନ୍ତି। ସେହି ବାଲିକୁ ଟ୍ରାକ୍ଟର ପିଛା ୨ ହଜାର ଟଙ୍କାରେ ବିକ୍ରି କରୁଛନ୍ତି। ଏ ସମ୍ପର୍କରେ ମହାକାଳପଡ଼ା ତହସିଲଦାର ମାନସ ରଞ୍ଜନ ତ୍ରିପାଠୀଙ୍କୁ ପଚାରିବାରୁ ଏପରି ବେଆଇନ ବାଲି ଚାଲାଣ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ସେ କହିଛନ୍ତି ା
