ସାରସକଣା,୨୯ା୧୧(ଡି.ଏନ୍.ଏ.):ମୟୂରଭଞ୍ଜ ଜିଲା ସାରସକଣା ବ୍ଲକ ଅଧୀନ ଶୀର୍ଷା ପଞ୍ଚାୟତର ମେରୁମଠ ଜମିରେ ବେଆଇନ ରାସ୍ତା ନିର୍ମାଣ କରାଯାଉଥିବା ଦେଖିବାକୁ ମିଳିଛି। ସ୍ଥାନୀୟ ବେଢାପାଳ ଗ୍ରାମର ପ୍ରାୟ ୧୦ ପରିବାରର ପୂର୍ବ ଯାତାୟତ ପଥ ବନ୍ଦ ହୋଇଯାଇଥିବାରୁ ସେମାନେ ମଠ ଜମିରେ ରାସ୍ତା ତିଆରି କରିବାକୁ ପ୍ରୟାସ କରିଥିଲେ। ଖବରପାଇ ଝାରପୋଖରିଆ ପୋଲିସ ହସ୍ତକ୍ଷେପ କରିବା ପରେ ରାସ୍ତା ନିର୍ମାଣ ବନ୍ଦ ରହିଛି।
ପର୍ଯ୍ୟଟନ ବିଭାଗ ପକ୍ଷର ମେରୁ ମଠ ଉନ୍ନତିକରଣ କାର୍ଯ୍ୟ ଚାଲିଛି। ମଠର ପ୍ରବେଶ ପଥରେ ଏକ ଗେଟ ନିର୍ମାଣ ହେଉଛି। ତେବେ ବେଢ଼ାପାଳ ଗ୍ରାମର ଲୋକେ ଗେଟ ପାଖରେ ବେଆଇନ ଭାବେ ରାସ୍ତା ତିଆରି କରିବାକୁ ପ୍ରୟାସ କରିଥିଲେ। ଗ୍ରାମବାସୀଙ୍କ କହିବା ମୁତାବକ, ପୂର୍ବରୁ ସେମାନେ ଯାତାୟତ କରୁଥିବା ରାସ୍ତାଟି ଜଣେ ଲୋକଙ୍କର ଜମି ହୋଇଥିବାରୁ ସେ ଏହାକୁ ବନ୍ଦ କରି ଦେଇଛନ୍ତି। ଫଳରେ ଯାତାୟତ ପାଇଁ ସେମାନେ ନିର୍ମାଣଧିନ ଗେଟ ସମ୍ମୁଖରେ ରାସ୍ତା ଖୋଲିବାକୁ ଚେଷ୍ଟା କରୁଥିଲେ। ଉକ୍ତ ଗ୍ରାମବାସୀଙ୍କ ଯାତାୟତ ପାଇଁ ସେଠାରେ ପୂର୍ବରୁ ରାସ୍ତା ରହିଥିବା ବେଳେ କିଛି ଲୋକ ସରକାରୀ ଜମିକୁ କବଜା କରି ଯାତାୟତ ବନ୍ଦ ରଖିଛନ୍ତି। ଅନ୍ୟପଟେ ଉକ୍ତ ଜମି ମଠର, ଯାହାକି ପର୍ଯ୍ୟଟନ ବିଭାଗ ଅଧୀନରେ ଥିବା ସତ୍ତ୍ୱେ କେଉଁ ଉଦ୍ଦେଶ୍ୟରେ ମଠ ଜାଗାରେ ଲୋକେ ଯାତାୟତ ପଥ ନିର୍ମାଣ କରିବାକୁ ଚାହାନ୍ତି ସେଥିନେଇ ମଠାଧୀଶ ବାବା ବିମ୍ବାଧର ଦାସ ଚିନ୍ତା ପ୍ରକଟ କରିଛନ୍ତି। ଗ୍ରାମବାସୀ ତହସିଲଦାରଙ୍କୁ ଜଣାଇ ଜମିର ମାପ କରିବା ଏବଂ ଅସ୍ଥାୟୀ ଭାବେ କିଛିଦିନ ପାଇଁ ମଠ ଜାଗା ଦେଇ ଯାତାୟତ କରନ୍ତୁ ବୋଲି ପୋଲିସ ଲୋକଙ୍କୁ କହିବା ପରେ ସମସ୍ୟାର ଅସ୍ଥାୟୀ ସମାଧାନ ହୋଇଥିଲା। ମଠ ବାବା ସଞ୍ଜୟ ଦାସ ତହସିଲଦାର ମନୋଜ କୁମାର କାର୍ଜିଙ୍କୁ ଭେଟି ମଠ ଜମିର ସ୍ଥାନ ନିରୂପଣ କରିବାକୁ ଅନୁରୋଧ କରିଥିବା ପ୍ରକାଶ କରଛନ୍ତି।
