ପଟ୍ଟାମୁଣ୍ଡାଇ,୨୨ା୧୦(ସ୍ବ.ପ୍ର.): କେନ୍ଦ୍ରାପଡ଼ା ଜିଲାରେ ୨ ବର୍ଷ ମଧ୍ୟରେ ୪ଟି ଏନ୍ଜିଟି (ଜାତୀୟ ଗ୍ରୀନ୍ ଟ୍ରିବ୍ୟୁନାଲ) ମାମଲା ଜିଲା ପ୍ରଶାସନକୁ ଅଡୁଆରେ ପକାଉ ଥିଲେ ମଧ୍ୟ ବିଭିନ୍ନ ନଦୀ ସଇରାତରୁ ବାଲି ଉଠାଣ ହେଉଛି। ପରିବେଶ ମଞ୍ଜୁରୀ ପ୍ରତି କାହାରି ନିଘା ନ ଥିବା ବେଳେ ରାଜସ୍ବ ଆଦାୟକୁ ବି ଅଣଦେଖା କରାଯାଉଛି ବୋଲି ଅଭିଯୋଗ ହେଉଛି। ଜିଲାର ପଟ୍ଟାମୁଣ୍ଡାଇ ବ୍ଲକ ଅଞ୍ଚଳ ଦେଇ ପ୍ରବାହିତ ବ୍ରାହ୍ମଣୀ ନଦୀର ଅଳଭା ସଇରାତରୁ ବାଲି ଉଠାଣ ହେଉଛି। ସମୁଦାୟ ୧ ହେକ୍ଟର ଆୟତନରେ ବାଲି ଉଠାଣ କରାଯାଉଥିବା ବେଳେ ଜିଲା ପ୍ରଶାସନ ନୀରବ ଦ୍ରଷ୍ଟା ସାଜିଛି।
ସାମାଜିକ କର୍ମୀ ମିଟୁ ଦାଶ କହିଛନ୍ତି, ପଟ୍ଟାମୁଣ୍ଡାଇ ତହସିଲ ଅଧୀନ ଅଳଭା ପାଳଠାରେ ଥିବା ସରକାରୀ ଜମିରୁ ବେଧଡକ ଭାବେ ଶତାଧିକ ଟ୍ରିପ ହାଇୱାରେ ମାଟିବାଲି ଉଠାଣ ଚାଲିଛି। ଏ ସମ୍ପର୍କରେ ଅଳଭା ଗ୍ରାମବାସୀ ଅଭିଯୋଗ କରିବା ସହ ଏହା ଉତିକଣ ବନ୍ୟା ନିରୋଧକ ବନ୍ଧ ପ୍ରତି ବିପଦ ସୃଷ୍ଟି କରୁଛି। ଅଳଭା ବ୍ରାହ୍ମଣୀ ନଦୀପଠାରୁ ହାଇୱାରେ ହଜାର ହଜାର ଟ୍ରିପ ବାଲିମାଟି ଉଠାଣକୁ ନେଇ ଜାତୀୟ ଗ୍ରୀନ ଟ୍ରିବ୍ୟୁନାଲ ପକ୍ଷରୁ ମାମଲା ରୁଜୁ କରାଯାଇ ସମ୍ପୂର୍ଣ୍ଣ ମାଟି ଉଠାଣକୁ ବନ୍ଦ କରାଯାଇଛି। ମାତ୍ର ଏହାର ୧ କିମି ପରେ ବେଆଇନ ଭାବେ ଜେସିବି ଲଗାଇ ହାଇଓ୍ବାରେ ବ୍ୟବସାୟୀମାନେ ମାଟି ଉଠାଉଛନ୍ତି। ହେଲେ ପ୍ରଶାସନ ନୀରବ ଦ୍ରଷ୍ଟା ସାଜିଥିବାରୁ ସଧାରଣରେ ଅସନ୍ତୋଷ ପ୍ରକାଶ ପାଇଛି। ପଟ୍ଟାମୁଣ୍ଡାଇ ବ୍ଲକ ଦେଇ ପ୍ରବାହିତ ବ୍ରାହ୍ମଣୀ ନଦୀ ପଠାରୁ ପରିବେଶ କ୍ଲିୟରାନ୍ସ ପ୍ରମାଣ ପତ୍ର ନ ଥାଇ ହଜାର ହଜାର ଟ୍ରକ ବାଲି ଓ ମାଟି ଉଠା ଯାଉଛି। ଏହି ବେଆଇନ ବାଲି ଉଠାଣ ସମ୍ପର୍କରେ ଜାତୀୟ ଗ୍ରୀନ ଟ୍ରିବ୍ୟୁନାଲଙ୍କ ନିକଟରେ ଅଭିଯୋଗ କରିଥିଲୁ। ଜାତୀୟ ଗ୍ରୀନ ଟ୍ରିବ୍ୟୁନାଲ ଅଭିଯୋଗରେ ଜିଲାପାଳ, ଜିଲା ମାଇନିଂ ଅଫିସର ଓ ଏସ୍ପିଙ୍କଠାରୁ ତଦନ୍ତ ରିପୋର୍ଟ ମାଗିଥିଲେ। ଏହି ରିପୋର୍ଟ ସତ୍ୟପାଠ ଜରିଆରେ ଏନଜିଟି ନିକଟରେ ପ୍ରଦାନ କରାଯାଇଥିଲା। ତେବେ ଜିଲାପାଳ ଓ ଏସ୍ପିଙ୍କ ସତ୍ୟପାଠ ଆଧାରରେ ବେଆଇନ ବାଲି ଉଠ।ଣ ବନ୍ଦ କରିବାକୁ ଜାତୀୟ ଗ୍ରୀନ ଟ୍ରିବ୍ୟୁନାଲ ନିର୍ଦ୍ଦେଶ ଦେଇଥିଲେ। ଏଥିସହ ବେଆଇନ ବାଲି ଉଠାଣ କାରିମାନଙ୍କଠାରୁ ୫ କୋଟି ଟଙ୍କ। ଜରିମାନା ଆଦାୟ କରିବାକୁ ରାଜ୍ୟ ମୁଖ୍ୟ ଶାସନ ସଚିବଙ୍କୁ ନିର୍ଦ୍ଦେଶ ଦେଇଥିଲେ। ତେବେ ଏହି ଜରିମାନା ଆଦାୟ ହୋଇ ନ ଥିବା କୁହାଯାଉଥିବା ବେଳେ ଅଳଭା ନିକଟ ବାଲି ଓ ମାଟି ଖାଦାନ ବନ୍ଦ ରହିଥିଲା। ମାତ୍ର ଏବେ ବାଲି ବ୍ୟବସାୟୀମାନେ ଅଳଭା ପାଳରୁ ପ୍ରଶାସନକୁ ଚ୍ୟାଲେଞ୍ଚ କରି ପୁଣି ମାଟିବାଲି ଉଠାଣ କରୁଛନ୍ତି। ଯାହାକି ଉତିକଣ ବନ୍ୟା ନିୟନ୍ତ୍ରଣ ବନ୍ଧ ପ୍ରତି ବିପଦ ସୃଷ୍ଟି କରୁଛି। ଏ ସମ୍ପର୍କରେ ତହସିଲଦାର ଦିଲୀପ ସେଠୀଙ୍କୁ ପଚାରିବାରୁ , ଏନଜିଟି ନିର୍ଦ୍ଦେଶ ଅନୁସାରେ ବ୍ରହ୍ମଣୀ ନଦୀର ପଠା ଅଳଭାଠାରୁ ବାଲିମାଟି ଉଠାଣ ବନ୍ଦ ଅଛି। ଯଦି କେହି ସେଠାରୁ ମାଟି ଉଠାଉଥିବେ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ କହିଥିଲେ।
