ସମ୍ବଲପୁର,୧।୭(ପ୍ରମୋଦ ବହିଦାର): ସମ୍ବଲପୁର ସହର ଓ ଏହାର ଆଖପାଖ ଅଞ୍ଚଳରେ ବେଆଇନ ନିଷିଦ୍ଧ ନିଶା କଫସିରପ କାରବାରରେ ସମ୍ପୃକ୍ତ ୬ ଅଭିଯୁକ୍ତଙ୍କୁ ସମ୍ବଲପୁରର ଅଇଁଠାପାଲି ଥାନା ପୋଲିସ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ଜାମନକିରା ଥାନା ଅନ୍ତର୍ଗତ କୁମକାପାଲର ଚନ୍ଦନ ବେହେରା(୨୫), କୁମକୁପାଲିର ସୁରଜ ମୁଣ୍ଡା(୨୮), ସମାପଦାର ପିଣ୍ଟୁ ମୁଣ୍ଡା (୩୪), ବୁର୍ଲା ଥାନା ବୈଜାମୁଣ୍ଡାର ଦୀପକ ଥେଥୁଆର(୨୮), କାହ୍ନା ବେହେରା(୨୮) ଏବଂ ଶାସନ ଥାନା ଖୁଲିଆ ଅଞ୍ଚଳର ମାନସ ବେସନ(୨୬)।
ପ୍ରାପ୍ତ ସୂଚନା ଅନୁସାରେ, ସିଂହପାଲି ଅଞ୍ଚଳ ଦେଇ ବିପୁଳ ପରିମାଣର ନିଷିଦ୍ଧ ନିଶା କଫସିରପ ଚୋରା ଚାଲାଣ ହେଉଥିବା ନେଇ ଅଇଁଠାପାଲି ଥାନା ସ୍ୱତନ୍ତ୍ର ପୋଲିସ ପାଟ୍ରୋଲିଂ ଦଳ ଗୁପ୍ତ ସୂଚନା ମିଳିଥିଲା। ଉକ୍ତ ସୂଚନା ଆଧାରରେ ପୋଲିସ ପାଟ୍ରୋଲିଂ ଦଳ ସିଂହପାଲି ନିକଟରେ ଏକ କାର(ଓଡି-୦୭-ଏଇ-୬୨୬୨) ଓ ଏହାକୁ ଏସ୍କର୍ଟ କରୁଥିବା ଏକ ନମ୍ବର ବିହୀନ ଇଭି ସ୍କୁଟିକୁ ସନ୍ଦେହରେ ଅଟକାଇ ଯାଞ୍ଚ କରିଥିଲା। ଯାଞ୍ଚ ବେଳେ କାର ଓ ସ୍କୁଟିରୁ ୧୦ଟି ବଡ଼ କାର୍ଟନରେ ଥିବା ୧୦୦ ମିଲିଲିଟର ବିଶିଷ୍ଟ ୧୨୦୦ ବୋତଲ ସିଲ୍ଡ ନିଷିଦ୍ଧ କୋଡିନ ଯୁକ୍ତ କଫସିରପକୁ ଜବତ କରି ଯାଇଥିଲା। ଏହାସହ ବେଆଇନ ପରିବହନରେ ବ୍ଯବହୃତ କାର ଓ ଇଭି ସ୍କୁଟି ସହିତ ଗ୍ରାହକ ଓ ଚୋରା ନିଶା ବେପାରୀଙ୍କ ସହ ଯୋଗାଯୋଗ ପାଇଁ ବ୍ୟବହୃତ ୭ଟି ମୋବାଇଲ୍ ଫୋନ୍ ଏବଂ ନଗଦ ୫୫୪୦ ଟଙ୍କା ମଧ୍ୟ ଜବତ କରାଯାଇଛି।
ପୋଲିସର ପ୍ରାଥମିକ ଅନୁସନ୍ଧାନରୁ ଜଣାପଡ଼ିଛି ଯେ ଏହି ସମସ୍ତ ନିଶା କଫ୍ ସିରପ୍ ପଶ୍ଚିମବଙ୍ଗର କୋଲକାତାରୁ ବେଆଇନ ଭାବେ ସଂଗ୍ରହ କରାଯାଇ ସମ୍ବଲପୁର ଏବଂ ଏହାର ଆଖପାଖ ସୀମାନ୍ତ ଅଞ୍ଚଳରେ ଯୁବପିଢ଼ିଙ୍କୁ ମାଦକ ଦ୍ରବ୍ୟ ଭାବେ ଅତ୍ୟଧିକ ମୂଲ୍ୟରେ ବିକ୍ରି କରିବା ପାଇଁ ଅଣାଯାଇଥିଲା। ଏହି ଅଭିଯୁକ୍ତମାନେ ଏକ ବଡ଼ ଆନ୍ତଃରାଜ୍ୟ ସୁସଂଗଠିତ ନେଟୱାର୍କ ସହିତ ଜଡ଼ିତ ରହି ସହରରେ ନିଶା କାରବାର ବିସ୍ତାର କରୁଥିଲେ। ଏହାକୁ ନେଇ ଅଇଁଠାପାଲି ଥାନାରେ କେସ୍ ନମ୍ବର ୧୮୫/୨୦୨୬ରେ ଅବକାରୀ ଆଇନ ଧାରା ୨୦(ବି), ୨୯ ରେ ଏକ ମାମଲା ରୁଜୁ କରି ପୋଲିସ ଘଟଣାର ଅଧିକ ତଦନ୍ତ କରୁଛି।
