ସିଓଲ,୧୬।୩ : ୟୁକ୍ରେନ ସଙ୍କଟ ମଧ୍ୟରେ ଉତ୍ତରକୋରିଆର ଏକଛତ୍ରବାଦୀ ଶାସକ କିମ୍ ଜୋଙ୍ଗ୍ ଉନ୍ ପୁଣି ଥରେ ନିଜର ଶକ୍ତି ପ୍ରଦର୍ଶନ କରିଛନ୍ତି। ଦକ୍ଷିଣ କୋରିଆର ସୈନ୍ୟବାହିନୀ କହିଛି ଯେ ଉତ୍ତର କୋରିଆର ବୁଧବାର ଦିନ ଏକ ଅଜ୍ଞାତ କ୍ଷେପଣାସ୍ତ୍ର ପରୀକ୍ଷା କରିଛି। କିନ୍ତୁ ଏହାର ଉତକ୍ଷେପଣ ବିଫଳ ହୋଇଛି।
ଦକ୍ଷିଣ କୋରିଆର ରାଜଧାନୀ ସିଓଲର ଜଏଣ୍ଟ ଚିଫ୍ ଅଫ୍ ଷ୍ଟାଫ୍ ଏକ ବିବୃତ୍ତିରେ କହିଛନ୍ତି ଯେ ଉତ୍ତର କୋରିଆ ବୁଧବାର ପୂର୍ବାହ୍ନ ପ୍ରାୟ ସାଢ଼େ ୯ଟା ସୁନାନ ଅଞ୍ଚଳରୁ ଏକ ଅଜ୍ଞାତ କ୍ଷେପଣାସ୍ତ୍ର ପରୀକ୍ଷା କରିଥିଲା, କିନ୍ତୁ ଏହା ଲଞ୍ଚ୍ ହେବାର କିଛି ସମୟ ପରେ ଦୁର୍ଘଟଣାଗ୍ରସ୍ତ ହୋଇଛି ବୋଲି ଜଣାପଡିଛି।
ଉତ୍ତର କୋରିଆ ଚଳିତ ବର୍ଷ ଏପର୍ଯ୍ୟନ୍ତ ମୋଟ ୧୦ ଟି ଅସ୍ତ୍ରଶସ୍ତ୍ର ପରୀକ୍ଷା କରିଛି। ସେଥିମଧ୍ୟରୁ ଗୋଟିଏ ବିଫଳ ହୋଇଛି। ସେଥିମଧ୍ୟରେ ସାତୋଟି କ୍ଷେପଣାସ୍ତ୍ର ଏବଂ ଦୁଇଟି ଅନୁସନ୍ଧାନ ଉପଗ୍ରହ ଅନ୍ତର୍ଭୁକ୍ତ। ଦକ୍ଷିଣ କୋରିଆ ଏବଂ ଆମେରିକା ଉତ୍ତର କୋରିଆର କ୍ଷେପଣାସ୍ତ୍ର ପରୀକ୍ଷାକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି। ଗତ ସପ୍ତାହରେ ଦୁଇ ଦେଶ ଏକ ବିବୃତ୍ତି ଜାରି କରି କହିଥିଲେ ଯେ ଉତ୍ତର କୋରିଆ ଦ୍ୱାରା ପରୀକ୍ଷା କରାଯାଇଥିବା ଅଧିକାଂଶ କ୍ଷେପଣାସ୍ତ୍ର ଆନ୍ତର୍ମହାଦେଶୀୟ ବାଲାଷ୍ଟିକ କ୍ଷେପଣାସ୍ତ୍ର (ଆଇସିବିଏମ)। ଏପରି କ୍ଷେପଣାସ୍ତ୍ର ପୂର୍ବରୁ ଉତକ୍ଷେପଣ କରାଯାଇ ନ ଥିଲା।
