କରୋନା ମହାମାରୀ ସମଗ୍ର ବିଶ୍ୱରେ କାୟା ବିସ୍ତାର କରିଥିବାରୁ ଅନେକ ଲୋକଙ୍କ ଜୀବନ ଯାଇଛି। ବହୁ ଲୋକ ଏଥିରେ ଆକ୍ରାନ୍ତ ହୋଇ ଜୀବନ ସହ ସଂଗ୍ରାମ ବି କରୁଛନ୍ତି। ଏଥିରୁ ରକ୍ଷା ପାଇବା ପାଇଁ ମାସ୍କ ଜରୁରୀ ବୋଲି ସ୍ବାସ୍ଥ୍ୟ ବିଶେଷଜ୍ଞମାନେ ପରାମର୍ଶ ଦେଉଛନ୍ତି। ମାତ୍ର ଆମେରିକାର ଏମିତି ଏକ ରେଷ୍ଟୁରାଣ୍ଟ ଯେଉଁଠି ମାସ୍କ ଲଗାଇଲେ ଲୋକଙ୍କୁ ଜରିମାନା ଦେବାକୁ ପଡ଼ିଥାଏ।
ଆମେରିକାର କାଲିଫର୍ନିଆ ସହରରେ ଫିଡ୍ଲହେଡ୍ସ କାଫେରେ ଏପରି ଅଜବ ନିୟମ ଚାଲୁଥିବାରୁ ଚର୍ଚ୍ଚାରେ ରହିଛି। ଏହି କାଫେର ମାଲିକ ହେଉଛନ୍ତି କ୍ରିସ୍ କାସଲମ୍ୟାନ। ସେ ସବୁବେଳେ କରୋନା ଗାଇଡ୍ଲାଇନକୁ ବିରୋଧ କରିଥାନ୍ତି। ଖାଲି ଏତିକି ନୁହେଁ ସେ କରୋନା ଟିକା ମଧ୍ୟ ନେବାକୁ ରାଜି ନୁହନ୍ତି। କ୍ରିସ୍ କୁହନ୍ତି, ଲକ୍ଡାଉନ୍ ଚାଲିଥିବାରୁ ଆମେରିକାକୁ ଅନେକ କ୍ଷତି ସହିବାକୁ ପଡ଼ିଛି।
ଆମେରିକାର କାଲିଫର୍ନିଆ ଏବଂ ହାଓ୍ବାଇ ଏପରି ରାଜ୍ୟ ଯେଉଁଠି ଟିକାକରଣ ପରେ ଲୋକଙ୍କୁ ଘରେ ମାସ୍କ ପିନ୍ଧିବାକୁ କୁହାଯାଇଛି। ମାତ୍ର କ୍ରିସ ତାଙ୍କ ରେଷ୍ଟୁରାଣ୍ଟରେ କାହାକୁ ମାସ୍କ ପିନ୍ଧିଥିବା ଦେଖିବାକୁ ଚାହାନ୍ତି ନାହିଁ। ତାଙ୍କ ରେଷ୍ଟୁରାଣ୍ଟରେ ଏହା ପ୍ରଥମ ନିୟମ। ଯଦି କେହି ମାସ୍କ ପିନ୍ଧିଥିବାର ନଜର ଆସନ୍ତିି ତେବେ ତାଙ୍କୁ ୫ ଡଲାର ଜରିମାନା ଦେବାକୁ ପଡ଼ିବ।
ଏହି ରେଷ୍ଟୁରାଣ୍ଟରେ ଆଉ ଏକ ଅଜବ ନିୟମ ରହିଛି। ଯେଉଁ ବ୍ୟକ୍ତ କରୋନା ଟିକାର ପ୍ରଶଂସା କରିବ ତାଙ୍କ ଉପରେ ମଧ୍ୟ ୫ ଡଲାର ଜରିମାନା ଲାଗିବ। କ୍ରିସ୍ କହିଛନ୍ତି, ଏହି ଜରିମାନା ସ୍ଥାନୀୟ ଏକ ଟ୍ରଷ୍ଟକୁ ଯିବ।
କ୍ରିସ୍ ତାଙ୍କ ରେଷ୍ଟୁରାଣ୍ଟ ବାହାରେ ଏକ ସାଇନ୍ବୋର୍ଡ ଲଗାଇଛନ୍ତି। କିଛି ଲୋକ ଏହା ଦେଖି ରେଷ୍ଟୁରାଣ୍ଟରୁ ମୁହଁ ଫେରାଇ ନେଉଥିବା ବେଳେ ଆଉ କିଛି ଲୋକ ଖାଇବା ପାଇଁ ଆସିଥାନ୍ତି। କ୍ରିସ୍ କୁହନ୍ତି, ଏହି ନିୟମ ସେ ଆଗାମୀ କିଛିମାସ ପାଇଁ ଆପଣାଇବେ।
