ନୂଆଦିଲ୍ଲୀ,୨୯।୩ : କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ କଡ଼ା ସମାଲୋଚନା କରିଛନ୍ତି। ପ୍ରଧାନମନ୍ତ୍ରୀ ମଙ୍ଗଳବାର ଭାଜପା କାର୍ଯ୍ୟାଳୟର ଉଦଘାଟନୀ ସମାରୋହକୁ ସମ୍ବୋଧିତ କରିବାବେଳେ ବିରୋଧୀ ଦଳମାନଙ୍କୁ ଦୁର୍ନୀତିଗସ୍ତ ବୋଲି କହିଥିଲେ। କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଏହାର ଜବାବ ଦେଇଛନ୍ତି।
ବୁଧବାର ଖାର୍ଗେ ଗୋଟିଏ ପରେ ଗୋଟିଏ ଟୁଇଟ କରି ଏହାର ଉତ୍ତର ଦେଇଛନ୍ତି। ପିଏମ ମୋଦିଙ୍କୁ ସମ୍ବୋଧିତ କରି ଖାର୍ଗେ ଲେଖିଛନ୍ତି, ଅନ୍ୟକୁ କହିବା ପୂର୍ବରୁ ପ୍ରଥମେ ଆପଣ ଆପଣଙ୍କର କାର୍ଯ୍ୟକୁ ଦେଖନ୍ତୁ। ଯଦି ଆପଣଙ୍କର ପ୍ରକୃତରେ ୫୬ ଇଞ୍ଚ ଛାତି ଅଛି, ତେବେ ଆଦାନୀ ମାମଲାରେ ଯାଞ୍ଚ୍ ପାଇଁ ଜେପିସି ଗଠନ କରନ୍ତୁ।
ପ୍ରଧାନମନ୍ତ୍ରୀ ମୋଦିଙ୍କୁ ଟ୍ୟାଗ କରି ମଲ୍ଲିକାର୍ଜୁନ ଖାର୍ଗେ ଲେଖିଛନ୍ତି, ଆଦାନୀଙ୍କ ଶେଲ କୋସରେ ୨୦ ହଜାର କୋଟି ଟଙ୍କା କାହାର? ଲଲିତ ମୋଦି, ନୀରବ ମୋଦି, ମେହୁଲ ଚୋକସି, ବିଜୟ ମାଲ୍ୟା, ଜତିନ ମେହେଟ୍ଟା ପ୍ରମୁଖ ଆପଣଙ୍କର ଦୁର୍ନୀତିଗ୍ରସ୍ତ ଭଗାଅ ଅଭିଆନର ସଦସ୍ୟ କି? ଆପଣ ଏହି ମିଳିତ ମଞ୍ଚର ସଂଯୋଜକ କି? ନିଜକୁ ଦୁର୍ନୀତି ନିବାରଣ କ୍ରୁସେଡର୍ ଇମେଜ ମେକଅଭର କରିବା ବନ୍ଦ କରନ୍ତୁ! ଏହା ଲଜ୍ଜାଜନକ।
କର୍ନାଟକରେ ଆପଣଙ୍କ ସରକାର ବିରୋଧରେ ୪୦ ପ୍ରତିଶତ କମିଶନର ଅଭିଯୋଗ ବିଷୟରେ କିଛି କହିବେ କି? ଆପଣ ମେଘାଳୟର ୧ ନମ୍ବର ଦୁର୍ନୀତିଗ୍ରସ୍ତ ସରକାରରେ କାହିଁକି ସାମିଲ ଅଛନ୍ତି? ରାଜସ୍ଥାନର ସଞ୍ଜୀବନୀ କୋଅପରେଟିଭ ସ୍କାମ, ମଧ୍ୟପ୍ରଦେଶର ପୋଷଣ ସ୍କାମ ଅବା ଛତିଶଗଡରେ ହୋଇଥିବା ନାନ ସ୍କାମରେ ଭାଜପା ନେତାମାନେ ଜଡିତ ନୁହଁନ୍ତି କି?
ତୃତୀୟ ଟୁଇଟରେ ଖାର୍ଗେ ଲେଖିଛନ୍ତି, ୯୫ ପ୍ରତିଶତ ବିରୋଧୀଦଳ ନେତାଙ୍କ ବିରୋଧରେ ଇଡି ଯାଞ୍ଚ୍ ଚାଲିଛି। ମାତ୍ର ସମସ୍ତ ଭାଜପା ନେତା ୱାଶିଂ ମେସିନ ଦ୍ୱାରା ସଫା ହୋଇଯାଇଛନ୍ତି? ଯଦି ଆପଣଙ୍କର ୫୬ ଇଞ୍ଚ ଛାତି ଅଛି ତେବେ ଜେପିସି ଗଠନ କରନ୍ତୁ। ଆଉ ନଅ ବର୍ଷ ମଧ୍ୟରେ ପ୍ରଥମ ଥର ପାଇଁ ଏକ ଖୋଲା ଖବରଦାତା ସମ୍ମିଳନୀ କରନ୍ତୁ।
