ରାୟଗଡ଼ା(ସ୍ବ.ପ୍ର.)/ରାୟଗଡ଼ା ଅଫିସ,୧୪।୧:ରାୟଗଡ଼ା ଜିଲା କାଶୀପୁର ବ୍ଲକ ଅଣ୍ଡିରାକଞ୍ଚ ଅଞ୍ଚଳର ସୁଲବତୀ ନାଏକ(୩୬) କମ୍ପାନିକୁ ନିଜ ଅଧିକାର ମାଗିବାକୁ ଯାଇ ଜେଲଦଣ୍ଡ ଭୋଗିବା ସହ ଗୁରୁତର ଅବସ୍ଥାରେ ଏକ ଶିଶୁପୁତ୍ରକୁ ଜନ୍ମଦେଇ ଆଖିବୁଜିବା ଘଟଣାକୁ ରାୟଗଡ଼ା ଜିଲା ଭାଜପା ନିନ୍ଦା କରିଛି। ସୁଲବତୀଙ୍କୁ ନ୍ୟାୟ ନ ମିଳିଲେ ଦଳ ପକ୍ଷରୁ ଆନ୍ଦୋଳନ କରାଯିବ ଶୁକ୍ରବାର ଆୟୋଜିତ ଖବରଦାତା ସମ୍ମିଳନୀରେ ଭାଜପା ଏସ୍ସି ମୋର୍ଚ୍ଚା ରଷ୍ଟ୍ରୀୟ ଉପାଧ୍ୟକ୍ଷ କାଳିରାମ ମାଝି ଏବଂ ଦଳୀୟ ନେତା ବସନ୍ତ ଉଲାକା ପ୍ରକାଶ କରିଛନ୍ତି।
ଅଣ୍ଡିରାକଞ୍ଚ ଅଞ୍ଚଳର ବିସ୍ଥାପିତ ପରିବାର କାମ ଦାବିରେ ୨୦୨୨ ନଭେମ୍ବର ୧୪ରେ କମ୍ପାନୀ ନିକଟରେ ଧାରଣା ଦେଇଥିଲେ। ହେଲେ ଏ ନେଇ କମ୍ପାନୀ କର୍ତ୍ତୃପକ୍ଷଙ୍କ ଅଭିଯୋଗକୁ ନେଇ ଅଣ୍ଡିରାକଞ୍ଚ ପୋଲିସ ଅମାନବୀୟ ଆଚରଣ କରିଥିଲା। ଘଟଣାସ୍ଥଳରୁ ଆନ୍ଦୋଳନରତ ୧୩ ମହିଳାଙ୍କୁ ଉଠାଇ ଥାନାରେ ଅଟକ ରଖିଥିଲା। ପରେ ଗର୍ଭବତୀ ସୁଲବତୀ ଏବଂ ୪ ନବଜାତ ଶିଶୁଙ୍କ ମାଆ ଗିରଫରୁ ବାଦ୍ ପଡ଼ି ନ ଥିଲେ। ପୋଲିସ ସେମାନଙ୍କୁ ଚିକିତ୍ସାଳୟକୁ ପଠାଇବା ବଦଳରେ ଜେଲ ପଠାଇଥିଲା। ମହିଳାଙ୍କୁ ଉଦ୍ଧାର କରିବା ପାଇଁ ଗ୍ରାମବାସୀ କୋର୍ଟର ଦ୍ୱାରସ୍ଥ ହୋଇଥିଲେ ମଧ୍ୟ ପ୍ରଥମେ ଜାମିନ ମିଳିପାରି ନ ଥିଲା। ଜାନୁୟାରୀ ୧୦ରେ କୋର୍ଟ ସମସ୍ତ ମହିଳାଙ୍କ ଜାମିନ ଆବେଦନକୁ ଗ୍ରହଣ କରି ମଞ୍ଜୁର କରିଥିଲେ। ହେଲେ ରାତି ହୋଇଥିବାରୁ କେହି ଗାଁକୁ ଫେରିପାରି ନ ଥିଲେ। ୧୧ରେ ସେମାନେ ଗାଁକୁ ଫେରିବାକୁ ବାହାରିଥିବା ବେଳେ ସୁଲବତି ପ୍ରସବ ଯନ୍ତ୍ରଣା ଅନୁଭବ କରିଥିଲେ। ତେଣୁ ତାଙ୍କୁ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଥିଲା। ସେଠାରେ ସେ ଏକ ଶିଶୁପୁତ୍ରକୁ ଜନ୍ମ ଦେଇଥିଲେ। ପରେ ମହିଳାଙ୍କ ଅବସ୍ଥା ସଙ୍କଟାପନ୍ନ ହୋଇଥିଲା। ଗୁରୁବାର କୋରାପୁଟ ସ୍ଥାନାନ୍ତର ବେଳେ ତାଙ୍କର ମୃତ୍ୟୁ ଘଟିଥିଲା। ପୋଲିସ କମ୍ପାନୀ ଅଧୀନରେ ରହି ଲୋକଙ୍କୁ ହଇରାଣ କରୁଛି ବୋଲି ଦଳ ପକ୍ଷରୁ ଅଭିଯୋଗ କରାଯାଇଛି। ଉକ୍ତ ଘଟଣାରେ ସମ୍ପୃକ୍ତ ଥାନା ଆଇଆଇସି, ତଦନ୍ତକାରୀ ଅଧିକାରୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନେବା ସହ ସୁଲବତୀଙ୍କ ପରିବାରକୁ ୧ କୋଟି ଟଙ୍କାର କ୍ଷତିପୂରଣ ଦେବାକୁ ଦାବି ହୋଇଛି। ଏଥିସହ ଘଟଣାର ସତ୍ୟତା ଯାଞ୍ଚ ନ କରି ମହିଳାମାନଙ୍କୁ ଗିରଫ କରାଯାଇ ଥିବାରୁ ଏସ୍ପିଙ୍କ ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ନିମନ୍ତେ ଦାବି ହୋଇଛି। ସେହିପରି ଗିରଫ ହୋଇଥିବା ୧୩ ମହିଳାଙ୍କ ଉପରେ ଲଗାଯାଇଥିବା ସମସ୍ତ ମିଥ୍ୟା ମାମଲା ଫେରାଇ ନେବାକୁ ଭାଜପା ଦାବି କରିଛି। ଆୟୋଜିତ ଖବରଦାତା ସମ୍ମିଳନୀରେ ଭାଜପା ଯୁବ ଜନତା ଦଳର ରାଜ୍ୟ କାର୍ଯ୍ୟକାରିଣୀ ଉମେଶ ଖୋସଲାଙ୍କ ସହ ବହୁ କର୍ମୀ ଉପସ୍ଥିତ ଥିଲେ।
