ନୂଆଦିଲ୍ଲୀ,୩।୬: ଗଣତନ୍ତ୍ରର ମହାପର୍ବ ଅର୍ଥାତ ଲୋକ ସଭା ନିର୍ବାଚନ ଶେଷ ହୋଇଛି। ଭୋଟର ଏବେ ନିର୍ବାଚନ ଫଳାଫଳ କ’ଣ ହେବ ତାକୁ ଅପେକ୍ଷା କରିଛନ୍ତି। ନିର୍ବାଚନ କମିଶନ ଭୋଟ ଗଣନା କରିବା ପରେ ସ୍ଥିତି ସ୍ପଷ୍ଟ ହେବ। ଭୋଟଗଣନା ପୂର୍ବରୁ ନିର୍ବାଚନକୁ ନେଇ ଏକଜିଟ୍ ପୋଲ ଜାରି ହୋଇଛି। ପ୍ରାୟ ସମସ୍ତ ପୋଲ୍ରେ ମୋଦି ସରକାର କ୍ଷମତାକୁ ଫେରୁଥିବା କୁହାଯାଇଛି। ଏମିତିରେ ଯଦି ଭୋଟଗଣତି ପରେ ଏହା ସତ ହୁଏ ତେବେ ଦେଶର ଇତିହାସରେ ଦ୍ୱିତୀୟ ଥର ପାଇଁ କୌଣସି ଦଳ ଲଗାତର ତୃତୀୟ ଥର ସରକାର ଗଠନ କରିବେ।
ପ୍ରଧାନମନ୍ତ୍ରୀ ମୋଦି ପୂର୍ବରୁ ନିଜର ତୃତୀୟ କାର୍ଯ୍ୟକାଳକୁ ନେଇ ମନଦଶା ସ୍ପଷ୍ଟ କରିଛନ୍ତି। ସେ ‘ବିକଶିତ ଭାରତ’ ପାଇଁ ସମର୍ପିତ ହେବ। ଏହି କାର୍ଯ୍ୟକାଳରେ ଐତିହାସିକ ନିଷ୍ପତ୍ତି ନିଆଯିବ। ତେବେ ମୋଦି ସରକାର ଏସବୁକୁ ନେଇ କ’ଣ କ’ଣ କରିବାକୁ ଯାଉଛନ୍ତି? ଆସନ୍ତୁ ଜାଣିବା…
-ନିର୍ବାଚନ ପୂର୍ବରୁ ସାକ୍ଷାତକାରରେ ମୋଦି କହିଥିଲେ ଯେ ବିକଶିତ ଭାରତକୁ ନେଇ ସମସ୍ତ ମନ୍ତ୍ରଣାଳୟରୁ ରିପୋର୍ଟ ମଗାଯାଇଛି। ତାଙ୍କୁ ୧୦୦ ଦିନର ଏଜେଣ୍ଡା ସହ ପ୍ରସ୍ତୁତ ରହିବାକୁ କୁହାଯାଇଛି।
-Speed,Scale,Scope ଏବଂ Standards, ଏହି ଚାରୋଟି କ୍ଷେତ୍ରରେ ଦ୍ରୁତ ଗତିରେ କାମ କରିବାକୁ ହେବ। ଆମକୁ ଉତ୍ପାଦନ ସହ କ୍ୱାଲିଟି ଉପରେ କାମ କରିବାକୁ ହେବ। ଏଥିସହ zero defect-zero effect ମନ୍ତ୍ର ମନେ ରଖିବାକୁ ହେବ। ଦେଶବାସୀଙ୍କୁ ମଧ୍ୟ ମୋଦି ଆଗାମୀ ୨୫ ବର୍ଷ ଦେଶକୁ ସମର୍ପିତ କରିବାକୁ ଅପିଲ କରିଛନ୍ତି।
-ମୋଦିଙ୍କ ତୃତୀୟ କାର୍ଯ୍ୟକାଳରେ ଭାରତ ବିଶ୍ୱର ତୃତୀୟ ସର୍ବବୃହତ୍ତ ଅର୍ଥବ୍ୟବସ୍ଥା ହେବା ପ୍ରତି ସମର୍ପିତ ହେବ। ଏନେଇ ଚାଇନା ଖବରକାଗତ ଗ୍ଲୋବାଲ ଟାଇମ୍ଦରେ ଉଲ୍ଲେଖ ରହିଛି। ନିର୍ବାଚନ ଜିତିବା ପରେ ପ୍ରଧାନମନ୍ତ୍ରୀଙ୍କ ନଜର କିଛି ବର୍ଷରେ ଦେଶକୁ ଆମେରିକା ଏବଂ ଚାଇନା ପରେ ତୃତୀୟ ଅର୍ଥବ୍ୟବସ୍ଥା କରିବା ଉପରେ ରହିବ। ଏଣୁ ମୋଦି ରଣନୀତି ଏବଂ କୁଟନୀତି ମାଧ୍ୟମରେ ବିଶ୍ୱସ୍ତରରେ ପ୍ରଭାବ ପକାଇବାକୁ ଚେଷ୍ଟା କରିବେ।
-ମୋଦି ସରକାରଙ୍କ ତୃତୀୟ କାର୍ଯ୍ୟକାଳର ପ୍ରାରମ୍ଭିକ ୧୨୫ ଦିନ ଗୁରୁତ୍ୱପୂର୍ଣ୍ଣ। ଏନେଇ ପ୍ରଧାନମନ୍ତ୍ରୀ ବହୁବାର ଉଲ୍ଲେଖ କରିଛନ୍ତି। ସରକାର ଗଠନ ପରେ କ’ଣ କରାଯିବ ତାର ରୋଡମ୍ୟାପ୍ ପ୍ରସ୍ତୁତ କରାଯାଇଛି। ୨୫ ଦିନ ବିଶେଷ ଭାବେ ଯୁବଗୋଷ୍ଠୀ ପାଇଁ ରଖାଯାଇଛି। ଆଗାମୀ ୫ ବର୍ଷରେ କେଉଁ କେଉଁ ବଡ଼ ନିଷ୍ପତ୍ତି ନିଆଯିବ, ତାର କାୟାକଳ୍ପ ପ୍ରସ୍ତୁତ କରାଯାଇ ସାରିଛି।
-ମୋଦି ସରକାରଙ୍କ ତୃତୀୟ କାର୍ଯ୍ୟକାଳରେ ପେଟ୍ରୋଲ-ଡିଜେଲକୁ ନେଇ ବଡ଼ ନିଷ୍ପତ୍ତି ନିଆଯାଇପାରେ। ଏନେଇ ରାଜନୀତି ବିଶେଷଜ୍ଞ ପ୍ରଶାନ୍ତ କୁମାର ପ୍ରଥମରୁ ସଙ୍କେତ ଦେଇଛନ୍ତି। ପେଟ୍ରୋଲିୟମ ଉତ୍ପାଦଗୁଡ଼ିକୁ ଜିଏସ୍ଟି ଅଧୀନକୁ ଆଣିବା ଲାଗି ଦୀର୍ଘଦିନରୁ ଦାବି ହେଉଛି। ଏଣୁ ଏହା ଆଗାମୀ ଦିନରେ ହୋଇପାରେ।
-ଶକ୍ତି କ୍ଷେତ୍ରରେ ଆତ୍ମନିର୍ଭରତା!
ମୋଦି ସରକାରଙ୍କ ତୃତୀୟ କାର୍ଯ୍ୟକାଳରେ ଭାରତ ଶକ୍ତି କ୍ଷେତ୍ରରେ ଆତ୍ମନିର୍ଭର ହୋଇପାରେ। ଏହାକୁ ଭାଜପା ସରକାର ନିଜର ମାନିଫେଷ୍ଟୋରେ ସାମିଲ କରିଛି। ମୋଦି ପୂର୍ବରୁ କହିସାରିଛନ୍ତି ଯେ ପିଏମ୍ ସୂର୍ଯ୍ୟ ଘର ଯୋଜନା ଏବଂ ଜିରୋ ବିଜୁଳି ବିଲ ସରକାରଙ୍କ ଲକ୍ଷ୍ୟ। ଏଣୁ ସୌର ଶକ୍ତି ଉପରେ ଗୁରୁତ୍ୱ ଦିଆଯାଇପାରେ।
-ପିଓକେକୁ ନେଇ ବଡ଼ ନିଷ୍ପତ୍ତି:
ଭୋଟଗଣନା ପରେ ଯଦି ନରେନ୍ଦ୍ର ମୋଦି ସରକାର ପୁଣି ଥରେ କ୍ଷମତାକୁ ଆସନ୍ତି ପିଓକେ ପ୍ରସଙ୍ଗରେ ବଡ଼ ନିଷ୍ପତ୍ତି ନିଆଯାଇପାରେ। ନିର୍ବାଚନ ପ୍ରଚାର ସମୟରେ ଭାଜପା ନେତାମାନଙ୍କ ପକ୍ଷରୁ ବୟାନବାଜି କରାଯାଇଥିଲା। ଉତ୍ତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ମୋଦି ସରକାର କ୍ଷମତାକୁ ଆସିବାର କିଛି ମାସ ପରେ ପିଓକେକୁ ଫେରାଇ ଅଣାଯିବ ବୋଲି କହିଥିଲେ।
