ଦୁବାଇ,୨୨ା୩: ଆଇସିସି ଦିନିକିଆ ବୋଲର ର଼୍ୟାଙ୍କିଙ୍ଗ୍ରେ ପ୍ରଥମ ସ୍ଥାନରେ ରହିଥିବା ମହମ୍ମଦ ସିରାଜ ତୃତୀୟ ସ୍ଥାନକୁ ଖସିଛନ୍ତି। ଅଷ୍ଟ୍ରେଲିଆର ଜୋଶ ହେଜେଲଉଡ୍ ଆଇସିସି ର଼୍ୟାଙ୍କିଙ୍ଗ୍ରେ ପ୍ରଥମ ସ୍ଥାନକୁ ଉଠିଛନ୍ତି। ଅନ୍ୟତମ ଅଷ୍ଟ୍ରେଲୀୟ ବୋଲର ମିଚେଲ୍ ଷ୍ଟାର୍କ ପ୍ରଥମ ଦୁଇ ଦିନିକିଆରେ ୮ ଉଇକେଟ ଅକ୍ତିଆର କରିବା ସହିତ ଯୁଗ୍ମ ତୃତୀୟ ସ୍ଥାନ ହାସଲ କରିଛନ୍ତି। ପ୍ରଥମ ଦିନିକିଆରେ ସିରାଜ ୩/୨୯ର ଫିଗର ହାସଲ କରିଥିବା ବେଳେ ଦ୍ୱିତୀୟ ଦିନିକିଆରେ ୩ ଓଭରରେ ୩୭ ରନ୍ ବ୍ୟୟ କରିବା ସହ ପ୍ରଥମ ସ୍ଥାନ ହରାଇଥିଲେ। ଜାନୁୟାରୀ ମାସରେ ପ୍ରଥମ ଥର ପାଇଁ ସିରାଜ ଏକ ନମ୍ବର ବୋଲରର ମାନ୍ୟତା ହାସଲ କରିଥିଲେ। ଭାରତ ବିପକ୍ଷ ଦିନିକିଆ ସିରିଜରୁ ବାଦ୍ ପଡିଥିବା ହେଜେଲଉଡଙ୍କର ଏହା କ୍ୟାରିୟର ଶ୍ରେଷ୍ଠ ର଼୍ୟାଙ୍କିଙ୍ଗ। ଜୁନ୍ ୨୦୧୭ରେ ପ୍ରଥମ ଥର ପାଇଁ ଆଇସିସି ର଼୍ୟାଙ୍କିଙ୍ଗରେ ଦ୍ୱିତୀୟ ସ୍ଥାନ ହାସଲ କରିଥିଲେ। ୨୦୨୨ ଯାଏ ସେ ଏହି ର଼୍ୟାଙ୍କିଙ୍ଗ ବଜାୟ ରଖିଥିବା ବେଳେ କ୍ୟାରିୟରରେ ପ୍ରଥମ ଥର ପାଇଁ ଏକ ନମ୍ବରରେ ପହଞ୍ଚିଛନ୍ତି। ଭାରତୀୟ ବୋଲର ମହମ୍ମଦ ଶାମି ୫ସ୍ଥାନ ଉପରକୁ ଉଠି ୨୮ତମ ସ୍ଥାନରେ ପହଞ୍ଚିଛନ୍ତି।
ପ୍ରଥମ ଦିନିକିଆରେ ଅପରାଜିତ ୭୫ ରନ୍ର ଇନିଂସ ଖେଳିଥିବା ଲୋକେଶ ରାହୁଲ ୩ ସ୍ଥାନ ଉପରକୁ ଉଠି ୩୯ ତମ ସ୍ଥାନରେ ପହଞ୍ଚିଛନ୍ତି। ଶୁବମାନ ଗିଲ୍ ଶ୍ରେଷ୍ଠ ଭାରତୀୟ ଭାବେ ପଞ୍ଚମ ସ୍ଥାନରେ ରହିଥିବା ବେଳେ ବିରାଟ କୋହଲି ସପ୍ତମ ସ୍ଥାନରେ ରହିଛନ୍ତି। ନ୍ୟୁଜିଲାଣ୍ଡର କେନ୍ ଓ୍ବିଲିୟମସନ୍ ଟେଷ୍ଟ ବ୍ୟାଟରଙ୍କ ର଼୍ୟାଙ୍କିଙ୍ଗରେ ଦ୍ୱିତୀୟ ସ୍ଥାନକୁ ଉନ୍ନୀତ ହୋଇଛନ୍ତି। ଶ୍ରୀଲଙ୍କା ବିପକ୍ଷରେ ସେ ୧, ୧୨୧ ଓ ୨୧୫ ରନ୍ର ଇନିଂସ ଖେଳିଥିଲେ। ମାର୍ନସ ଲାବୁଶେନ୍ ପ୍ରଥମ ସ୍ଥାନ ବଜାୟ ରଖିଥିବା ବେଳେ ଷ୍ଟିଭ୍ ସ୍ମିଥ୍ ତୃତୀୟ ସ୍ଥାନକୁ ଖସିଛନ୍ତି। ଦ୍ୱିଶତକ ହାସଲ କରିଥିବା ହେନରୀ ନିକୋଲ୍ସ ୨୦ ସ୍ଥାନ ଉପରକୁ ଉଠି ୨୭ ତମ ସ୍ଥାନରେ ପହଞ୍ଚିଥିବା ବେଳେ ଶ୍ରୀଲଙ୍କା ଅଧିନାୟକ ଦିମୁଥ କରୁଣାରତ୍ନେ ୧୦ମ ସ୍ଥାନରେ ଅଛନ୍ତି।
