ନୂଆଦିଲ୍ଲୀ,୧୧।୩: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ସୋମବାର ରାଜଧାନୀ ଦିଲ୍ଲୀର ପୁସାସ୍ଥିତ ଜାତୀୟ କୃଷି ଅନୁସନ୍ଧାନ ପ୍ରତିଷ୍ଠାନରେ ‘ସଶକ୍ତ ମହିଳା-ବିକଶିତ ଭାରତ’ କାର୍ଯ୍ୟକ୍ରମରେ ଅଂଶଗ୍ରହଣ କରିଛନ୍ତି। ଏହା ସହିତ ପ୍ରଧାନମନ୍ତ୍ରୀ ମୋଦି ‘ନମୋ ଡ୍ରୋନ ଦିଦି’ ପକ୍ଷରୁ କୃଷି କ୍ଷେତ୍ରରେ ଡ୍ରୋନର ବ୍ୟବହାରକୁ ଦେଖିଥିଲେ। ଏହି କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ମୋଦି କହିଛନ୍ତି, ମୁଁ ମହିଳା ସଶକ୍ତିକରଣ ବିଷୟରେ କହେ, କଂଗ୍ରେସ ଭଳି ଦଳ ମୋତେ ପରିହାସ କରିଥିଲେ ଏବଂ ଅପମାନିତ କରିଥିଲେ।ଗତ ୧୦ ବର୍ଷ ମଧ୍ୟରେ ଭାରତରେ ମହିଳା ସ୍ବୟଂ ସହାୟକ ଗୋଷ୍ଠୀ କିପରି ବିସ୍ତାର କରିଛନ୍ତି ତାହା ନିଜେ ଅଧ୍ୟୟନର ବିଷୟ ଅଟେ। ଏହି ମହିଳା ସ୍ବୟଂ ସହାୟକ ଗୋଷ୍ଠୀ ଭାରତରେ ମହିଳା ସଶକ୍ତିକରଣର ଏକ ନୂତନ ଇତିହାସ ସୃଷ୍ଟି କରିଛନ୍ତି।
ମହିଳାମାନଙ୍କ ସହ ଜଡିତ ଯୋଜନା ବିଷୟରେ କଥାବାର୍ତ୍ତା କରୁଥିବାବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତାଙ୍କର ୫ଟି କାର୍ଯ୍ୟ ବିଷୟରେ ଉଲ୍ଲେଖ କରିଛନ୍ତି ଏବଂ ୫ ଥର କହିଛନ୍ତି ଯେ, ମୁଁ ଦେଶର ପ୍ରଥମ ପ୍ରଧାନମନ୍ତ୍ରୀ ଅଟେ। ପ୍ରଧାନମନ୍ତ୍ରୀ ମୋଦି କହିଛନ୍ତି, ମୁଁ ଦେଶର ପ୍ରଥମ ପ୍ରଧାନମନ୍ତ୍ରୀ ଯିଏ ଶୌଚାଳୟ ବିଷୟରେ କଥାବାର୍ତ୍ତା କରିଛି। ମୁଁ ଦେଶର ପ୍ରଥମ ପ୍ରଧାନମନ୍ତ୍ରୀ, ଯିଏ ସାନିଟାରୀ ନାପକିନର ଆବଶ୍ୟକତା ବିଷୟରେ କହିଛି। ମୁଁ ଦେଶର ପ୍ରଥମ ପ୍ରଧାନମନ୍ତ୍ରୀ, ଯିଏ କାଠ ଧୂଆଁ ହେତୁ ଭଉଣୀମାନେ ସମ୍ମୁଖୀନ ହେଉଥିବା ସମସ୍ୟା ବିଷୟରେ କହିଛି, ମୁଁ ଦେଶର ପ୍ରଥମ ପ୍ରଧାନମନ୍ତ୍ରୀ, ଯିଏ ଟ୍ୟାପ ଜଳ ବିଷୟରେ କଥାବାର୍ତ୍ତା କରିଛି, ମୁଁ ଦେଶର ପ୍ରଥମ ପ୍ରଧାନମନ୍ତ୍ରୀ, ଯିଏ ମହିଳା ସଶକ୍ତିକରଣ ବିଷୟରେ କହିଛି।
ପ୍ରଧାନମନ୍ତ୍ରୀ ମୋଦି ତାଙ୍କ ଅଭିଭାଷଣରେ କଂଗ୍ରେସ ସମେତ ଅନ୍ୟ ବିରୋଧୀ ଦଳ ଉପରେ ମଧ୍ୟ ଆକ୍ରମଣ କରିଥିଲେ। ସେ କହିଛନ୍ତି, ଆଜି ମୁଁ ଦେଶର ପ୍ରତ୍ୟେକ ମହିଳା, ଭଉଣୀ,ଝିଅଙ୍କୁ ଏହା କହିବାକୁ ଚାହେଁ। ଯେତେବେଳେ ବି ମୁଁ ଲାଲକିଲ୍ଲାରୁ ଆପଣମାନଙ୍କ ସଶକ୍ତିକରଣ ବିଷୟରେ କଥାବାର୍ତ୍ତା କଲି, ଦୁର୍ଭାଗ୍ୟବଶତଃ କଂଗ୍ରେସ ପରି ରାଜନୈତିକ ଦଳ ମୋତେ ପରିହାସ କଲେ ଏବଂ ମୋତେ ଅପମାନିତ କଲେ। ଗତ ୧୦ ବର୍ଷ ମଧ୍ୟରେ ଭାରତରେ ମହିଳା ସ୍ବୟଂ ସହାୟକ ଗୋଷ୍ଠୀ କିପରି ବିସ୍ତାର କରିଛନ୍ତି ତାହା ନିଜେ ଅଧ୍ୟୟନର ବିଷୟ ଅଟେ। ଏହି ମହିଳା ସ୍ବୟଂ ସହାୟକ ଗୋଷ୍ଠୀ ଭାରତରେ ମହିଳା ସଶକ୍ତିକରଣର ଏକ ନୂତନ ଇତିହାସ ସୃଷ୍ଟି କରିଛନ୍ତି।
