ନନ୍ଦପୁର, ୧୯ା୧୧(ଶଙ୍କର ପୂଜାରୀ): ବିବାହର ୩ ବର୍ଷ ବିତିଯାଇଥିଲେ ମଧ୍ୟ ସ୍ବାମୀ ଗତ ଦଶହରା ଦିନ ଅନ୍ୟ ଜଣଙ୍କୁ ବିବାହ କଲେ। ଏହାର ପ୍ରତିବାଦ କରିବାରୁ ଗ୍ରାମବାସୀଙ୍କ ସମ୍ମୁଖରେ ସ୍ବାମୀ ଅର୍ଜୁନ ମୁଦୁଲି, ଶାଶୁ, ଶଶୁର, ନଣନ୍ଦ ଓ ଦିଅର ମିଶି ତାଙ୍କୁ ଗାଳିଗୁଲଜ କରି ମାଡ଼ ମାରିଲେ। ଏବେ ସେମାନେ ତାଙ୍କୁ ଜୀବନରେ ମାରିଦେବାକୁ ଧମକ ଦେଉଛନ୍ତି। ଶେଷରେ ଦେଢ଼ ବର୍ଷର ଝିଅକୁ ଧରି ନନ୍ଦପୁର ଥାନାକୁ ଯାଇ ଘଟଣା ସମ୍ପର୍କରେ ଗତ ବୁଧବାର ଏତଲା ଦେଇଥିଲି। ଗାଳି ମାଡ ମାରିବା ସମୟର ସାକ୍ଷ୍ୟଙ୍କ ନାମ ଓ ସ୍ବାମୀଙ୍କ ଫୋନ ନମ୍ବର ଦେଇଥିଲି। ମାତ୍ର ତାଙ୍କ ଅଭିଯୋଗକୁ ୫ଦିନ ବିତି ଯାଇଥିଲେ ମଧ୍ୟ ପୋଲିସ ଏଯାଏ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରିନାହିଁ ବୋଲି ଉମ୍ବେଲ ପଞ୍ଚାୟତ ଡୁମୁରିପୁଟ ଗ୍ରାମର ଅର୍ଜୁନଙ୍କ ସ୍ତ୍ରୀ ସୁବର୍ଣ୍ଣା ମୁଦୁଲି ଅଭିଯୋଗ ଆଣିଛନ୍ତି।
ମୋତେ ନ୍ୟାୟ ମିଳୁ। ଏଭଳି ଦାବିକରି ରବିବାର ସୁବର୍ଣ୍ଣା ତାଙ୍କ ବାପା ମହେନ୍ଦ୍ର ଶିଶା, ମାଆ ଭଗବତୀଙ୍କ ସହ ନନ୍ଦପୁର ଥାନା ସମ୍ମୁଖରେ ଧାରଣାରେ ବସିଥିଲେ। ଖବର ପାଇ ଏସଡିପିଓ ସଞ୍ଜୟ ମହାପାତ୍ର, ଥାନା ଅଧିକାରୀ ଆଶ୍ରିତା ଖାଲକୋ, ଏସ୍ଆଇ ବେଦୋବର ସାହୁ, ଦୀପ୍ତିମୟି ଧାରୁଆ ପ୍ରମୁଖ ଧାରଣା ସ୍ଥଳରେ ପହଞ୍ଚି ସୁବର୍ଣ୍ଣା ଓ ତାଙ୍କ ମାଆବାପାଙ୍କ ସହ ଆଲୋଚନା କରିଥିଲେ। ତୁରନ୍ତ ମାମଲା ରୁଜୁ କରି ଏହାର ତଦନ୍ତ କରିବାକୁ ଏସ୍ଡିପିଓ ମହାପାତ୍ର ଥାନା ଅଧିକାରୀ ଖାଲକୋଙ୍କୁ ନିର୍ଦ୍ଦେଶ ଦେଇଥିଲେ।
ଘଟଣାଟି ପାରିବାରିକ ମାମଲା ହୋଇଥିବାରୁ ଏବଂ ଆରୋପ ପ୍ରତ୍ୟାରୋପ ଭଳି ଦୁଇ ପରିବାର ପକ୍ଷରୁ ଏତଲା ହୋଇଥିବାରୁ ଦୁଇ ପକ୍ଷଙ୍କୁ ଡାକି କିଛି ଗୋଟେ ସମାଧାନର ରାସ୍ତା ବାହାର କରାଯିବ ବୋଲି ପୋଲିସ ପ୍ରକାଶ କରିଛି। ଅନ୍ୟପକ୍ଷରେ ରବିବାର ୨ଟି ମାମଲା ରୁଜୁ କରାଯାଇଛି। ସ୍ବାମୀ ଅର୍ଜୁନ, ବାପା ଧନପତି ମୁଦୁଲି, ମା’ ଯମୁନା, ଦିଅର ଭଗବାନ ଓ ନଣନ୍ଦ ଚୁମୁକିଙ୍କୁ ଥାନାକୁ ଅଣାଯିବାକୁ ବ୍ୟବସ୍ଥା କରାଯାଇଛି। ପୂର୍ବରୁ ଅର୍ଜୁନ ଘରେ ନ ଥିବାରୁ ତାଙ୍କୁ ଡାକି ଆଲୋଚନା କରିବା ଓ ମାମଲା ରୁଜୁ କରିବାରେ ବିଳମ୍ବ ହୋଇଛି ବୋଲି ଥାନା ଅଧିକାରୀ ଖାଲକୋ କହିଛନ୍ତି। ଧାରଣା ସ୍ଥଳରେ ସୁବର୍ଣ୍ଣଙ୍କ ନିକଟରେ ହିକିମପୁଟ ସରପଞ୍ଚ, ସମିତି ସଭ୍ୟ ଓ କେତେଜଣ ଗ୍ରାମବାସୀ ଉପସ୍ଥିତ ଥିଲେ।
