ନୂଆଦିଲ୍ଲୀ,୯।୧୦: ବରିଷ୍ଠ ଭାରତୀୟ ଦ୍ରୁତ ବୋଲର ମହମ୍ମଦ ଶାମି ଶେଷରେ ତାଙ୍କର ନୀରବତା ଭାଙ୍ଗିଛନ୍ତି। ଅଷ୍ଟ୍ରେଲିଆ ବିପକ୍ଷରେ ଦିନିକିଆ ସିରିଜ ପାଇଁ ଟିମ ଇଣ୍ଡିଆର ଦଳରୁ ବାଦ ପଡ଼ିବା ପରେ, ଶାମି ସ୍ପଷ୍ଟ ଭାବରେ କହିଛନ୍ତି, ଫିଟନେସ ତାଙ୍କର ପ୍ରସଙ୍ଗ ନୁହେଁ, କିନ୍ତୁ ଏହି ଚୟନ ସମ୍ପୂର୍ଣ୍ଣ ଭାବରେ ଟିମ ମ୍ୟାନେଜମେଣ୍ଟର ନିଷ୍ପତ୍ତି। ୨୦୨୫ ଚାମ୍ପିଅନ୍ସ ଟ୍ରଫିରୁ ଅନ୍ତର୍ଜାତୀୟ ଦଳରୁ ବାହାରେ ଥିବା ଶାମି ଏବେ ଘରୋଇ କ୍ରିକେଟ ମାଧ୍ୟମରେ ଟିମ ଇଣ୍ଡିଆକୁ ଫେରିବାକୁ ପ୍ରସ୍ତୁତ ହେଉଛନ୍ତି।
ତାଙ୍କ ୟୁଟ୍ୟୁବ ଚ୍ୟାନେଲରେ ଶାମି କହିଛନ୍ତି, ଅନେକ ଲୋକ ପଚାରୁଛନ୍ତି ଯେ ମୋତେ ଅଷ୍ଟ୍ରେଲିଆ ସିରିଜ ପାଇଁ କାହିଁକି ଚୟନ କରାଗଲା ନାହିଁ। ମୁଁ କେବଳ ଏତିକି କହିବି ଯେ, ଚୟନ ମୋ ହାତରେ ନାହିଁ। ଏହା ଚୟନକାରୀ, ପ୍ରଶିକ୍ଷକ ଗୌତମ ଗମ୍ଭୀର ଏବଂ ଅଧିନାୟକ ଶୁବମନ ଗିଲଙ୍କ ନିଷ୍ପତ୍ତି। ଯଦି ସେମାନେ ଭାବନ୍ତି ଯେ, ମୁଁ ଦଳ ପାଇଁ ପ୍ରସ୍ତୁତ। ମୁଁ ନିରନ୍ତର ଅଭ୍ୟାସ କରୁଛି ଏବଂ ସମ୍ପୂର୍ଣ୍ଣ ପ୍ରସ୍ତୁତ ଅଛି।
ଶାମି କହିଛନ୍ତି, ତାଙ୍କ ଫିଟନେସ ବିଷୟରେ ସୋସିଆଲ ମିଡିଆରେ ପ୍ରସାରିତ ଗୁଜବ ଭିତ୍ତିହୀନ। ଅନେକ ଗୁଜବ ଏବଂ ମିମ୍ସ ଚାଲିଛି, କିନ୍ତୁ ମୋର ଫିଟନେସ ସମ୍ପୂର୍ଣ୍ଣ ଠିକ ଅଛି। ମୁଁ ପ୍ରତିଦିନ କଠିନ ପରିଶ୍ରମ କରୁଛି ଏବଂ ମୋ ଶରୀର ଉପରେ କାମ କରୁଛି।
୨୦୨୫ ପ୍ରାରମ୍ଭରେ ଅନ୍ତର୍ଜାତୀୟ କ୍ରିକେଟକୁ ଫେରିବା ପରଠାରୁ ମହମ୍ମଦ ଶାମିଙ୍କ ପ୍ରଦର୍ଶନ ଖରାପ ରହିଛି। ସେ ଏହି ବର୍ଷ ୧୧ଟି ଦିନିକିଆରେ ୧୧ଟି ଉଇିକେଟ ନେଇଥିଲେ। ତାଙ୍କ ହାରାହାରି ୩୦.୬୩ ଥିଲା। ଏହା ବ୍ୟତୀତ, ଆଇପିଏଲ ୨୦୨୫ ସିଜିନ୍ରେ ଶାମିଙ୍କ ପ୍ରଦର୍ଶନ ମଧ୍ୟ ଦୁର୍ବଳ ଥିଲା। ସନରାଇଜର୍ସ ହାଇଦ୍ରାବାଦ ପାଇଁ ଖେଳି ସେ ୯ଟି ମ୍ୟାଚ୍ରେ କେବଳ ୬ଟି ଉଇକେଟ ନେଇଥିଲେ। ଏହା ଫଳରେ ଚୟନକର୍ତ୍ତାମାନେ ତାଙ୍କୁ ଇଂଲଣ୍ଡ ଟେଷ୍ଟ ଏବଂ ଅଷ୍ଟ୍ରେଲିଆ ଏ ବିପକ୍ଷ ମ୍ୟାଚ୍ରୁ ବାଦ ଦେଇଥିଲେ।
ଶାମି କହିଛନ୍ତି, ନିକଟରେ ଦୁଲୀପ ଟ୍ରଫିରେ ପୂର୍ବ ଜୋନ ପାଇଁ ଖେଳିଥିଲେ ଏବଂ ପ୍ରାୟ ୩୫ ଓଭର ବୋଲିଂ କରିଥିଲେ। ମୋର ଲୟ ଏବଂ ଫିଟନେସ ଭଲ ଥିଲା। ମୁଁ ଭାବୁନାହିଁ ଯେ ମୁଁ କୌଣସି କ୍ଷେତ୍ରରେ ପଛରେ ଅଛି। କ୍ଷେତ୍ରରୁ ଦୂରେଇ ରହିବା ପ୍ରତ୍ୟେକ ଖେଳାଳିଙ୍କ ପାଇଁ କଷ୍ଟକର, କିନ୍ତୁ ମୁଁ ଉତ୍ସାହିତ ଏବଂ ପୁନରାଗମନ ପାଇଁ କଠିନ ପରିଶ୍ରମ କରିବି।
ଯଦିଓ ବିସିସିଆଇର ବର୍ତ୍ତମାନର ଚୟନ ନୀତିରେ ଶାମିଙ୍କ ନାମ ‘ସ୍କିମ୍ ଅଫ୍ ଥିଙ୍ଗ୍ସ’ ବାହାରେ ଥିବା ପରି ମନେ ହେଉଛି। ଦଳ ପରିଚାଳନା ବର୍ତ୍ତମାନ ଯୁବ ଦ୍ରୁତ ବୋଲରଙ୍କ ଉପରେ ନିର୍ଭର କରୁଛି, କିନ୍ତୁ ଯଦି ଶାମି ଘରୋଇ କ୍ରିକେଟରେ ସ୍ଥିର ପ୍ରଦର୍ଶନ କରନ୍ତି, ତେବେ ଆଗାମୀ ମାସଗୁଡ଼ିକରେ ଟି-୨୦ କିମ୍ବା ଟେଷ୍ଟ ଦଳକୁ ଫେରିବା ସମ୍ଭବ ହୋଇପାରେ।
Dharitri – Odisha’s No.1, Most Trusted Odia Daily
