ହାଇଦ୍ରାବାଦ,୩ା୫: ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ରେ ଗୁରୁବାର ରାଜସ୍ଥାନ ରୟାଲ୍ସ ବିପକ୍ଷରେ ୧ ରନ୍ର ରୋମାଞ୍ଚକ ବିଜୟ ହାସଲ କରିଛି ସନ୍ରାଇଜର୍ସ ହାଇଦ୍ରାବାଦ। ପ୍ରଥମେ ବ୍ୟାଟିଂ କରି ସନରାଇଜର୍ସ ୨୦ ଓଭରରେ ୩ ଉଇକେଟ ହରାଇ ୨୦୧ ରନ୍ ସଂଗ୍ରହ କରିଥିଲା। ଜବାବରେ ରାଜସ୍ଥାନ ୭ ଉଇକେଟ ହରାଇ ୨୦୦ ରନ୍ କରିଥିଲା।
ଟସ୍ ଜିତି ସନରାଇଜର୍ସ ହାଇଦ୍ରାବାଦ ପ୍ରଥମେ ବ୍ୟାଟିଂ କରିଥିଲା। ରାଜସ୍ଥାନ ଚମତ୍କାର ବୋଲିଂ କରି ହାଇଦ୍ରାବାଦକୁ ପାଓ୍ବାର ପ୍ଲେରେ ୩୭/୨ରେ ସୀମିତ ରଖିଥିଲା। ୩୫ରନରେ ଦ୍ୱିତୀୟ ଉଇକେଟର ପତନ ଘଟିବା ପରେ ନୀତୀଶ ରେଡ୍ଡୀ(୭୬*) ଓ ଟ୍ରାଭିସ୍ ହେଡ୍(୫୮) ତୃତୀୟ ଉଇକେଟରେ ୯୬ ରନ୍ ଯୋଡିଥିଲେ। ହେଡ୍ ୪୪ ବଲ୍ ଖେଳି ୬ ଚୌକା ଓ ୩ ଛକା ମାରିଥିଲେ। ନୀତୀଶ ୪୨ ବଲ୍ ଖେଳି ୩ ଚୌକା ଓ ୮ ଛକା ମାରିଥିଲେ। ହେଡ୍ ଆଉଟ ହେବା ପରେ ହେନରିଚ୍ କ୍ଲାସେନ୍(୪୨*)ଙ୍କ ସହ ମିଶି ଚତୁର୍ଥ ଉଇକେଟରେ ୭୦ ରନ୍ ଯୋଡିଥିଲେ ନୀତୀଶ। ରାଜସ୍ଥାନ ପକ୍ଷରୁ ଆଭେଶ୍ ଖାନ୍ ୨ ଓ ସନ୍ଦୀପ ଶର୍ମା ୧ ଉଇକେଟ ନେଇଥିଲେ। ୨୦୨ ରନ୍ର ପିଛା କରି ରାଜସ୍ଥାନ ପ୍ରଥମ ଓଭରରେ ୨ ଉଇକେଟ ହରାଇଥିଲା। ତେବେ ରିୟାନ ପରାଗ(୭୭) ଓ ଯଶସ୍ବୀ ଜୟସ୍ବାଲ(୬୭) ତୃତୀୟ ଉଇକେଟରେ ୧୩୪ ରନ୍ ଯୋଡିଥିଲେ। ଉଭୟ ଖେଳାଳି ଆଉଟ ହେବା ପରେ ରାଜସ୍ଥାନ ଇନିଂସ ଦିଗହରା ହୋଇ ଯାଇଥିଲା। ଅନ୍ତିମ ଓଭରରେ ୧୩ ରନ୍ ଆବଶ୍ୟକ ଥିବା ବେଳେ ପ୍ରଥମ ୫ ବଲରୁ ରୋଭମାନ ପାଓ୍ବେଲ ୧୧ ରନ୍ କରିଥିଲେ। ଶେଷ ବଲରେ ୨ ରନ୍ ଆବଶ୍ୟକ ଥିବା ବେଳେ ଏକ ଫୁଲଟସ୍ ବଲରେ ଲେଗ ବିଫୋର ହୋଇଥିଲେ ପାଓ୍ବେଲ। ହାଇଦ୍ରାବାଦ ପକ୍ଷରୁ ଭୁବନେଶ୍ୱର କୁମାର ୩, ପ୍ୟାଟ୍ କୁମିନ୍ସ ଓ ଟି. ନଟରାଜନ ୨ଟି ଲେଖାଏ ଉଇକେଟ ନେଇଥିଲେ।
