ବରଗଡ଼,୧୦।୧୨(ପ୍ରେମାନନ୍ଦ ଖମାରୀ): ସ୍ଥାନୀୟ କ୍ରିଷ୍ଣା ବିକାଶ ଗ୍ରାଉଣ୍ଡରେ ଚାଲିଥିବା ଓଡ଼ିଶା ବିପକ୍ଷ ୧୯ବର୍ଷରୁ କମ୍ କୁଚ୍ ବିହାର ଟ୍ରଫି କ୍ରିକେଟ ଏଲିଟ୍ ଗ୍ରୁପ୍ ଲିଗ୍ ମ୍ୟାଚ୍ର ମ୍ୟାଚରେ ହାଇଦ୍ରାବାଦ ବିଶାଳ ସ୍କୋର ଆଡ଼କୁ ଅଗ୍ରସର ହୋଇଛି। ଦଳ ଶନିବାର ଦ୍ୱିତୀୟ ଦିବସ ଖେଳ ଶେଷ ସୁଦ୍ଧା ୬ଉଇକେଟ୍ ବିନିମୟରେ ୪୦୩ ରନ କରିଛି। ହାଇଦ୍ରାବାଦ ପ୍ରଥମ ଦିବସର ଅସମାପ୍ତ ସ୍କୋର ୪୯/୧ରୁ ଖେଳ ଆରମ୍ଭ କରିଥିଲା।
ୱାଫି କାଚ୍ଛି ଡାଇମଣ୍ଡ ଏବଂ ଆର୍. ଅଲଙ୍କ୍ରିତ ଓଡ଼ିଶା ବୋଲରଙ୍କ ଉପରେ ଆଧିପତ୍ୟ ବିସ୍ତାର କରି କରି ରନ ସଂଗ୍ରହ କରି ଚାଲିଥିଲେ। ଶନିବାର ଖେଳରେ ପ୍ରଥମେ ୱାଫି କାଚ୍ଛିଙ୍କ ଉଇକେଟ ପତନ ଘଟିଥିଲା। ଓଡ଼ିଶାର ଦ୍ରୁତ ବୋଲର ସମ୍ବିତ ବେଜାଙ୍କ ବଲ୍ରେ ସେ ଶିକାର ହୋଇଥିଲେ। ଏହାପରେ ଅଲଙ୍କ୍ରିତଙ୍କ ସହ ଆର୍ବାଜ୍ ବେଗ୍ ଯୋଗଦେଇଥିଲେ। ସେ ୫ଚୌକା ସହିତ ସେ ୫୨ରନ କରି ସାର୍ଥକ ପଣ୍ଡାଙ୍କ ବଲରେ ଆଉଟ୍ ହୋଇଥିଲେ। ଏହାପରେ ହାଇଦ୍ରାବାଦ ଦଳର ଅଧିନାୟକ ଏସ୍. ଧୀରଜ ଗୌଡ଼ ଅରବାଜ ବ୍ୟାଗ୍ଙ୍କ ସହିତ ଦଳ ପାଇଁ ଏକ ବଡ଼ ପାର୍ଟନରଶିପ୍ କରିଥିଲେ। ଅରବାଜ୍ ୧୯୦ବଲ୍ ଖେଳି ୧୦ଚୌକା, ୩ଛକା ସହିତ ୧୦୯ ରନ କରି ଆଉଟ ହୋଇଯାଇଥିଲେ। ଧୀରଜ କିନ୍ତୁ କ୍ରିଜ୍ରେ ଜମି ରହିଥିଲେ। ସେ ଶନିବାର ଖେଳ ଶେଷସୁଦ୍ଧା ୧୮୭ବଲର ସାମ୍ନା କରି ୮ଚୌକା, ୧୧ଛକା ସହିତ ୧୫୩ରନ କରି ଅପରାଜିତ ରହିଥିଲେ। ଧୀରଜ ଓ ଅରବାଜଙ୍କ ମଧ୍ୟରେ ଚତୁର୍ଥ ଉଇକେଟ୍ ଯୋଡ଼ିରେ ୨୩୭ରନର ପାର୍ଟନରଶିପ୍ ହୋଇଥିଲା। ଷ୍ଟମ୍ପ ଅପସାରଣ ବେଳକୁ ହାଇଦ୍ରାବାଦ ୬ଉଇକେଟ୍ ହରାଇ ୪୦୩ ରନ ସଂଗ୍ରହ କରିଥିଲା। ଓଡ଼ିଶା ପକ୍ଷରୁ ଶ୍ରୀରାଜ ପଟ୍ଟନାୟକ ଓ ମହମ୍ମଦ ସୋହେଲ ଖାଁ ୨ଟି ଲେଖାଏଁ ଉଇକେଟ ନେଇଥିବା ବେଳେ ସମ୍ବିତ ବେଜା ଏବଂ ସାର୍ଥକ ପଣ୍ଡା ଗୋଟିଏ ଲେଖାଏଁ ଉଇକେଟ ପାଇଥିଲେ।ବିସିସିଆଇ ଅମ୍ପାୟର ପ୍ରେମଦୀପ ଚାଟାର୍ଜୀ, ରବିଶଙ୍କର ମ୍ୟାଚ୍ ପରିଚାଳନା କରିଥିଲେ। ପରମବୀର ସିଂ, ଅମିତ ତିୱାରୀ ଅନ୍ଲାଇନ ସ୍କୋରର ଏବଂ ସଞ୍ଜୟ କୁମାର, ଅମିତ କୁମାର ଭିଡ଼ିଓ ଆନାଲିଷ୍ଟ ଦାୟିତ୍ୱ ତୁଲାଇଥିଲେ।
