ସୋରଡ଼ା,୨ା୧(ଡି.ଏନ୍.ଏ.): ଗଞ୍ଜାମ ଜିଲା ସୋରଡ଼ା ବଡ଼ଗଡ଼ ରାସ୍ତା ଖରିଗୁଡା ଛକରେ ସୋମବାର ମଧ୍ୟାହ୍ନରେ ୧୦୨ ଅମ୍ବୁଲାନ୍ସ ଦମ୍ପତିଙ୍କୁ ଧକ୍କା ଦେବାରୁ ସ୍ବାମୀଙ୍କ ମୃତ୍ୟୁ ହୋଇଥିବା ବେଳେ ସ୍ତ୍ରୀ ଗୁରୁତର ହୋଇଛନ୍ତି। ସ୍ତ୍ରୀଙ୍କୁ ଗୁରୁତର ଅବସ୍ଥାରେ ପ୍ରଥମେ ସୋରଡ଼ା ସରକାରୀ ଡାକ୍ତରଖାନା ପରେ ବ୍ରହ୍ମପୁର ସ୍ଥାନାନ୍ତର କରାଯାଇଛି। ବଡ଼ଗଡ଼ ଡାକ୍ତରଖାନାରେ ରୋଗୀଙ୍କୁ ଛାଡି ଆମ୍ବୁଲାନ୍ସଟି ସୋରଡ଼ା ଫେରୁଥିବା ବେଳେ ଖାରିଗୁଡା ଛକରେ ବଡ଼ଗଡ଼ ଯାଉଥିବା ବୋରସିଙ୍ଗୀ ପଞ୍ଚାୟତର ଗୁଣ୍ଡିବିରା ଗ୍ରାମର ଜୟ ମହାକୁଡ(୬୦) ଓ ଆଶାକର୍ମୀ ଥିବା ତାଙ୍କ ସ୍ତ୍ରୀ ସୁବାସିନୀ (୫୩) ବଡ଼ଗଡ଼ ଡାକ୍ତରଖାନାକୁ ସ୍ବାସ୍ଥ୍ୟ ବିଭାଗୀୟ କୌଣସି କାର୍ଯ୍ୟରେ ଯୋଗଦେବାକୁ ବାଇକ୍ରେ ଯାଉଥିଲେ। ଦୁର୍ଘଟଣା ଘଟିବା ପରେ ଗଭୀର ଆଘାତରେ ଜୟ ଓ ସୁବାସିନୀଙ୍କୁ ଦମକଳ ବାହିନୀ ପହଞ୍ଚି ସୋରଡ଼ା ଡାକ୍ତରଖାନାକୁ ଆଣିଥିଲେ। ଜୟଙ୍କୁ ଡାକ୍ତର ସେଠାରେ ମୃତ ଘୋଷଣା କରିଥିଲେ। ଚାଳକ ଶିବଶଙ୍କର ନାୟକ ଥାନାରେ ଆତ୍ମସମର୍ପଣ କରିଥିବା ବେଳେ ଗାଡ଼ିକୁ ଥାନାକୁ ଅଣାଯାଇଛି। ଏସ୍ଆଇ ସୁନୀଲ କଣ୍ଡୋଗୋରୀ ଦୁର୍ଘଟଣାସ୍ଥଳକୁ ଯାଇ ତଦନ୍ତ ଆରମ୍ଭ କରିଛନ୍ତି। ମୃତ ଜୟ ଜଣେ ଶାନ୍ତ ସରଳ ବ୍ୟକ୍ତି ହୋଇଥିବା ବେଳେ ସ୍ତ୍ରୀ ଜଣେ ଆଶାକର୍ମୀ। ଖବର ପ୍ରଚାରିତ ପରେ ବିଧାୟକ ପୂର୍ଣ୍ଣଚନ୍ଦ୍ର ସାଇଁ ,ଏନ୍ଏସି ଅଧ୍ୟକ୍ଷ ଶିବଶଙ୍କର ପଣ୍ଡାଙ୍କ ସମେତ ବହୁ ଜନସାଧାରଣ ମେଡିକାଲରେ ପହଞ୍ଚିଥିଲେ।
