କୁନ୍ଦୁରା,୧୦ା୭ (ଡି.ଏନ.ଏ.): କୋରାପୁଟ ଜିଲା କୁନ୍ଦୁରା ବ୍ଲକ ବାଗଦେରି ପଞ୍ଚାୟତ ଅନ୍ତର୍ଗତ ବୁଦାଗୁଡା ଗ୍ରାମରେ ରବିବାର ଏକ ଅଭାବନୀୟ ଘଟଣା ଘଟିଯାଇଛି। ସ୍ବାମୀ ସ୍ତ୍ରୀଙ୍କ ଗଳା କାଟି ହତ୍ୟା କରିଛନ୍ତି। ଖବରପାଇ ପୋଲିସ ଘଟଣା ସ୍ଥଳରେ ପହଞ୍ଚତ୍ ତଦନ୍ତ ଆରମ୍ଭ କରିଛି। ଅଭିଯୁକ୍ତ ସ୍ବାମୀ ଜୟରାମ ଦୁରୁଆଙ୍କୁ ଗିରଫ କରିଛି।
ଖବରରୁ ଜଣାପଡିଛି ବୁଦାଗୁଡା ଗ୍ରାମରେ ସ୍ତ୍ରୀ ଓ ୨ ସନ୍ତାନଙ୍କୁ ନେଇ ଜୟରାମଙ୍କ ପରିବାର ହସଖୁସିରେ ଚଳୁଥିଲେ। ୩ ମାସ ତଳେ ଜୟରାମ ଗ୍ରାମର କେତେକ ବ୍ୟକ୍ତିଙ୍କ ସହ କାମ କରିବାକୁ କେରଳ ଯାଇଥିଲେ। ସେଠାରେ ତାଙ୍କର ବ୍ୟବହାରପାଗଳ ଭଳି ହେବାରୁ ତାଙ୍କ ସାଥୀମାନେ ତାଙ୍କୁ ଆଣି ଗାଁରେ ଛାଡି ଦେଇ ଥିଲେ। ଜୟରାମଙ୍କ ଏଭଳି କାର୍ଯ୍ୟକଳାପ ଦେଖି ସ୍ତ୍ରୀ ମହାଦେଈ ବିଭିନ୍ନ ସ୍ଥାନରେ ତାଙ୍କର ଚିକିତ୍ସା କରାଇଥିଲେ। ରବିବାର ମହାଦେଈ ଜୟରାମଙ୍କୁ ଧରି ନିକଟରେ ଥିବା ଜଣେ ଗୁଣିଆଙ୍କ ଘରକୁ ନେଇଥିଲେ। ସେଠାରୁ ଆସିବା ପରେ ମଧ୍ୟାହ୍ନ ୧୨ଟାରେ ଜୟରାମ ହଠାତ୍ ସ୍ତ୍ରୀ ମହାଦେଈଙ୍କ ଗଳା କାଟି ଦେଇଥିଲେ। ଫଳରେ ଘଟଣା ସ୍ଥଳରେ ମହାଦେଈଙ୍କ ମୃତ୍ୟୁ ଘଟିଥିଲା। ଗ୍ରାମବାସୀ ଏହା ଜାଣିବା ପରେ ପୋଲିସକୁ ଖବର ଦେଇଥିଲେ। ପୋଲିସ ମୃତଦେହ ଜବତ କରି ବ୍ୟବଚ୍ଛେଦ ଲାଗି ପଠାଇଥିଲା। ମହାଦେଈଙ୍କ ମୃତଦେହ ନିକଟରେ ବସିଥିବା ଜୟରାମଙ୍କୁ ଗିରଫ କରି ଥାନାକୁ ଆଣିଥିଲା। ମା’ଙ୍କ ମୃତ୍ୟୁ ଏବଂ ବାପା ଜେଲ ଯିବା ପରେ ଜୟରାମଙ୍କ ଦୁଇ ପୁଅ ବେସାହାରା ହୋଇପଡିଛନ୍ତି। ବଡପୁଅ ବୁଦୃ ଦୁରୁଆ ଅଷ୍ଟମ ଶ୍ରେଣୀରେ ପଢୁଥିବା ବେଳେ ସାନପୁଅ ସୀତାରାମଙ୍କୁ ୮ବର୍ଷ ହୋଇଛି। ପୋଲିସ ଏକ ହତ୍ୟା ମାମଲା(ନଂ.୬୯/୨୨) ରୁଜୁ କରି ତଦନ୍ତ ଜାରି ରଖିଥିବା ମାମଲାର ତଦନ୍ତକାରୀ ଅଧିକାରୀ ଗୋବିନ୍ଦ ହାଁସଦା ପ୍ରକାଶ କରିଛନ୍ତି।
