ଦିଗପହଣ୍ଡି,୧୧ା୫(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି ବ୍ଲକ ଖମାରୀ ଗାଁ ପଞ୍ଚାୟତ ଗଡ଼ ସାମନ୍ତରାପୁର ଗ୍ରାମର ବିଷ୍ଣୁପ୍ରିୟା ପାତ୍ରଙ୍କୁ ତାଙ୍କ ସ୍ବାମୀ ସନ୍ତୋଷ କୁମାର ପାତ୍ର ପିଟିପିଟି ମାରିଦେଇଥିବା ଅଭିଯୋଗ ହୋଇଛି। ବିଷ୍ଣୁପ୍ରିୟା ମରିଯିବା ପରେ ତାଙ୍କୁ ଆତ୍ମହତ୍ୟାର ରୂପ ଦେବା ପାଇଁ ମୃତଦେହ ଉପରେ କିରୋସିନ ଢାଳି ଜାଳି ଦିଆଯାଇଥିବା ଜଣାପଡ଼ିଛି।
ଶୁକ୍ରବାର ବିଳମ୍ବିତ ରାତିରେ ଏହି ଘଟଣା ଘଟିଛି। ଶନିବାର ସକାଳେ ଘଟଣା ପ୍ରଘଟ ହେବା ପରେ ଖବର ପାଇ କେ.ନୂଆଗାଁ ଥାନା ପୋଲିସ ଗ୍ରାମରେ ପହଞ୍ଚତ୍ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ବ୍ରହ୍ମପୁର ବଡ଼ ଡାକ୍ତରଖାନାକୁ ପଠାଇଛି। ଏନେଇ ଥାନାରେ ଏକ ମାମଲା ରୁଜୁ କରାଯାଇଥିବା ଥାନା ଆଇଆଇସି କିଶୋର କୁମାର ସାମଲ କହିଛନ୍ତି।
ସନ୍ତୋଷ ତାଙ୍କ ପ୍ରଥମ ସ୍ତ୍ରୀଙ୍କୁ ଯୌତୁକ ନିର୍ଯାତନା ଦେଇ ମାର୍ପିଟ କରିବାରୁ ସେ ବିଷ ପିଇ ଆତ୍ମହତ୍ୟା କରିଥିଲେ। ତାଙ୍କ ଶୁଦ୍ଧିକ୍ରିୟା ପରେ ଗତ ପ୍ରାୟ ୧୫ ମାସ ତଳେ ସନ୍ତୋଷ ସାନଖେମୁଣ୍ଡି ବ୍ଲକ ପ୍ରତାପଗିରି ପେଣ୍ଠ ଗ୍ରାମର ଶ୍ରୀରାମ ପାତ୍ରଙ୍କ ଝିଅ ବିଷ୍ଣୁପ୍ରିୟାଙ୍କୁ ଦ୍ୱିତୀୟ ବିବାହ କରିଥିଲେ।
ବିବାହ ସମୟରେ ସ୍ବାମୀ ସନ୍ତୋଷଙ୍କ ଦାବି ପ୍ରକାରେ ସମସ୍ତ ଯୌତୁକ ସାମଗ୍ରୀ ଦିଆଯାଇଥିଲା। ବିବାହର କିଛି ଦିନ ପରେ ସନ୍ତୋଷ ପୁଣି ଅଧିକ ଯୌତୁକ ଦାବି କରି ଦ୍ୱିତୀୟ ସ୍ତ୍ରୀଙ୍କୁ ମଧ୍ୟ ନିର୍ଯାତନା ଦେଉଥିଲେ। ଗତ କିଛିଦିନ ତଳେ ବିଷ୍ଣୁପ୍ରିୟାଙ୍କ ବାପା ଗ୍ରାମରେ ପହଞ୍ଚତ୍ ଗଁାର ଭଦ୍ରଲୋକଙ୍କ ଉପସ୍ଥିତିରେ ଯୌତୁକ ବାବଦକୁ ପୁଣି ଦୁଇ ଲକ୍ଷ ଟଙ୍କା ସନ୍ତୋଷଙ୍କୁ ପ୍ରଦାନ କରିଥିଲେ। ଏନେଇ ସେ ପୋଲିସକୁ ସମସ୍ତ ସୂଚନା ଦେଇଥିବା ଜଣାପଡ଼ିଛି। ପୋଲିସ ଅଭିଯୁକ୍ତ ସନ୍ତୋଷଙ୍କୁ ଥାନାରେ ଅଟକ ରଖି ତଦନ୍ତ ଚଳାଇଛି।
