ପଦ୍ମପୁର,୧୪।୬(ପ୍ରଦୀପ୍ତ ଦାଶ): ସ୍ତ୍ରୀକୁ ଟାଙ୍ଗିଆରେ ହାଣି ଝୁଲି ପଡିଲେ ସ୍ବାମୀ। ଏଭଳି ଏକ ଅଭାବନୀୟ ଘଟଣା ଘଟିଛି ପଦ୍ମପୁର ଥାନା ଭେଉଁରିଆ ଗାଁରେ । ମୃତକ ହେଲେ ଶ୍ୟାମସୁନ୍ଦର ଭୋଇ।
ସୂଚନାନୁଯାୟୀ, ଭେଉଁରିଆ ଗାଁର ଶ୍ୟାମସୁନ୍ଦରଙ୍କ ସ୍ତ୍ରୀ ରତ୍ନୀ ଭୋଇ ମଧ୍ୟରେ କୌଣସି କାରଣରୁ ଝଗଡା ହୋଇଥିଲା। ଏଥିରେ ଉତ୍କ୍ଷିପ୍ତ ହୋଇ ମଦ୍ୟପ ସ୍ବାମୀ ତାଙ୍କ ସ୍ତ୍ରୀକୁ ଏକ ଧାରୁଆ ଅସ୍ତ୍ରରେ ଆକ୍ରମଣ କରିଥିଲେ । ପରିବାର ଲୋକେ ରତ୍ନୀଙ୍କୁ ଉଦ୍ଧାର କରି ଆହତ ଅବସ୍ଥାରେ ଡାକ୍ତରଖାନା ପଠାଇଥିଲେ । ପରେ ସ୍ବାମୀ ଶ୍ୟାମସୁନ୍ଦର ନିଜ ଘରେ ଦଉଡି ଦେଇ ଝୁଲି ଆତ୍ମହତ୍ୟା କରିଥିଲେ । ତେବେ କେଉଁ କାରଣରୁ ସ୍ତ୍ରୀଙ୍କୁ ଆକ୍ରମଣ ପରେ ନିଜେ ଆତ୍ମହତ୍ୟା କରିଛନ୍ତି ସେନେଇ ପଦ୍ମପୁର ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି । ଏ ସଂପର୍କରେ ପଦ୍ମପୁର ଥାନା କେଶ ନମ୍ବର ୯/୨୫ ରେ ଏକ ଆପମୃତ୍ୟୁ ମାମଲା ରୁଜୁ ହେବା ସହିତ ରତ୍ନୀଙ୍କୁ ବୁର୍ଲା ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି। ସେହିପରି ମୃତ ଶ୍ୟାମସୁନ୍ଦରଙ୍କ ମୃତଦେହ ପଦ୍ମପୁର ଡାକ୍ତରଖାନାରେ ବ୍ୟବଚ୍ଛେଦ ପରେ ପରିବାରବର୍ଗଙ୍କୁ ହସ୍ତାନ୍ତର କରାଯାଇଛି। ସେମାନଙ୍କ ୨ଟି ନାବାଳକ ସନ୍ତାନ ଅଛନ୍ତି ।
