କର୍ଲାମୁଣ୍ଡା,୧୮ା୧(ଡି.ଏନ୍.ଏ.): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକରେ ୧୯-୨୦ ଆର୍ଥିକ ବର୍ଷରେ ବିଭିନ୍ନ ପଞ୍ଚାୟତରେ ଧାନଖଳା ନିର୍ମାଣର ୨ ବର୍ଷ ପରେ ମଧ୍ୟ ଟଙ୍କା ମିଳି ନ ଥିବାରୁ ବୁଧବାର କାମରେ ନିୟୋଜିତ ମେଟ୍ ଓ ଶ୍ରମିକମାନେ ବ୍ଲକ ସମ୍ମୁଖରେ ଆମରଣ ଅନଶନରେ ବସିଥିବା ଦେଖିବାକୁ ମିଳିଛି।
ସୂଚନାଯୋଗ୍ୟ, କର୍ଲାମୁଣ୍ଡା ବ୍ଲକର ୧୨ଟି ପଞ୍ଚାୟତର ବିଭିନ୍ନ ସ୍ଥାନରେ ଧାନଖଳା ନିର୍ମାଣ ପାଇଁ ପ୍ରତି ଖଳାକୁ ୭ ଲକ୍ଷ ୩୨ ହଜାର ଟଙ୍କା ଲେଖାଏ ମୋଟ୍ ୮୭ ଲକ୍ଷ ୮୪ ହଜାର ଟଙ୍କା ଅନୁଦାନ ଆସିଥିଲା। ଏଥିରେ ବ୍ଲକର ତେରେସିଂହା କଲୋନୀପଡ଼ା, କର୍ଲାମୁଣ୍ଡା ପଞ୍ଚାୟତର କର୍ଲାମୁଣ୍ଡା ବସ୍ତି ପାଣି ପଞ୍ଚାୟତ କାର୍ଯ୍ୟାଳୟ ନିକଟସ୍ଥ, ଗଜବାହଲ ପଞ୍ଚାୟତର ଅବୁଜବାହାଲ ଡୁଙ୍ଗୁରୀ, ରିଞ୍ଜା ପଞ୍ଚାୟତର ରେଙ୍ଗାଲି, ରେଗଡ଼ା ପଞ୍ଚାୟତର ରେଗଡ଼ା, ଯୋରାଡବ୍ରା ପଞ୍ଚାୟତର ଯୋରାଡବ୍ରାଠାରେ ନିର୍ମାଣ ହୋଇଥିଲା। କାର୍ଯ୍ୟ ଶେଷ ହେବାର ୨ ବର୍ଷରୁ ଊର୍ଦ୍ଧ୍ୱ ଦିନ ବିତିଯାଇଥିଲେ ମଧ୍ୟ କାମ କରିଥିବା ଶ୍ରମିକ, ମେଟ୍ ଓ ବିଭିନ୍ନ ସାମଗ୍ରୀ ଓ ତଥା ଭଡ଼ା ବାବଦକୁ ଟଙ୍କା ପାଉ ନ ଥିବାରୁ ମେଟ୍ମାନେ ଆମରଣ ଅନଶନରେ ବସିଥିବା କପିନ୍ଦ୍ର ରଣା, ବିରଞ୍ଚତ୍ ରଣା, ଶଶିଭୂଷଣ ସାହୁ, ଉତ୍ତମ ରଣା, ଅର୍ଜୁନ ସାହୁ ପ୍ରମୁଖ କହିଛନ୍ତି। ତେବେ ଖବର ଲେଖାହେବା ସୁଦ୍ଧା ଆମରଣ ଅନଶନ ସ୍ଥଳରେ କୌଣସି ବ୍ଲକ ଅଧିକାରୀ ଆସି ନ ଥିବା ଦୁର୍ଭାଗ୍ୟର ବିଷୟ ବୋଲି ଅନଶନକାରୀମାନେ କହିଛନ୍ତି। ଅନ୍ୟପକ୍ଷରେ ଗତ ସେପ୍ଟେମ୍ବରରେ ଉକ୍ତ ବ୍ୟକ୍ତିମାନେ ବ୍ଲକ ସମ୍ମୁଖରେ ଧାରଣାରେ ବସିଥିଲେ ଓ ତତ୍କାଳୀନ ବିଡିଓ ପ୍ରିୟଦର୍ଶନୀ ମିର୍ଦ୍ଧା ୧ ମାସ ମଧ୍ୟରେ ପଦକ୍ଷେପ ନିଆଯିବ ବୋଲି କହିବା ପରେ ଧାରଣା ପ୍ରତ୍ୟାହୃତ ହୋଇଥିଲା। ଏନେଇ ସ୍ଥାନୀୟ ବିଡିଓ ସୁଚରିତା ମୁଗ୍ରୀଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ଫୋନ ଗ୍ରହଣ କରୁ ନ ଥିବାରୁ ତାଙ୍କ ପ୍ରତିକ୍ରିୟା ନିଆଯାଇପାରିନାହିଁ।
