ମହାକାଳପଡ଼ା,୩ା୩ (ପ୍ରତାପ ଚନ୍ଦ୍ର ସ୍ବାଇଁ):କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ବିଜୟନଗର ସମବାୟ ସମିତି ମଣ୍ଡିରେ ଶହ ଶହ କୁଇଣ୍ଟାଲ ଧାନ ମାସ ମାସ ଧରି ପଡ଼ି ରହିଛି। ଏଥି ମଧ୍ୟରେ ପଞ୍ଜୀକୃତ ଚାଷୀଙ୍କ ଧାନ ବିକ୍ରୟ କରିବା ଅବଧି ତାରିଖ ଶେଷ ହୋଇଯାଇଥିଲେ ମଧ୍ୟ ଉଠି ପାରୁନି। ମିଲରଙ୍କ ମନମାନି ଓ ସମବାୟ ସମିତି ସମ୍ପାଦକଙ୍କ ଭିତିର ଚାଲ ଯୋଗୁ ଚାଷୀଟି ଆତ୍ମହତ୍ୟା କରିବାକୁ ଚେତାବନୀ ଦେଇଛନ୍ତି। ଏଭଳି ଏକ ଘଟଣା ଦେଖିବାକୁ ମିଳିଛି ବିଜୟନଗର ସମବାୟ ସମିତିର ପଞ୍ଜୀକୃତ ଚାଷୀ ମହନୀ ଜେନାଙ୍କ କ୍ଷେତ୍ରରେ । ଜେନାଙ୍କ କହିବା କଥା ଧାର କରଜ ଘରୋଇ ଋଣ କରି ଚାଷ କରିଥିଲି। ଭାବିଥିଲି ଧାନ ବିକ୍ରୀ କରି ଋଣ ପରିଶୋଧ କରିବି। ହେଲେ ମାସେ ହେଲାଣି ମଣ୍ଡିରେ ଧାନ ପଡ଼ିଛି ବିକ୍ରୀ ହୋଇ ପାରୁନି, ଏହାର ଅବଧି ସାରିଲାଣି । ଚାଷୀମାନେ କହିବାରୁ ଟୋକନ ଅବଧି ଆଉ ଏକ ସପ୍ତାହ ସମିତି ବଢାଇଛନ୍ତି। ଚାଷୀ ମହନୀଙ୍କ କହିବା କଥା ମୋର ୮୨ କୁଇଣ୍ଟାଲ ଧାନ ବିକ୍ରୟ ବ୍ୟବସ୍ଥା ରହିଛି। ଧାନ ଯଦି ନ ଉଠିଲା ତେବେ ମଣ୍ଡି ସମ୍ମୁଖରେ ପେଟ୍ରୋଲ ଢାଳି ମରିବି ବୋଲି ଚେତାବନୀ ଦେଇଛନ୍ତି। ବିଜୟନଗର ସମବାୟ ସମିତି ସମ୍ପାଦକ ସୁଦର୍ଶନ ପ୍ରଧାନଙ୍କ କହିବା କଥା ୫୦ କୁଇଣ୍ଟାଲରୁ ଅଧିକ ଧାନ ଉଠିବ ନାହିଁ ବୋଲି ଚାଷୀ ଜେନାଙ୍କୁ ଜଣାଇ ଦିଆଯାଇଛି ବୋଲି ସେ କହିଛନ୍ତି।
ଏ ସଂକ୍ରାନ୍ତରେ କେନ୍ଦ୍ରାପଡ଼ା ଜିଲାପାଳ ରଘୁରାମ ଆର ଆୟରଙ୍କ ମତାମତ ନେବାରେ ବିଜୟନଗର ସମବାୟ ସମିତିରେ ମାସେ ଧରି ଧାନ ଉଠୁନି ବୋଲି ଦୃଷ୍ଟି ଆକର୍ଷଣ କରାଯାଇଥିବା କଥା କହିଛନ୍ତିି।
ମଣ୍ଡିରେ ଧାନ ବସ୍ତାରେ ମୂଷା ଖାଇଲେଣି, ଆଉ କେଉଁଠି ତଳି ସନ୍ତସନ୍ତିଆ ହୋଇ ଗଜା ହେଲାଣି ତ ଗୋରୁ ବସ୍ତା ଫୁଟାଇ ଧାନ ଖାଇବା ଅଭିଯୋଗ ହେଉଛି। ଚାଷୀମାନଙ୍କର ଧାନ ବସ୍ତା ମଣ୍ଡିରେ ଖୋଲା ଆକାଶ ତଳେ ମାସ ମାସ ଧରି ପଡ଼ିଛି ରହିଛି ବୋଲି ବ୍ଲକର ୨୪ ମଣ୍ଡିରେ ଏଭଳି ଦେଖିବାକୁ ମିଳିଛି।
Dharitri – Odisha’s No.1 Odia Daily
