ଦିଗପହଣ୍ଡି,୧୫ା୮(ଅଶେଷ ନାଥ ମିଶ୍ର): ଗଞ୍ଜାମ ଜିଲା ଦିଗପହଣ୍ଡି- ଚିକିଟି-ନୂଆପଡ଼ା ମୁଖ୍ୟରାସ୍ତା ମେଡିକାଲ ଛକ ସାହାଣୀ ସାହି ନିକଟରେ ଅବୈଜ୍ଞାନିକ ଭାବେ ତିଆରି କରାଯାଇଥିବା ବେଆଇନ ହମ୍ପ୍ସରେ ଗତ ଗୁରୁବାର ଅପରାହ୍ନରେ ବାଇକରୁ ଖସିପଡ଼ି ପଦ୍ମନାଭପୁର ପଞ୍ଚାୟତ ନନ୍ଦଗାଁର ଜିତୁ ସାହୁଙ୍କ ସ୍ତ୍ରୀ ସୁଷମା ସାହୁ (୩୨) ଗୁରୁତର ହୋଇଥିଲେ। ସେ ସ୍ବାମୀଙ୍କ ସହ ବାଇକ୍ରେ ପଦ୍ମନାଭପୁର ଯାଉଥିବାବେଳେ ମେଡିକାଲ ଛକ ସାହାଣୀ ସାହି ନିକଟରେ ଥିବା ହମ୍ପ୍ସରେ ତଳକୁ ଖସିପଡ଼ିଥିଲେ। ଗତ କିଛିଦିନ ପୂର୍ବେ ମେଡିକାଲ ଛକ ସାହାଣୀ ସାହି ଛକରେ ଏକ ଟ୍ରାକ୍ଟର ଦୁର୍ଘଟଣାରେ ଚନ୍ଦନ ଦାସ ନାମକ ବ୍ୟକ୍ତିଙ୍କ ମୃତ୍ୟୁ ହୋଇଥିଲା। ତେଣୁ ସେହି ସ୍ଥାନରେ ଯାନବାହନଗୁଡ଼ିକର ବେଗ ନିୟନ୍ତ୍ରଣ କରିବା ପାଇଁ ସାହି ବାସିନ୍ଦା ପୂର୍ତ୍ତ ବିଭାଗ ଜାଣତରେ ୪ଟି ଉଚ୍ଚ ଧରଣର ହମ୍ପ୍ସ ନିର୍ମାଣ କରିଥିଲେ। କିନ୍ତୁ ଏହି ହମ୍ପ୍ସଗୁଡ଼ିକ କୌଣସି ବୈଷୟିକ କୌଶଳ ବିନା ଜମିହିଡ଼ ଭଳି ମୁଖ୍ୟ ରାସ୍ତାରେ ନିର୍ମାଣ କରାଯାଇଥିବାରୁ ପ୍ରତ୍ୟହ ଦୁର୍ଘଟଣା ଘଟି ଅନେକ ଆହତ ହେଉଥିଲେ। ଏନେଇ ଧରିତ୍ରୀରେ ଖବର ପ୍ରକାଶ ପାଇଥିଲା। ଦିଗପହଣ୍ଡି ପୂର୍ତ୍ତ ବିଭାଗ ଓ ସ୍ଥାନୀୟ ପ୍ରଶାସନ ତୁରନ୍ତ ଏଥିପ୍ରତି ଦୃଷ୍ଟି ଦେଇ ଏହି ବେଆଇନ ହମ୍ପ୍ସଗୁଡ଼ିକୁ ହଟାଇବା ପାଇଁ ସହରର ବହୁ ବୁଦ୍ଧିଜୀବୀ ,ସାମାଜିକ କର୍ମୀ ଦାବି କରିଥିଲେ। ଧରିତ୍ରୀ ଓ୍ବେବ ପୋର୍ଟାଲରେ ପ୍ରକାଶିତ ଖବର ବହୁଳ ମାତ୍ରାରେ ଭାଇରାଲ ହେବା ପରେ ଦିଗପହଣ୍ଡି ପୂର୍ତ୍ତ ବିଭାଗ ନିର୍ବାହୀଯନ୍ତ୍ରୀ ଇଂ. ତାପସ କୁମାର ଦାସ, କନିଷ୍ଠ ଯନ୍ତ୍ରୀ ଇଂ.ମନୋଜ କୁମାର ମହାରଣାଙ୍କ ନିର୍ଦ୍ଦେଶକ୍ରମେ ପୂର୍ତ୍ତ ବିଭାଗ କର୍ମଚାରୀ ବୃନ୍ଦ ଘଟଣାସ୍ଥଳରେ ପହଞ୍ଚି ବେଆଇନ ଭାବେ ସାହି ବାସିନ୍ଦା ତିଆରି କରିଥିବା ୪ଟି ହମ୍ପ୍ସକୁ ରାସ୍ତାରୁ ହଟାଇ ଦେଇଛନ୍ତି।
