ଭଞ୍ଜନଗର,୬ା୩(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଉପଖଣ୍ଡ ଚିକିତ୍ସାଳୟରେ ଶୁକ୍ରବାର ଏଚ୍ପିଭି ଟିକାକରଣ କାର୍ଯକ୍ରମର ଶୁଭାରମ୍ଭ ହୋଇଯାଇଛି। ଭଞ୍ଜନଗର ମେଡିକାଲ ଅଧୀକ୍ଷକ ଡାକ୍ତର ସୀତାଂଶୁ ଶେଖର ଶତପଥୀ ଏଥିରେ ମୁଖ୍ୟ ଅତିଥି ଭାବେ ଯୋଗଦେଇ ଏହାର ଶୁଭାରମ୍ଭ କରିଥିଲେ। ହ୍ୟୁମାନ ପାପିଲୋମା ଭାଇରସ (ଏଚ୍ପିଭି ) ଟିକାକରଣ ଦ୍ୱାରା ମହିଳାମାନଙ୍କ ଜରାୟୁ ଗ୍ରୀବା ମାରାତ୍ମକ କର୍କଟ ରୋଗକୁ ପ୍ରତିରୋଧ କରାଯିବାର ସ୍ବତନ୍ତ୍ର ପ୍ରୟାସ ଆରମ୍ଭ କରାଯାଇଛି।
ମେଡିକାଲ ପରିଚାଳକ ବିଚିତ୍ର କୁମାର ପାଣିଗ୍ରାହୀ, ଏଲ୍ଏଚ୍ବି ମନ୍ଦାକିନୀ ବେହେରା, ବିଦୂପମା ସାହୁ, ସୁନୀତା କୁମାରୀ ଦାସ ଏବଂ ସ୍ବର୍ଣ୍ଣଲତା ତ୍ରିପାଠୀ ଆଶା ପ୍ରମୁଖ ଉପସ୍ଥିତ ଥିଲେ।
ସୂଚନା ଥାଉକି, ଜରାୟୁ କର୍କଟ (ସର୍ଭିକାଲ କ୍ୟାନ୍ସର)ରେ ପ୍ରତିବର୍ଷ ବହୁ ସଂଖ୍ୟାରେ ମହିଳା ଦେଶରେ ପ୍ରାଣ ହରାଉଛନ୍ତି। ବଜାରରେ ଉପଲବ୍ଧ ଥିବା ଟିକାର ଦର ଅଧିକ ଥିବାରୁ ଏହାକୁ ସମସ୍ତେ କିଣି ପାରୁ ନ ଥିଲେ। ଜାତୀୟ ଟିକାକରଣ କାର୍ଯ୍ୟକ୍ରମରେ ଏହି ଟିକାକୁ ସାମିଲ କରାଯିବା ପରେ ଏହାକୁ ମହିଳାମାନଙ୍କୁ ମାଗଣାରେ ପ୍ରଦାନ କରାଯିବା ବ୍ୟବସ୍ଥା ଆରମ୍ଭ ହୋଇଛି।
