୧୯୮୩, ଜୁନ ୨୫ରେ ସେତେବେଳର କ୍ରିକେଟ ଜଗତର ବାଦଶାହା ଓ୍ବେଷ୍ଟଇଣ୍ଡିଜକୁ ପରାସ୍ତ କରି ବିଶ୍ବ ବିଜେତାର ମୁକୁଟ ପିନ୍ଧିଥିଲା ଟିମ ଇଣ୍ଡିଆ। ଆଉ ଏହା ଥିଲା ଭାରତର ପ୍ରଥମ ବିଶ୍ୱକପ ବିଜୟ। ଏହାରି ଭିତରେ ବିତିଯାଇଛି ୩୭ ବର୍ଷ। କିନ୍ତୁ ଜୁନ ମାସ ୨୫ ତାରିଖକୁ ଭୁଲିପାରି ନାହାନ୍ତି ଭାରତବାସୀ। ଏହି ତାରିଖ ଏଥିପାଇଁ ସ୍ବତନ୍ତ୍ର, କାରଣ ୧୯୮୩ ଆଜିର ଦିନରେ ବିଶ୍ୱକପ କ୍ରିକେଟ ଫାଇନାଲରେ ଦୁଇ ଥରର ବିଶ୍ୱକପ୍ ବିଜେତା ଓ୍ବେଷ୍ଟଇଣ୍ଡିଜକୁ ପରାସ୍ତ କରିଥିଲା। ଏବେ ବିଶ୍ୱକପ ଖେଳିଥିବା କ୍ରିକେଟରଙ୍କୁ ମ୍ୟାଚ ଫି, ଆଲାଉନ୍ସ ଓ ପୁରସ୍କାର ବାବଦାରେ କୋଟି କୋଟି ଟଙ୍କାର ମିଳୁଛି। ୩୭ ବର୍ଷ ତଳେ ଖେଳାଳିଙ୍କୁ କେତେ ଟଙ୍କା ମିଳିଥିଲା ତାହା ଜାଣିଲେ ଆଶ୍ଚର୍ଯ୍ୟ ଲାଗିବ।
୧୯୮୩ରେ ବିଶ୍ୱବିଜୟୀ ଭାରତୀୟ ଦଳର ଖେଳାଳିଙ୍କ ମ୍ୟାଚ ଫି ବାବଦରେ ମିଳିଥିଲା ମାତ୍ର ୧୫୦୦ ଟଙ୍କା। ପ୍ରତି ୩ ଦିନକୁ ୬୦୦ ଟଙ୍କା ଲେଖାଏ ଖର୍ଚ୍ଚ ମିଳୁଥିଲା। ଏହାକୁ ମିଶାଇ ସର୍ବମୋଟ ୨୧୦୦ ଟଙ୍କା ମିଳିଥିଲା। ବିଶ୍ୱକପରେ ୧୪ ଭାରତୀୟ କ୍ରିକେଟର ଓ ମ୍ୟାନେଜର ବିନେଶ ବେଦି ଥିଲେ।
