ନୂଆଦିଲ୍ଲୀ,୧୯।୧୦: ଦୀପାବଳିରେ ବ୍ୟବହୃତ ଏଲଇଡି ଲାଇଟ୍ ଓ କନେକ୍ଟର ଭାରତର ଉତ୍ପାଦନ ବ୍ୟବସ୍ଥାରେ ଏକ ବଡ଼ ସମସ୍ୟା ବିଷୟରେ ଆଲୋକପାତ କରୁଛି। ଏହା ‘ମେକ୍ ଇନ୍ ଇଣ୍ଡିଆ’ ଓ ‘ସ୍ୱଦେଶୀ’ ଅଭିଯାନ ଉପରେ ପ୍ରଶ୍ନ ଉଠାଉଛି।
ଦେଶର ବିଭିନ୍ନ ବଡ଼ ଇଲେକ୍ଟ୍ରିକାଲ ଦୋକାନରେ ଦୀପାବଳି ଆଲୋକକୁ ଦେଖି ଏବଂ ରିପୋର୍ଟରୁ ଜଣାପଡିଛି ଯେ ଚାଇନାରେ ତିଆରି ୧୦ ମିଟର ଏଲଇଡି ଲାଇଟ ୯୫-୧୧୦ ଟଙ୍କାରେ ମିଳୁଛି, କିନ୍ତୁ ଭାରତୀୟ ଲାଇଟ ଦାମ ଦୁଇଗୁଣ, ଅର୍ଥାତ୍ ୨୨୦ ଟଙ୍କା। ଭାରତୀୟ ଲାଇଟ୍ କ୍ୱାଲିଟି ଭଲ ହେଲେ ମଧ୍ୟ ଏହାର ପ୍ଲଗ ଚାଇନା କନେକ୍ଟରରେ ଫିଟ୍ ହେଉନାହିଁ। ଏଥିପାଇଁ ଦୋକାନୀ ଏକ ‘ଜୁଗାଡ଼’ କରିବାକୁ ପରାମର୍ଶ ଦେଉଛନ୍ତି।
ଚାଇନାରେ ଏଲଇଡି ଲାଇଟ ସହ କନେକ୍ଟର ମଧ୍ୟ ତିଆରି ହୁଏ, କିନ୍ତୁ ଭାରତୀୟ ଉତ୍ପାଦକମାନେ ଏହା ଉପରେ ଧ୍ୟାନ ଦେଇନାହାନ୍ତି। ପ୍ରତି ଦୀପାବଳିରେ ଲକ୍ଷ ଲକ୍ଷ ଟଙ୍କାର ଏଲଇଡି ଲାଇଟ ଓ କନେକ୍ଟର ଚାଇନାରୁ ଆସୁଛି। ୨୦୨୨ରେ ଚାଇନାର ଏକ ରିପୋର୍ଟ ଅନୁଯାୟୀ, ସେମାନେ ଭାରତକୁ ୭୧୦ ମିଲିୟନ ଡଲାରର ଏଲଇଡି ଉତ୍ପାଦ ରପ୍ତାନି କରିଥିଲେ। ୨୦୨୫ରେ ଭାରତର ଚାଇନା ସହ ବାଣିଜ୍ୟ ନିଅଣ୍ଟ ୯୯ ବିଲିୟନ ଡଲାରରେ ପହଞ୍ଚିଛି।
ଚାଇନାର ଉତ୍ପାଦଗୁଡ଼ିକ ଶସ୍ତା ହେବା ଯୋଗୁଁ ଭାରତୀୟ ବଜାରରେ ଏହାର ଚାହିଦା ଅଧିକ ରହିଛି। ଭାରତର ବିଭିନ୍ନ ମାର୍କେଟରେ ଦେଖାଯାଏ ଯେ ଅନେକ ଭାରତୀୟ ଉତ୍ପାଦକ ଚାଇନାରୁ ଆମଦାନୀ ଲାଇଟ୍ ବିକ୍ରି କରୁଛନ୍ତି।
‘ସ୍ୱଦେଶୀ’ ଅଭିଯାନ ସଫଳ ହେବା ପାଇଁ ଭାରତୀୟ ଉତ୍ପାଦଗୁଡ଼ିକୁ ଶସ୍ତା ଓ ଗୁଣବତ୍ତା ଯୁକ୍ତ କରିବା ଦରକାର। ଏଥିପାଇଁ ଭାରତର କ୍ଷୁଦ୍ର ଓ ମାଧ୍ୟମ ଉଦ୍ୟୋଗ (MSME) ଗୁଡ଼ିକୁ ସହଜ ନିୟମ, ସହାୟତା ଓ ପୁଞ୍ଜି ଦରକାର। ନଚେତ ଦୀପାବଳି ଆଲୋକରେ ଚାଇନା ଆଗରେ ରହିବ, ଭାରତ ନୁହେଁ।
