ଠାକୁରମୁଣ୍ଡା,୬ା୧୨(ଡି.ଏନ.ଏ.): ମୟୂରଭଞ୍ଜ ଜିଲା କରଞ୍ଜିଆ ବନଖଣ୍ଡ ଅଧୀନ ଠାକୁରମୁଣ୍ଡା ରେଞ୍ଜ ଅଞ୍ଚଳର ବିଭିନ୍ନ ଗ୍ରାମରେ ହାତୀ ଉପଦ୍ରବ ଦେଖିବାକୁ ମିଳିଛି। ହାତୀପଲ ଧାନ ଓ ପରିବା ଫସଲ ନଷ୍ଟ କରିବା ସହ ଲୋକଙ୍କ ଘର ଭାଙ୍ଗି ଦେଇଛନ୍ତି। କେନ୍ଦୁଝର ଜିଲା ସାହାରପଡ଼ା ଦେଇ ପଶି ଆସିଥିବା ଏହି ୨୬ ଟିକିଆ ହାତୀପଲ ୪ ଦିନ ମଧ୍ୟରେ ବ୍ୟାପକ ଫସଲ ନଷ୍ଟ କରି ସାରିଲେଣି।
ଲଘୁଚାପ ଜନିତ ବର୍ଷା ଯୋଗୁ ଧାନ ଅମଳ ହୋଇ ପାରି ନ ଥିବା ବେଳେ ହାତୀପଲଙ୍କ ଦ୍ୱାରା ଫସଲ ନଷ୍ଟ ହେଉଥିବାରୁ ଚାଷୀମାନେ ମୁଣ୍ଡରେ ହାତ ଦେଇ ବସିଛନ୍ତି। ଏହି ରେଞ୍ଜ ଅନ୍ତର୍ଗତ ଅନ୍ଧାରିଖମଣ, ଆମ୍ବବେଡ଼ା, ବୋରିଂ, ବଗବସା, ପଡ଼ିଆବେଡା, ଗୌରୀଗଦା, ବାଲିପୋଷୀ ଦେଇ ଟିକରପଡ଼ା ଗ୍ରାମ ନିକଟ ତାଳପଦା ଓ ଟିକରପଡ଼ା ମଧ୍ୟରେ ଥିବା ଜଙ୍ଗଲରେ ହାତୀପଲ ରହିଥିଲେ। ସେମାନଙ୍କୁ ଘଉଡ଼ାଇବା ପାଇଁ ବନବିଭାଗ ଓ ଗ୍ରାମବାସୀ ଉଦ୍ୟମ ଜାରି ରଖିଛନ୍ତି। ରବିବାର ରାତିରେ ହାତୀପଲ ଗୌରୀଗଦା ଗ୍ରାମର ସୁଦର୍ଶନ ପାତ୍ରଙ୍କ ଘର ଭାଙ୍ଗି ୨ କୁଇଣ୍ଟାଲ ଧାନ ଓ ୫୦ କେଜି ଚାଉଳ ଖାଇବା ସହ ଘର ବାଡ଼ିରେ ଲାଗିଥିବା ପନିପରିବା ଗଛକୁ ନଷ୍ଟ କରିଛନ୍ତି। ସେହିପରି ଟିକରପଡ଼ା ଗ୍ରାମର ବାୟା ମାଝୀଙ୍କ ଘର ମଧ୍ୟ ଭାଙ୍ଗି ଦେଇଥିବା ସୂଚନା ମିଳିଛି।
