ଦିଗପହଣ୍ଡି,୧୦|୮(ଅଶେଷ ନାଥ ମିଶ୍ର) ଗଞ୍ଜାମ ଜିଲା ଦିଗପହଣ୍ଡି ଏନଏସି ୧ ନଂ ୱାର୍ଡ ରାଜପୁର ରୋଡରେ ରହୁଥିବା ଅବସରପ୍ରାପ୍ତ ପ୍ରଧାନଶିକ୍ଷକ ଭାସ୍କର ସାହୁଙ୍କ ଘର ସମ୍ମୁଖ କବାଟ ତାଲା ଭାଙ୍ଗି ଦୁର୍ବୃତ୍ତମାନେ ଘରୁ ପ୍ରାୟ ୩୦ ଭରି ଓଜନର ସୁନା ଅଳଙ୍କାର,୫୦ ଭରି ଓଜନର ରୂପା ଅଳଙ୍କାର , ନଗଦ ୮ ଲକ୍ଷ ଟଙ୍କା ଓ ୨ ଟି ଏଟିଏମ କାର୍ଡ ଲୁଟି ନେଇଥିବା ଅଭିଯୋଗ ହୋଇଛି। ରବିବାର ଭାସ୍କର ତାଙ୍କ ସ୍ତ୍ରୀଙ୍କୁ ନେଇ ଗୋଳନ୍ଥରା ଥାନା ମନ୍ତ୍ରିଡି ଗ୍ରାମରେ ରହୁଥିବା ଜଣେ ସମ୍ପର୍କୀୟଙ୍କ ଶୁଦ୍ଧି କ୍ରିୟା ଭୋଜିରେ ଯୋଗଦେବାକୁ ଯାଇଥିଲେ। ଭାସ୍କରଙ୍କ ପୁଅ ଅଜିତ ସନ୍ଧ୍ୟା ପ୍ରାୟ ୬ ଟାରେ ବ୍ୟାଟ ମିଣ୍ଟନ ଖେଳିବାକୁ ଦିଗପହଣ୍ଡି ଇଣ୍ଡୋର ଷ୍ଟାଡିୟମକୁ ଯାଇଥିଲେ। ରାତି ପ୍ରାୟ ସାଢେ ଢେ ୯ ଟାରେ ସେ ଘରକୁ ଫେରିବା ପରେ ଘର ତାଲା ଭଙ୍ଗା ଯାଇଥିବା ଦେଖିଥିଲେ। ଦୁର୍ବୃତ୍ତ ମାନେ ଘର ଭିତରେ ଥିବା ୨ଟି ଗଡ଼ରେଜ୍ ଆଲମିରା ଚାବି ଭାଙ୍ଗି ଲକର୍ ତାଡି ଦେଇ ସେଥିରେ ଥିବା ସୁନା ରୂପା ଅଳଙ୍କାର ଓ ଟଙ୍କା ଚୋରି କରି ନେଇଯାଇଥିବା ଜାଣିବାକୁ ପାଇଥିଲେ। ଅଜିତ ଏ ନେଇ ଦିଗପହଣ୍ଡି ପୋଲିସକୁ ସୂଚନା ଦେବାପରେ ପୋଲିସ ଟିମ୍ ଘଟଣାସ୍ଥଳରେ ପହଞ୍ଚି ସବିଶେଷ ତଦନ୍ତ କରି ଫେରିଥିଲେ। ଏନେଇ ଅଜିତ ଥାନାରେ ଏତଲା ଦେବାପରେ ଆଇଆଇସି କିଶୋର କୁମାର ସାମଲ ମାମଲା ନଂ.୩୨୪/୨୬ ଅନୁଯାୟୀ ମକଦ୍ଦମା ରୁଜୁ କରିଥିଲେ। ସୋମବାର ଆଇଆଇସିଙ୍କ ନେତୃତ୍ୱରେ ବ୍ରହ୍ମପୁରରୁ ଆସିଥିବା ପୋଲିସ ସାଇଣ୍ଟିଫିକ୍ ଟିମ୍ ଓ ଡଗ ସ୍କୁଆର୍ଡ଼ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ। ପୋଲିସ ସନ୍ଧନୀ କୁକୁର ଭଙ୍ଗାଯାଇଥିବା ତାଲା ଓ ଦୁର୍ବୃତ୍ତ ମାନଙ୍କ ପାଦଚିହ୍ନ ଆଘ୍ରାଣ କରି ଘର ପଛପଟ ଦେଇ ରାଜପୁର ମେନ୍ ରୋଡ଼ କଡ ରେ ଥିବା ଜଣେ ବ୍ୟକ୍ତିଙ୍କ ଘର ସମ୍ମୁଖରେ ଦୀର୍ଘ ସମୟ ଅଟକି ରହି ଭୁକିଥିଲା। ଉକ୍ତ ଘରେ ତାଲା ପଡିଥିବାରୁ ପୋଲିସ ଘରେ ରହୁଥିବା ବ୍ୟକ୍ତିଙ୍କୁ ଯୋଗାଯୋଗ କରି ତଥ୍ୟ ସଂଗ୍ରହ ପାଇଁ ଥାନାକୁ ଡକାଇଥିବା ଜଣାପଡିଛି। ଭାସ୍କର ତାଙ୍କ ପୁଅ ବାହାଘର ପାଇଁ ସୁନା,ରୂପା ଅଳଙ୍କାର ଓ ନଗଦ ଟଙ୍କା ରଖିଥିଲେ ବୋଲି ପୋଲିସକୁ କହିଛନ୍ତି। ଚୋରି ଯିବାପରେ ଭାସ୍କରଙ୍କ ସମେତ ପରିବାର ଲୋକେ ଦୁଃଖରେ ମ୍ରିୟମାଣ ହୋଇପଡିଛନ୍ତି। ଭାସ୍କରଙ୍କ ଘରକୁ ଲାଗି ଅନ୍ୟମାନଙ୍କ ଘର ଥିବା ବେଳେ ଜନଗହଳି ପୂର୍ଣ୍ଣ ରାଜପୁର ରୋଡ଼ରେ ସନ୍ଧ୍ୟା ସମୟରେ ଲୋକେ ଯାତାୟାତ କରୁଥିବା ବେଳେ ଏଭଳି ବଡ଼ ଧରଣର ଚୋରି ସମସ୍ତଙ୍କୁ ଆଶ୍ଚର୍ଯ୍ୟାନ୍ଵିତ କରିଛି।
