ଭୁବନେଶ୍ୱର, ୧୭।୮(ବ୍ୟୁରୋ)/ପୁରୁଣା ଭୁବନେଶ୍ୱର (ଡି.ଏନ୍.ଏ.): ଶଟ୍ଡାଉନ୍ ଓ କଟକଣା ସତ୍ତ୍ୱେ ଭୁବନେଶ୍ୱରରେ ଖୁଲମ୍ଖୁଲା ବିକ୍ରି ହେଉଥିଲା ମଦ। ଏହାର ଭିଡିଓ ଭାଇରାଲ ହେବା ପରେ ପୋଲିସ ଓ ବିଏମ୍ସିର ଚେତା ପଶିଥିଲା। ରବିବାର ଗ୍ୟାରେଜ ଛକରେ ଥିବା ହୋଟେଲ ଉତ୍କଳ ଇନ୍ ବାର୍ରେ ଲିଙ୍ଗରାଜ ଥାନା ପୋଲିସ ଓ ବିଏମ୍ସିର ଅଧିକାରୀ ଚଢ଼ାଉ କରିଥିଲେ। ହୋଟେଲକୁ ସିଲ୍ କରାଯିବା ସହ ଗେଟ୍ରେ କରୋନା କଟକଣା ନେଇ ପୋଷ୍ଟର ଲଗାଯାଇଛି। ପରବର୍ତ୍ତୀ ଆଦେଶ ପର୍ଯ୍ୟନ୍ତ ଉକ୍ତ ହୋଟେଲ ବନ୍ଦ ରହିବ। ଏହି ବାର୍ଟି ଐତିହାସିକ ମୁକ୍ତେଶ୍ୱର ଓ କେଦାରଗୌରୀ ମନ୍ଦିର ପାଚେରିକୁ ଲାଗି ରହିଥିବାବେଳେ ନିକଟରେ ସ୍କୁଲ୍ ଓ କଲୋନୀ ରହିଛି। ସେହିଭଳି ସହରର ମୁଖ୍ୟ ୭ ନଂ. ଡ୍ରେନ୍କୁ ଜବରଦଖଲ କରାଯାଇ ଏହା ଉପରେ ବାର୍ଟି କରାଯାଇଛି। ଏଠାରେ ମଧ୍ୟ ଏଏସ୍ଆଇର ଆମ୍ସାର ଆକ୍ଟ କଟକଣା ମଧ୍ୟ ରହିଛି। ଏହା ସତ୍ତ୍ୱେ ଏଭଳି ଏକ ସମ୍ବେଦନଶୀଳ ସ୍ଥାନରେ କିପରି ସରକାର ବାର୍ ଖୋଲିବାକୁ ଅନୁମତି ଦେଲେ ତାହାକୁ ନେଇ ପ୍ରଶ୍ନ ଉଠୁଛି। କେବଳ ଉକ୍ତ ହୋଟେଲ ନୁହେଁ, କଟକରୋଡ୍ର ଏକାଧିକ ବାର୍, ହୋଟେଲରେ ଶଟ୍ଡାଉନରେ ମଦ କାରବାର ଚାଲିଥିଲା। ଘଟଣା ପରେ ତାଲା ଝୁଲୁଥିଲେ ମଧ୍ୟ କର୍ମଚାରୀମାନେ ନିକଟରେ ରହି ଗ୍ରାହକଙ୍କୁ ଲୁଚାଛପାରେ ମଦ ଧରାଇ ଦେଉଥିବା ଦେଖିବାକୁ ମିଳିଥିଲା।
