ଭୁବନ, ୪।୫(ଡି.ଏନ୍.ଏ.): ଢେଙ୍କାନାଳ ଜିଲା ଭୁବନ ଥାନା ଯମୁନାକୋଟ ଗ୍ରାମ ନିକଟ ରେଳଧାରଣାରେ ବୁଧବାର ଅପରାହ୍ନରେ ଏକ ଅଭାବନୀୟ ଘଟଣା ଘଟିଛି। ଦ୍ରୁତଗତିରେ ଆସୁଥିବା ଏକ ହାଇଓ୍ବା (ନଂ. ଓଡ଼ି ୦୪ ଏନ୍ ୧୦୯୬) ଭାରସାମ୍ୟ ହରାଇ ଓଭରବ୍ରିଜ୍ ଉପରୁ ରେଳଧାରଣାକୁ ଖସିପଡ଼ିଛି। ଏଥିରେ ଡ୍ରାଇଭର ପ୍ରଶାନ୍ତ ପାତ୍ର ଗୁରୁତର ହୋଇଛନ୍ତି।
ସୂଚନାଯୋଗ୍ୟ, ଯାଜପୁର ଜିଲା ଡୁବୁରି ଅଞ୍ଚଳର ଉକ୍ତ ହାଇଓ୍ବା ଯମୁନାକୋଟ ଓଢ଼ଣା ବାଲିଘାଟକୁ ବାଲି ଆଣିବାକୁ ଯାଉଥିଲା। ୫୩ନଂ ଜାତୀୟ ରାଜପଥର ମାର୍ଥାପୁର-ଯମୁନାକୋଟ ରାସ୍ତାରେ ଡ୍ରାଇଭର ଭାରସାମ୍ୟ ହରାଇବାରୁ ଗାଡ଼ିଟି ୨୦ ଫୁଟ ଉଚ୍ଚ ରେଲଓ୍ବେ ଓଭରବ୍ରିଜ୍ରୁ ରେଳଲାଇନ୍କୁ ଖସିପଡ଼ିଥିଲା। ରେଳ ଧାରଣାରେ ଛିଟିକି ପଡ଼ିଥିବା ଡ୍ରାଇଭର ପ୍ରଶାନ୍ତଙ୍କୁ ୧୦୮ ଆମ୍ବୁଲାନ୍ସରେ ଭୁବନ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରକୁ ଅଣାଯାଇଥିଲା। ତାଙ୍କ ଅଣ୍ଟାରେ ଶକ୍ତ ଆଘାତ ଲାଗିଛି। ତାଙ୍କୁ ଜିଲା ମୁଖ୍ୟ ଚିକିତ୍ସାଳୟକୁ ସ୍ଥାନାନ୍ତର କରାଯାଇଛି। ରେଳଧାରଣା ଉପରେ ଗାଡ଼ି ପଲଟିଯାଇଥିବାରୁ ମାଲବାହୀ ଟ୍ରେନ୍ ଚଳାଚଳ ବାଧାପ୍ରାପ୍ତ ହେବା ଆଶଙ୍କା ଦେଖାଦେଇଛି। ଅନ୍ୟପଟେ ଭୁବନ ପୋଲିସ ଘଟଣାସ୍ଥଳରେ ପହଞ୍ଚତ୍ ତଦନ୍ତ ଆରମ୍ଭ କରିଛି।
