ଅନୁଗୋଳ ଅଫିସ, ୧୯।୧୨: ଅନୁଗୋଳ ସହର ନାରଣସାଗର ନିକଟରେ ଶନିବାର ରାତିରେ ଗଣ୍ଡଗୋଳ ବେଳେ ବାଇକ୍ରେ ପାଟ୍ରୋଲିଂ କରୁଥିବା ଜଣେ ପୋଲିସ କର୍ମଚାରୀଙ୍କୁ ଗଣ୍ଡଗୋଳକାରୀ ଯୁବକମାନେ ଧକ୍କାମାରି ଖସିଯିବା ଚର୍ଚ୍ଚାର ବିଷୟ ହୋଇଛି। ସୂଚନା ଅନୁଯାୟୀ, ୪ରୁ ୫ ଜଣ ଯୁବକ ସନ୍ଧ୍ୟାରେ କାଫେ ଅଞ୍ଚଳକୁ ଚା ପିଇବାକୁ ଆସିଥିଲେ। ସେମାନଙ୍କ ନଜର ଅନ୍ୟ ଜଣେ ଯୁବକଙ୍କ ଉପରେ ପଡ଼ିବା ପରେ ତାଙ୍କୁ ସଂଘବଦ୍ଧ ଆକ୍ରମଣ କରାଯାଇଥିଲା। ଏପରି କି ପଥର ଓ କାଫେ ସେଣ୍ଟରର ଚେୟାର ଉଠାଇ ମାରଧର କରାଯାଇଥିଲା। ଏହି ଗଣ୍ଡଗୋଳ ଯୋଗୁ କାଫେ ମାଲିକଙ୍କ କେତୋଟି ଟେବୁଲ ଚେୟାର ଭାଙ୍ଗିଯାଇଥିବା ବ୍ୟବସାୟୀ ଜଣଙ୍କ କହିଛନ୍ତି। ତେବେ ଗଣ୍ଡଗୋଳ ବେଳେ ବାଇକରେ ପାଟ୍ରୋଲିଂ କରୁଥିବା ପୋଲିସ ପହଞ୍ଚିବାରୁ ଗଣ୍ଡଗୋଳକାରୀ ଯୁବକମାନେ ତାଙ୍କୁ ଧକ୍କା ମାରିଥିଲେ। ଗାଳିଗୁଲଜ କରି ସେଠାରୁ ଖସିଯାଇଥିଲେ। ପରେ ପିସିଆର୍ ଭ୍ୟାନ ପହଞ୍ଚି ଘଟଣାସ୍ଥଳରୁ ଜଣେ ଯୁବକ ଓ ଏକ ମୋଟରସାଇକେଲ ଥାନାକୁ ନେଇଥିବା ଜଣାପଡ଼ିଛି।
