ନୂଆଦିଲ୍ଲୀ,୧୭।୧୦ : ତାମିଲନାଡୁ ମୁଖ୍ୟମନ୍ତ୍ରୀ ଏମ୍.କେ. ଷ୍ଟାଲିନ ରବିବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ପତ୍ର ଲେଖି ଅଣହିନ୍ଦୁ ଭାଷାଭାଷୀ ଲୋକଙ୍କ ଉପରେ ହିନ୍ଦୀ ଲଦିଦେବା ଲାଗି କେନ୍ଦ୍ର ସରକାରଙ୍କ ଉଦ୍ୟମକୁ ବିରୋଧ କରିଛନ୍ତି। ଏହା ଅପ୍ରାସଙ୍ଗିକ, ବିଭାଜନକାରୀ ଏବଂ ଗଣତାନ୍ତ୍ରିକ ନୀତି ବିରୋଧୀ ବୋଲି ସେ କହିଛନ୍ତି। ହିନ୍ଦୀ ଭାଷାଭାଷୀ ଅଞ୍ଚଳରେ ଆଇଆଇଟି ସମେତ ସମସ୍ତ ବୈଷୟିକ ଓ ଅଣବୈଷୟିକ ଉଚ୍ଚ ଶିକ୍ଷାନୁଷ୍ଠାନରେ ହିନ୍ଦୀକୁ ଶିକ୍ଷାଦାନର ମାଧ୍ୟମ କରାଯିବା ସହ ଅନ୍ୟାନ୍ୟ ରାଜ୍ୟରେ ଆଞ୍ଚଳିକ ଭାଷାରେ ଶିକ୍ଷାଦାନ ଲାଗି ନିକଟରେ ଏକ ସଂସଦୀୟ କମିଟି ସୁପାରିସ କରିଥିଲେ।
ଜାତିସଂଘରେ ମଧ୍ୟ ହିନ୍ଦୀକୁ ଅନ୍ୟତମ ଆନୁଷ୍ଠାନିକ ଭାଷା କରାଯିବା ଉଚିତ ବୋଲି କମିଟି କହିଥିଲା। ବଳ ପୂର୍ବକ ହିନ୍ଦୀ ଲଦିଦିଆଯିବାକୁ ବିରୋଧ କରି ଷ୍ଟାଲିନ୍ କେନ୍ଦ୍ର ସରକାରଙ୍କୁ ସତର୍କ କରାଇଥିଲେ। ଦେଶରେ ହିନ୍ଦୀ ଭାଷାଭାଷୀଙ୍କ ତୁଳନାରେ ଅନ୍ୟ ଭାଷାରେ କଥା ହେଉଥିବା ଲୋକଙ୍କ ସଂଖ୍ୟା ଅଧିକ। ପ୍ରତ୍ୟେକ ଭାଷାର ନିଜସ୍ବ ବିଶେଷତ୍ୱ ରହିଛି ବୋଲି ଷ୍ଟାଲିନ୍ ତାଙ୍କ ପତ୍ରରେ ଲେଖିଛନ୍ତି। କୌଣସି ଭାଷାକୁ ଜୋର ଜବରଦସ୍ତ ଲଦି ଦିଆଯିବା ଆମ ସମ୍ବିଧାନର ସଂଘୀୟ ବ୍ୟବସ୍ଥା ବିରୋଧୀ ହୋଇଥିବାରୁ ପ୍ରଧାନମନ୍ତ୍ରୀ ଏହାକୁ ବିଚାରକୁ ନେବା ଲାଗି ଡିଏମ୍କେ ନେତା ଅନୁରୋଧ କରିଛନ୍ତି।
