ଢେଙ୍କାନାଳ ଅଫିସ, ୧୯।୬
ଜାତୀୟ ରାଜପଥ (ଏନ୍ଏଚ୍) ଉପରେ ନିର୍ଭର କରେ ଦେଶର ଆର୍ଥିକ ପ୍ରଗତି। ଆନ୍ତଃଜିଲା ଏବଂ ଆନ୍ତଃରାଜ୍ୟ ଗମନାଗମନ ବ୍ୟବସ୍ଥାକୁ ଉନ୍ନତ କରିବା, ବାଣିଜ୍ୟ ବ୍ୟବସାୟ ଲାଗି ମାର୍ଗ ପ୍ରଶସ୍ତ କରିବାକୁ ସରକାର ଏନ୍ଏଚ୍ ନିର୍ମାଣ ତଥା ସମ୍ପ୍ରସାରଣ କରିବା ଦିଗରେ ଅଜସ୍ର ଅର୍ଥ ବ୍ୟୟ କରୁଛନ୍ତି। ହେଲେ ରାସ୍ତା ନିର୍ମାଣ ବେଳେ କଟାଯାଇଥିବା ଗଛର କ୍ଷତି ଭରଣା ହୋଇପାରୁନାହିଁ। ପ୍ରକଳ୍ପ କାର୍ଯ୍ୟରେ ଅହେତୁକ ବିଳମ୍ବ ରାସ୍ତାପାର୍ଶ୍ୱ ବନୀକରଣରେ ବାଧକ ସାଜିଥିବାବେଳେ ଗଛ ବିନା ଶ୍ରୀହୀନ ହୋଇପଡ଼ିଛି ଢେଙ୍କାନାଳ ଜିଲାର ୫୫ନଂ. ରାଜପଥ। ଉକ୍ତ ପ୍ରକଳ୍ପ ନିର୍ମାଣରେ ୧୧ହଜାର ୭୦୦ ଗଛ କଟାଯାଇଥିବାବେଳେ ଗତ ୫ ବର୍ଷ ଭିତରେ ଗୋଟିଏ ବି ଲାଗିପାରିନି, ଯାହାକୁ ନେଇ ଉଦ୍ବେଗ ବ୍ୟକ୍ତ କରିଛନ୍ତି ପରିବେଶବିତ୍।
ଏକଦା ଢେଙ୍କାନାଳ ଜିଲା ଦେଇ ଯାଇଥିବା ୫୫ନଂ. ଜାତୀୟ ରାଜପଥ ପାର୍ଶ୍ୱରେ ଥିବା ଅସଂଖ୍ୟ ଗଛ ପଥଚାରୀଙ୍କ କ୍ଲାନ୍ତି ମେଣ୍ଟାଉଥିଲା। ହେଲେ ଏବେ ପରିସ୍ଥିତି ବଦଳିଯାଇଛି। ଏନ୍ଏସ୍ ସମ୍ପ୍ରସାରଣରେ ପର୍ଯ୍ୟାୟକ୍ରମେ ୧୧ହଜାର ୭୦୦ ଗଛ କଟାଯାଇଛି। ଯେଉଁ ରାସ୍ତାରେ ଘଞ୍ଚ ବୃକ୍ଷରାଜି ଲାଗି ଖରାଦିନେ ସୂର୍ଯ୍ୟ କିରଣ ପଡ଼ିବା କଷ୍ଟକର ହେଉଥିଲା, ସେଠାରେ ଖରାଦିନେ ବାଟୋଇ ଛାଇ ଟିକିଏ ପାଉନାହାନ୍ତି। ପ୍ରକଳ୍ପ କାର୍ଯ୍ୟରେ ବିଳମ୍ବ ବନ ବିଭାଗର ଚାରା ରୋପଣରେ ସମସ୍ୟା ସୃଷ୍ଟି କରିଥିବାବେଳେ ପରିବେଶର ଏଭଳି ଅବକ୍ଷୟ ଚିନ୍ତାଜନକ ହୋଇଛି।
ସୂଚନାଯୋଗ୍ୟ, ଢେଙ୍କାନାଳ ସଦର ଥାନା ବଦଳଦିଆବନ୍ଧଠାରୁ ଓଡ଼ାପଡ଼ା ବ୍ଲକର ମେରାମଣ୍ଡଳୀ ପର୍ଯ୍ୟନ୍ତ ଏନ୍ଏଚ୍ ୫୫ର ପ୍ରାୟ ୬୦ କିଲୋମିଟର ରାସ୍ତା ସମ୍ପ୍ରସାରଣ ଚାଲିଛି। ଫଳରେ ରାସ୍ତାର ଉଭୟ ପାର୍ଶ୍ୱରୁ ଶାଳ, ପିଆଶାଳ, ଶିଶୁ, ଶାଗୁଆନ, ବର, ଆମ୍ବ, ନିମ୍ବ, ବଡ ଚାକୁଣ୍ଡା, ଜାମୁ ଭଳି ମୂଲ୍ୟବାନ ଗଛ କାଟି ପଦା କରିଦିଆଯାଇଛି। ନିୟମ ଅନୁଯାୟୀ, ଯେତିକି ଗଛ କଟାଯିବ ଜଙ୍ଗଲ ଜମି କ୍ଷେତ୍ରରେ ଏହାର ୨ ଗୁଣା ଏବଂ ଅଣ ଜଙ୍ଗଲ ଜମି କ୍ଷେତ୍ରରେ ୧୦ ଗୁଣା ଚାରା ରୋପଣ କରାଯିବାକୁ ଗାଇଡ୍ ଲାଇନ୍ ରହିଛି। ୫୫ନଂ. ଜାତୀୟ ରାଜପଥ ସମ୍ପ୍ରସାରଣରେ ଅଣଜଙ୍ଗଲ ଜମିରୁ ୧୧ ହଜାର ୭୦୦ ଗଛ କଟାଯାଇଛି। ତଦନୁଯାୟୀ ୧ଲକ୍ଷ ୭୦ହଜାର ଚାରା ରୋପଣ କରାଯିବା କଥା। ଏଥିଲାଗି ଜାତୀୟ ରାଜପଥ ପ୍ରାଧିକରଣ କର୍ତ୍ତୃପକ୍ଷ (ଏନ୍ଏଚ୍ଏଆଇ) ପକ୍ଷରୁ ବନ ବିଭାଗକୁ ଅର୍ଥ ପ୍ରଦାନ କରାଯାଇଛି। କିନ୍ତୁ ପ୍ରକଳ୍ପ ଶେଷ ହୋଇପାରୁ ନ ଥିବାରୁ ଚାରା ରୋପଣରେ ଅନିଶ୍ଚିତତା ଲାଗି ରହିଛି।
ସୂଚନାଯୋଗ୍ୟ, ୫୫ନଂ. ଜାତୀୟ ରାଜପଥ ନିର୍ମାଣ କାର୍ଯ୍ୟ ୨୦୨୦ ସୁଦ୍ଧା ଶେଷ କରିବାକୁ ଲକ୍ଷ୍ୟ ରଖାଯାଇଥିଲା। କରୋନା ମହାମାରୀ କାରଣରୁ ଏଥିରେ ବିଳମ୍ବ ହୋଇଥିଲା। ଏହାପରେ ପୁନର୍ବାର ୨୦୨୧ ସେପ୍ଟେମ୍ବର ସୁଦ୍ଧା ପ୍ରକଳ୍ପ ଶେଷ କରିବାକୁ ବିଭାଗୀୟ କର୍ତ୍ତୃପକ୍ଷ ଯୋଜନା କରିଥିଲେ। ତେବେ କରୋନାର ଦ୍ୱିତୀୟ ଲହର ଏବଂ ଏବେ ବର୍ଷା ଆରମ୍ଭ ହୋଇସାରିଥିବାରୁ କାର୍ଯ୍ୟ କେବେ ସରିବ ତାହା ସ୍ପଷ୍ଟ ହୋଇପାରୁନାହିଁ। ତେଣୁ ବନ ବିଭାଗ ପକ୍ଷରୁ ଅଦ୍ୟାବଧି କାର୍ଯ୍ୟ ଶେଷ ହୋଇଥିବା ରାସ୍ତା ପାର୍ଶ୍ୱରେ ଚାରା ରୋପଣ କରିବାକୁ ପରିବେଶପ୍ରେମୀମାନେ ଦାବି କରିଛନ୍ତି।
ଛାଇ ଖୋଜୁଛନ୍ତି ପଥଚାରୀ
ଜାତୀୟ ରାଜପଥ ସମ୍ପ୍ରସାରଣ କାର୍ଯ୍ୟ ପାଇଁ ପୁରୁଣା ମୂଲ୍ୟବାନ ଗଛକାଟି ପଦା କରିଦିଆଗଲା। ଏନ୍ଏଚ୍ କାର୍ଯ୍ୟ ପାଇଁ ପରିବେଶ ଶ୍ରୀହୀନ ହୋଇପଡ଼ିଛି। ରାସ୍ତା କଡ଼ରେ ସାମୟିକ ବିଶ୍ରାମ ନେବା ଲାଗି ପଥଚାରୀ ଛାଇ ଖୋଜୁଛନ୍ତି। ୫ବର୍ଷ ହେଲା ଚାରା ରୋପଣ କାର୍ଯ୍ୟ ହୋଇପାରୁନାହିଁ।
-ସୁରେନ୍ଦ୍ର ମିଶ୍ର, ଆଇନଜୀବୀ
ପ୍ରକଳ୍ପ ସରିଲେ ଚାରାରୋପଣ
୫୫ନଂ. ଜାତୀୟ ରାଜପଥ ସମ୍ପ୍ରସାରଣ ପ୍ରକଳ୍ପ କାର୍ଯ୍ୟ ଶେଷ ହେଉନାହିଁ। ଫଳରେ ଚାରା ରୋପଣ କରିବାରେ ସମସ୍ୟା ଉପୁଜୁଛି। ଚାରା ଲଗାଇବା ଲାଗି ଏନ୍ଏଚ୍ଏଆଇ ଟଙ୍କା ଡିପୋଜିଟ୍ କରି ସାରିଲେଣି। ପ୍ରକଳ୍ପ କାର୍ଯ୍ୟ ଶେଷ ହେଲେ ବନ ବିଭାଗ ପକ୍ଷରୁ ଚାରା ରୋପଣ କରାଯିବ।
– ଡ. ପ୍ରକାଶଚାନ୍ଦ ଗୋଗିନେନି, ଡିଏଫ୍ଓ
ରାଜ୍ୟ ସରକାର ଗୁରୁତ୍ୱ ଦେବା ଜରୁରୀ
କୌଣସି ପ୍ରକଳ୍ପ ଲାଗି ଗଛ କଟାଗଲେ ଚାରା ରୋପଣ କରି କ୍ଷତି ଭରଣା କରାଯିବ ବୋଲି କେନ୍ଦ୍ରୀୟ ଗାଇଡ୍ ଲାଇନ୍ ରହିଛି। ୫୫ନଂ. ଜାତୀୟ ରାଜପଥ ସମ୍ପ୍ରସାରଣରେ କଟାଯାଇଥିବା ଗଛ ସ୍ଥାନରେ ନୂଆ ଚାରା ଲଗାଇବାକୁ ଜାଗା ନିରୂପଣ ସରିଛି। ହେଲେ ଅଦ୍ୟାବଧି ଗଛ ଲାଗୁନାହିଁ। ମୌସୁମୀ ବର୍ଷା ବନୀକରଣ ଲାଗି ପ୍ରକୃଷ୍ଠ ସମୟ ହୋଇଥିବାବେଳେ ଏଥି ଲାଗି ରାଜ୍ୟ ସରକାର ଗୁରୁତ୍ୱ ଦେବା ଜରୁରୀ।
– ପ୍ରଦ୍ୟୁମ୍ନ ରଥ, ପରିବେଶବିତ୍
