ଗଞ୍ଜାମ, ୨୭।୬ (ବିଦ୍ୟାଧର ସାହୁ): ଗଞ୍ଜାମ ଜିଲାର ଗଞ୍ଜାମ ବ୍ଲକ ଅନ୍ତର୍ଗତ ଋଷିକୁଲ୍ୟା ମୁହାଣ ପୁରୁଣାବନ୍ଧଠାରୁ ପ୍ରୟାଗୀ ପର୍ଯ୍ୟନ୍ତ ବେଳାଭୂମି ଗତ କିଛି ଦିନ ଧରି ଦ୍ରୁତ ଗତିରେ ଅବକ୍ଷୟ ହେଉଥିବା ଦେଖାଯାଉଛି। ବିଶେଷକରି ଗୋଖରକୁଦାଠାରୁ ବଟେଶ୍ୱର ମନ୍ଦିର ବେଳାଭୂମି ପର୍ଯ୍ୟନ୍ତ ସମୁଦ୍ର କୂଳର ଦ୍ରୁତ ଅବକ୍ଷୟ ସ୍ଥାନୀୟ ଲୋକଙ୍କ ଚିନ୍ତା ବଢ଼ାଇଛି।
ଉଚ୍ଚ ଜୁଆରର ପ୍ରଭାବରେ ସମୁଦ୍ର କୂଳ ଲଂଘି ଆଗକୁ ମାଡ଼ି ଆସୁଥିବାରୁ ବେଳାଭୂମି ଧୀରେ ଧୀରେ ନଷ୍ଟ ହେଉଛି। ଏହା ସହିତ ବଟେଶ୍ୱର ମନ୍ଦିରରୁ ସମୁଦ୍ର କୂଳକୁ ସଂଯୋଗ କରୁଥିବା ରାସ୍ତା ମଧ୍ୟ ଜୁଆର ମାଡ଼ରେ କ୍ଷତିଗ୍ରସ୍ତ ହୋଇପଡ଼ିଛି। ଫଳରେ ଉପକୂଳବର୍ତ୍ତୀ ଅଞ୍ଚଳର ଲୋକଙ୍କ ମଧ୍ୟରେ ଭୟ ଓ ଅନିଶ୍ଚିତତାର ପରିବେଶ ସୃଷ୍ଟି ହୋଇଛି।
ବିଶେଷଜ୍ଞମାନଙ୍କ ମତରେ, ଏଭଳି ସ୍ଥିତି ଜାରି ରହିଲେ ଆଗାମୀ କିଛି ବର୍ଷ ମଧ୍ୟରେ କଣ୍ଟିଆଗଡ଼, ନୋଳିଆଗାଁ ସମେତ ଅନ୍ୟାନ୍ୟ ଉପକୂଳବର୍ତ୍ତୀ ଅଞ୍ଚଳ ଗୁରୁତର ବିପଦର ସମ୍ମୁଖୀନ ହୋଇପାରେ। ସମୁଦ୍ର କୂଳ ଲଂଘିବା ସହ ବେଳାଭୂମି ପ୍ରାୟ ସମ୍ପୂର୍ଣ୍ଣ ଭାବେ କ୍ଷୟ ହେବାକୁ ବସିଛି। ସେହିପରି ସୁରକ୍ଷା କବଚ ଭାବେ କାମ କରୁଥିବା ଝାଉଁ ଜଙ୍ଗଲ ମଧ୍ୟ ନଷ୍ଟ ହେବାରେ ଲାଗିଛି।
ଏହାର ପ୍ରଭାବ ପର୍ଯ୍ୟଟନ ଉପରେ ମଧ୍ୟ ପଡ଼ିଛି। ବଟେଶ୍ୱର ପୀଠକୁ ଆସୁଥିବା ପର୍ଯ୍ୟଟକମାନେ ସମୁଦ୍ର କୂଳକୁ ଗଲେ ପୂର୍ବଭଳି ବୁଲିବା ପାଇଁ ବେଳାଭୂମି ପାଉନାହାନ୍ତି। ଫଳରେ ପର୍ଯ୍ୟଟକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଉଛି।
ସ୍ଥାନୀୟ ଲୋକଙ୍କ କହିବା ଅନୁଯାୟୀ, ବର୍ତ୍ତମାନ ଯେପରି ଭାବରେ ବେଳାଭୂମିର ଅବକ୍ଷୟ ଘଟୁଛି, ତାହାର ସ୍ଥାୟୀ ପ୍ରତିକାର ପାଇଁ ସରକାର ଓ ପ୍ରଶାସନ ତୁରନ୍ତ ପଦକ୍ଷେପ ନ ନେଲେ ଭବିଷ୍ୟତରେ ବଡ଼ ଧରଣର ବିପର୍ଯ୍ୟୟ ଘଟିପାରେ। ଏହି ସମସ୍ୟାର ସ୍ଥାୟୀ ସମାଧାନ ପାଇଁ ରାଜ୍ୟ ଓ କେନ୍ଦ୍ର ସରକାର ଗୁରୁତ୍ୱ ଦେବା ଆବଶ୍ୟକ ବୋଲି ବୁଦ୍ଧିଜୀବୀମାନେ ମତ ପ୍ରକାଶ କରିଛନ୍ତି।
ସୂଚନାଯୋଗ୍ୟ ଯେ, ୨୦୦୬–୦୭ ମସିହାରେ ଏହିଭଳି ଉଚ୍ଚ ଜୁଆର ଓ ସମୁଦ୍ର କୂଳ ଲଂଘିବା ଫଳରେ ପୁରୁଣା ପୋଡ଼ମପେଟା ଗ୍ରାମର ଅନେକ ଘର ଭାଙ୍ଗିଯାଇଥିଲା। ଏଥିସହ ମତ୍ସ୍ୟଜୀବୀଙ୍କ ଜାଲ ଓ ଡଙ୍ଗା ମଧ୍ୟ ସମୁଦ୍ରରେ ଭାସିଯାଇଥିଲା। ପରେ ବାରମ୍ବାର ସମୁଦ୍ର କ୍ଷୟ ଘଟିବାରୁ ୨୦୧୨ ମସିହାରେ ପ୍ରଶାସନ ପକ୍ଷରୁ ପ୍ରାୟ ୧୪୨ଟି ପରିବାରକୁ ସ୍ଥାନାନ୍ତର କରାଯାଇଥିଲା। ବର୍ତ୍ତମାନ ସେମାନେ ରାମଗଡ଼ ପଞ୍ଚାୟତ ଅଧୀନରେ ବସବାସ କରୁଛନ୍ତି।
ସେହିପରି ଫାଇଲିନ୍ ବାତ୍ୟା ପରେ ଡିଆର୍ପି (DRP) ଯୋଜନାରେ ବଳକା ପରିବାରମାନଙ୍କୁ ମୟୁରପଦା ନିକଟରେ ଥଇଥାନ କରାଯାଇଥିଲା।
ଅନ୍ୟପଟେ, ବେଳାଭୂମିର ଅବକ୍ଷୟ ଯୋଗୁ ୨୦୨୧ ମସିହାରେ ଋଷିକୁଲ୍ୟା ମୁହାଣ ବେଳାଭୂମିରେ ବିରଳ ଅଲିଭ୍ ରିଡଲେ ସାମୁଦ୍ରିକ କଇଁଛଙ୍କ ଗଣ ଅଣ୍ଡାଦାନ ପ୍ରକ୍ରିୟା ସମ୍ପୂର୍ଣ୍ଣ ବାଧାପ୍ରାପ୍ତ ହୋଇଥିଲା। ଚଳିତ ବର୍ଷ ଏହି ଗଣ ଅଣ୍ଡାଦାନ ସଫଳ ହୋଇଥିଲେ ମଧ୍ୟ, ବର୍ତ୍ତମାନ ଯେପରି ବେଳାଭୂମିର ଦ୍ରୁତ ଅବକ୍ଷୟ ଘଟୁଛି, ସେଥିରୁ ଆଗାମୀ ଦିନରେ କଇଁଛଙ୍କ ଗଣ ଅଣ୍ଡାଦାନ ପ୍ରକ୍ରିୟା ପୁଣିଥରେ ବାଧାପ୍ରାପ୍ତ ହେବାର ଆଶଙ୍କା ରହିଛି।
ବୁଦ୍ଧିଜୀବୀମାନଙ୍କ ମତରେ, ଏହି ସମସ୍ୟାର ଶୀଘ୍ର ସ୍ଥାୟୀ ସମାଧାନ ନ କରାଗଲେ ଆଗାମୀ ଦିନରେ ଉପକୂଳବର୍ତ୍ତୀ ବିସ୍ତୀର୍ଣ୍ଣ ଅଞ୍ଚଳ ସମୁଦ୍ର ଗର୍ଭରେ ଲୀନ ହେବାର ଆଶଙ୍କାକୁ ଏଡ଼ାଇ ହେବ ନାହିଁ।
