କଟକ,୨୫ା୭ (କାର୍ତ୍ତିକ ସାହୁ):ଗ୍ୟାଙ୍ଗଷ୍ଟର ଟିଟୋ ଓରଫ ସୟଦ ଉସ୍ମାନ ଅଲ୍ଲୀଙ୍କୁ ଗିରଫ କରିବା ପାଇଁ ହାଇକୋର୍ଟ ସୋମବାର କେନ୍ଦ୍ରାପଡ଼ା ପୋଲିସକୁ ନିର୍ଦ୍ଦେଶ ଦେଇଛନ୍ତି। ହାଇକୋର୍ଟ ବିଚାରପତି ସଙ୍ଗମ କୁମାର ସାହୁ ମାମଲାର ଶୁଣାଣି କରି ଟିଟୋ ହାଇକୋର୍ଟଙ୍କ ସର୍ତ୍ତ ଖିଲାପ କରିଥିବାରୁ ସେ ପୂର୍ବରୁ ପାଇଥିବା ଜାମିନକୁ ଖାରଜ କରିଦେଇଛନ୍ତି।
ସୂଚନା ଅନୁସାରେ, ଟିଟୋ ପୂର୍ବରୁ ଦୁଇଟି ମାମଲାରେ ହାଇକୋର୍ଟରୁ ସର୍ତ୍ତମୂଳକ ଜାମିନ ପାଇଥିଲେ। ପ୍ରତି ସପ୍ତାହରେ ସେ କେନ୍ଦ୍ରାପଡ଼ା ଟାଉନ୍ ଥାନାରେ ହାଜର ହେବା ନିମନ୍ତେ ହାଇକୋର୍ଟ ସର୍ତ୍ତ ରଖିଥିଲେ। ହେଲେ ସର୍ତ୍ତ କୋହଳ କରିବା ନିମନ୍ତେ ଟିଟୋ ହାଇକୋର୍ଟରେ ଆବେଦନ କରିଥିଲେ। ଏହି ମାମଲାର ସୋମବାର ଶୁଣାଣିବେଳେ ସର୍ତ୍ତ ଅନୁସାରେ ଟିଟୋ ଥାନାରେ ପ୍ରତି ସପ୍ତାହରେ ହାଜର ହେଉ ନ ଥିବା ନେଇ କେନ୍ଦ୍ରାପଡ଼ା ଟାଉନ୍ ଥାନା ପୋଲିସ ହାଇକୋର୍ଟଙ୍କୁ ଅବଗତ କରାଇଥିଲା। ତଦନ୍ତକାରୀ ଅଧିକାରୀଙ୍କ ନିକଟରେ ହାଜର ହେଉ ନ ଥିବା ଜାଣିବା ପରେ ହାଇକୋର୍ଟ ପୁଣି ଟିଟୋଙ୍କୁ ଗିରଫ କରିବାକୁ ନିର୍ଦ୍ଦେଶ ଦେଇଛନ୍ତି।
ଉଲ୍ଲେଖଯୋଗ୍ୟ, ଗ୍ୟାଙ୍ଗଷ୍ଟର ଟିଟୋ ହତ୍ୟା, ବେଆଇନ ବଟି ଆଦାୟ ଭଳି ବହୁ ଆପରାଧିକ ମାମଲାରେ ଜଡ଼ିତ ଥାଇ ପୋଲିସଠାରୁ ଖସି ବୁଲୁଥିଲେ। ତେବେ ୨୦୧୮ ଜୁନ୍ ୩୦ରେ ଯାଜପୁର ଜିଲା ଚଣ୍ଡିଖୋଲ ନିକଟରେ ପୋଲିସ ତାଙ୍କୁ ଏନ୍କାଉଣ୍ଟର କରିଥିଲା। ପରେ ତାଙ୍କୁ ଗିରଫ କରାଯାଇଥିଲା। ଏଥିସହ ଆପରାଧିକ ମାମଲାରେ ସମ୍ପୃକ୍ତ ଟିଟୋଙ୍କର ୨୦ରୁ ଊର୍ଦ୍ଧ୍ୱ ସହଯୋଗୀଙ୍କୁ ମଧ୍ୟ ପୋଲିସ ଗିରଫ କରିଛି।
