ନୂଆଦିଲ୍ଲୀ,୬।୪: ଆମେରିକାରେ ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଏବଂ ତାଙ୍କର ପ୍ରମୁଖ ଉପଦେଷ୍ଟା ତଥା ବିଲିୟନେୟାର ଏଲନ ମସ୍କଙ୍କ ବିରୋଧରେ ହଜାର ହଜାର ଲୋକ ରାସ୍ତାକୁ ଓହ୍ଲାଇଛନ୍ତି। “ହ୍ୟାଣ୍ଡସ ଅଫ” ନାମକ ଏହି ପ୍ରତିବାଦ ଆମେରିକାର ବିଭିନ୍ନ ସହରରେ ଏବଂ ୟୁରୋପର କିଛି ରାଜଧାନୀରେ ଦେଖାଦେଇଛି। ଏହି ପ୍ରତିବାଦ ଟ୍ରମ୍ପ ସରକାରର ନୀତି ଓ ମସ୍କଙ୍କ ଦ୍ୱାରା ପରିଚାଳିତ ସରକାରୀ ଖର୍ଚ୍ଚ କମାଇବା ଯୋଜନା ବିରୋଧରେ କରାଯାଇଛି।
ଆମେରିକାରେ ଏହି ପ୍ରତିବାଦ ପ୍ରାୟ ୧,୦୦୦ରୁ ଅଧିକ ସହରରେ ଆୟୋଜିତ ହୋଇଛି। ବାମପନ୍ଥୀ ସଂଗଠନ ଯଥା ମୁଭ ଅନ ଓ ଉଇମେନ୍ସ ମାର୍ଚ ଏହାର ମୁଖ୍ୟ ଆୟୋଜକ ଥିଲେ।
ପ୍ରତିବାଦକାରୀମାନେ ଟ୍ରମ୍ପଙ୍କ ସରକାରୀ କର୍ମଚାରୀ କମାଇବା, ବ୍ୟବସାୟ ଉପରେ କଠୋର ଟ୍ୟାକ୍ସ ନୀତି ଏବଂ ନାଗରିକ ଅଧିକାର ହ୍ରାସ କରିବା ପ୍ରୟାସକୁ ବିରୋଧ କରିଛନ୍ତି। ଏହା ସହିତ ମସ୍କଙ୍କ ନେତୃତ୍ୱରେ ଗଠିତ “ଡିପାର୍ଟମେଣ୍ଟ ଅଫ ଗଭର୍ନମେଣ୍ଟ ଏଫିସିଏନ୍ସି” (ଡୋଜ) ଯୋଜନାକୁ ମଧ୍ୟ ସେମାନେ ଟାର୍ଗେଟ କରିଛନ୍ତି।
ଓାଶିଂଟନ ଡିସିରେ ହଜାର ହଜାର ଲୋକ ନ୍ୟାସନାଲ ମଲରେ ଏକତ୍ରିତ ହୋଇ ଟ୍ରମ୍ପ ଓ ମସ୍କଙ୍କ ବିରୋଧରେ ସ୍ଲୋଗାନ ଦେଇଥିଲେ। ନିୟୁର୍କ, ହ୍ୟୁଷ୍ଟନ, ଫ୍ଲୋରିଡା ଓ ଲସ ଏଞ୍ଜେଲସରେ ମଧ୍ୟ ବଡ଼ ବଡ଼ ସମାବେଶ ଦେଖିବାକୁ ମିଳିଥିଲା। ୟୁରୋପରେ ମଧ୍ୟ ଏହି ପ୍ରତିବାଦର ପ୍ରଭାବ ଦେଖାଯାଇଛି। ଲଣ୍ଡନରେ ଆମେରିକା-ବ୍ରିଟିଶ ନାଗରିକ ଲିଜ ଚାମ୍ବରଲିନ କହିଛନ୍ତି, “ଆମେରିକାରେ ଯାହା ଘଟୁଛି ତାହା ସମସ୍ତଙ୍କ ସମସ୍ୟା। ଏହା ଅର୍ଥନୈତିକ ପାଗଳାମି, ଟ୍ରମ୍ପ ଆମକୁ ବିଶ୍ୱ ଅବନତି ଆଡ଼କୁ ଠେଲି ଦେଉଛନ୍ତି। ପ୍ରତିବାଦକାରୀମାନେ ଆଶା କରୁଛନ୍ତି ଯେ ଏହି ଆନ୍ଦୋଳନ ଟ୍ରମ୍ପ ଓ ମସ୍କଙ୍କ ନୀତିରେ ପରିବର୍ତ୍ତନ ଆଣିବ। ଏହି ଘଟଣା ବିଶ୍ୱବ୍ୟାପୀ ଆଲୋଚନାର ବିଷୟ ହୋଇଛି, କାରଣ ଏହା କେବଳ ଆମେରିକା ନୁହେଁ, ସାରା ବିଶ୍ୱର ଅର୍ଥନୀତି ଓ ରାଜନୀତି ଉପରେ ପ୍ରଭାବ ପକାଇପାରେ।
୨୦୨୫ ଜାନୁଆରୀ ୨୦ରେ ଡୋନାଲ୍ଡ ଟ୍ରମ୍ପ୍ ଦ୍ୱିତୀୟ ଥର ଆମେରିକାର ରାଷ୍ଟ୍ରପତି ହେବା ପରଠୁ ତାଙ୍କ ପ୍ରଶାସନ ଅନେକ ବିବାଦୀୟ ନୀତି ଆପଣାଇଛି। ଏହି ନିଷ୍ପତ୍ତିଗୁଡ଼ିକ ଯୋଗୁ ଆମେରିକୀୟମାନେ ବହୁଳ ପ୍ରଭାବିତ ହୋଇଥିବା ଦର୍ଶାଇ ବିରୋଧରେ ରାଷ୍ଟ୍ରପତି ଟ୍ରମ୍ପ୍ ଏବଂ ବିବାଦୀୟ ଡିପାର୍ଟମେଣ୍ଟ ଅଫ୍ ଗଭର୍ନମେଣ୍ଟ ଏଫିସିଏନ୍ସି (ଡିଓଜିଇ) ମୁଖ୍ୟ ଏଲନ୍ ମସ୍କଙ୍କ ଉଦ୍ଦେଶ୍ୟରେ ଦେଶବ୍ୟାପୀ ‘ହ୍ୟାଣ୍ଡ୍ସ ଅଫ୍’ ଆନ୍ଦୋଳନ ଚଳାଇଛନ୍ତି। ବିଶେଷକରି ଏପ୍ରିଲ ୫ ଶନିବାର ପୂର୍ବାହ୍ନ ୧୧ଟାରୁ ଏହାକୁ ୫୦ ରାଜ୍ୟରେ ବ୍ୟାପକ କରାଯାଇଛି। ସବୁ କଥାରେ ସରକାରୀ ହସ୍ତକ୍ଷେପକୁ ରୋକିବା ପାଇଁ ସେମାନେ ସ୍ଲୋଗାନ ଦେଉଛନ୍ତି ‘ହ୍ୟାଣ୍ଡ୍ସ ଅଫ୍’। ଆମେରିକାର ବିଭିନ୍ନ ସହର ଓ ଅନ୍ୟ ୬ ଦେଶରେ ଏକକାଳୀନ ୧,୨୦୦ ବିକ୍ଷୋଭର ଆୟୋଜନ କରାଯାଇଛି। ଟ୍ରମ୍ପ୍ ହ୍ବାଇଟ୍ ହାଉସ୍କୁ ଫେରିବା ପରେ ଏହା ହେଉଛି ତାଙ୍କ ବିରୋଧରେ ଗୋଟିଏ ଦିନରେ ସବୁଠୁ ବଡ଼ ବିକ୍ଷୋଭ।
ଟ୍ରମ୍ପ୍ ପ୍ରଶାସନର ପଦକ୍ଷେପ ଯୋଗୁ ଦେଶର ଅର୍ଥନୀତି ପ୍ରଭାବିତ ହେଉଛି। ସେହିପରି ଅନେକ କ୍ଷେତ୍ରରେ ମାନବାଧିକାର ମଧ୍ୟ ଉଲ୍ଲଂଘନ ହେଉଛି। ଏହାର ପ୍ରତିବାଦରେ ହ୍ୟାଣ୍ଡ୍ସ ଅଫ୍ ବିକ୍ଷୋଭ ଆୟୋଜିତ ହୋଇଛି। ରାଷ୍ଟ୍ରପତିଙ୍କ ଏକ୍ଜିକ୍ୟୁଟିଭ୍ ଅର୍ଡର ଯୋଗୁ ପ୍ରଭାବିତ ହୋଇଥିବା ଆମେରିକାର ସାମ୍ପ୍ରତିକ ବହିର୍ବ୍ୟାପାର ଏବଂ ଘରୋଇ ନୀତି ବିରୋଧରେ ଟ୍ରମ୍ପ୍ଙ୍କ ବିରୋଧୀମାନଙ୍କୁ ନିଜ ନିଜ ଅସନ୍ତୋଷ ବ୍ୟକ୍ତ କରିବାକୁ ଏହା ଏକ ସୁଯୋଗ ଦେଇଛି। ଏହା ଏକ ବିଶାଳ ବିକ୍ଷୋଭ, ଯାହାକି ମସ୍କ ଓ ଟ୍ରମ୍ପ୍ଙ୍କୁ ସେମାନଙ୍କ ନୀତିଗୁଡ଼ିକର ପୁନର୍ବିଚାର ପାଇଁ ବାଧ୍ୟ କରିବ ବୋଲି ମନେକରାଯାଉଛି।
ବିକ୍ଷୋଭ ଶୋଭାଯାତ୍ରା
ଓ୍ବାଶିଂଟନ୍ ଡିସି, ନ୍ୟୁୟର୍କ, ଲସ୍ଏଞ୍ଜେଲ୍ସ, ଆଟଲାଣ୍ଟା, ଶିକାଗୋ ସମେତ ମାସାଚ୍ୟୁସେଟ୍ସ, ଫ୍ଲୋରିଡା ଓ ଅନ୍ୟ ଇଷ୍ଟ୍ କୋଷ୍ଟ୍ ରାଜ୍ୟର ସହରଗୁଡ଼ିକରେ ସମନ୍ବିତ ବିକ୍ଷୋଭ ଶୋଭାଯାତ୍ରା ଆୟୋଜିତ ହୋଇଛି। ଲଣ୍ଡନ, ବର୍ଲିନ୍, ଟରଣ୍ଟୋ ଓ ମେକ୍ସିକୋ ସିଟିରେ ମଧ୍ୟ ଏହା ସମର୍ଥନରେ ଅନ୍ତର୍ଜାତୀୟ ସ୍ତରର ରାଲି କରାଯାଇଛି।
‘ହ୍ୟାଣ୍ଡ୍ସ ଅଫ୍’ ପଛରେ କିଏ
ଏହି ବିଶାଳ ବିକ୍ଷୋଭ ପଛରେ ପ୍ରଗତିଶୀଳ ଗୋଷ୍ଠୀଗୁଡ଼ିକର ଏକ ମେଣ୍ଟ ବଡ଼ ଭୂମିକା ନେଇଛି। ଏଥିରେ ପ୍ଲାନ୍ଡ ପ୍ୟାରେଣ୍ଟହୁଡ୍ ଆକ୍ସନ, ଦି ୫୦୫୦୧ ମୁଭ୍ମେଣ୍ଟ, ଓ୍ବିମେନ୍ସ ମାର୍ଚ୍ଚ ଭଳି ମହିଳା ସଙ୍ଗଠନ, ଜଳବାୟୁ କର୍ମୀ ଓ ପରିବେଶବିତ୍, ଏଲ୍ଜିବିଟିକ୍ୟୁ ଅଧିକାର ଗୋଷ୍ଠୀ, ପାଲେଷ୍ଟାଇନ୍ ସପକ୍ଷବାଦୀ ଆକ୍ଟିଭିଷ୍ଟ, ଲେବର ୟୁନିୟନ୍, ଗଣତନ୍ତ୍ର ସପକ୍ଷବାଦୀ ଓ ଏକଚ୍ଛତ୍ରବାଦୀ ବିରୋଧୀ ଗ୍ରୁପ୍ ରହିଛନ୍ତି। ଏହାକୁ ମ୍ୟୁଜିସିଆନ୍, ଅଭିନେତ୍ରୀ-ଅଭିନେତା, ବିଶିଷ୍ଟ ବ୍ୟକ୍ତିମାନଙ୍କ ସମର୍ଥନ ମିଳିଛି। ରାସ୍ତାକୁ ଓହ୍ଲାଇଥିବା ବିକ୍ଷୋଭକାରୀମାନେ ‘ହ୍ୟାଣ୍ଡ୍ସ ଅଫ୍ ଆଓ୍ବାର ଗଭର୍ନମେଣ୍ଟ, ହ୍ୟାଣ୍ଡ୍ସ ଅଫ୍ ଆଓ୍ବାର କନ୍ଷ୍ଟିଚ୍ୟୁଶନ୍’ ସ୍ଲୋଗାନ ଦେଇଛନ୍ତି। ଲୋକଙ୍କ ବ୍ୟକ୍ତିଗତ ତଥ୍ୟକୁ ନେଇ ପ୍ରସ୍ତୁତ ଡେଟାବେସ୍, ସାମାଜିକ ସୁରକ୍ଷା ଆଦିରେ ଏଲନ୍ ମସ୍କଙ୍କ ହସ୍ତକ୍ଷେପ ଅତ୍ୟନ୍ତ ଚିନ୍ତାଜନକ ବୋଲି ବିକ୍ଷୋଭର ଜଣେ ଆୟୋଜନକାରୀ କେଟ୍ ମେରିଟ୍ଟ-ଓ’ଟୁଲେ କହିଛନ୍ତି।
କାହିଁକି ମୁଣ୍ଡ ଟେକିଲା
ଟ୍ରମ୍ପ୍ ପ୍ରଶାସନର ଅନେକ ନିଷ୍ପତ୍ତିକୁ ନେଇ ଜନ ଅସନ୍ତୋଷ ତେଜିବାରେ ଲାଗିଛି। ଚଳିତ ବର୍ଷ ସ୍ବାକ୍ଷରିତ ଏକ ଜାତୀୟ ଗର୍ଭପାତ ନିରୋଧୀ ଆଇନ, ସଂଘୀୟ ସଂସ୍ଥାଗୁଡ଼ିକରେ କର୍ମଚାରୀ ଛଟେଇ ଓ ସଂସ୍କାର, ଉଚ୍ଚ ଟାରିଫ୍ ଯୋଗୁ ମୁଦ୍ରାସ୍ଫୀତି ବୃଦ୍ଧି ଏବଂ ଷ୍ଟକ୍ ମାର୍କେଟ କ୍ରାସ୍, ଗୁରୁତ୍ୱପୂର୍ଣ୍ଣ ସୁଇଙ୍ଗ୍ ଷ୍ଟେଟ୍ଗୁଡ଼ିକରେ ମତଦାତା ଦମନ ଅଭିଯୋଗ ଆଦିକୁ ନେଇ ଏହି ଆନ୍ଦୋଳନ ମୁଣ୍ଡ ଟେକିଛି।
