ଭଞ୍ଜନଗର,୧୬ା୧୨(ଡି.ଏନ୍.ଏ.): ଗଞ୍ଜାମ ଜିଲା ଭଞ୍ଜନଗର ଉତ୍ତର ଘୁମୁସର ବନଖଣ୍ଡ ତାରସିଂ ରେଞ୍ଜ ବାରଦଣ୍ଡାର ଜଣେ ଚାଷୀ ଗୁରୁବାର ରାତିରେ ହାତୀ ଘଉଡ଼ାଇବାକୁ ଯାଇ ଆହତ ହୋଇଛନ୍ତି। ସେ ହେଲେ ଉଦୟ ପ୍ରଧାନ (୬୪)। ତାଙ୍କୁ ଭଞ୍ଜନଗର ମେଡ଼ିକାଲରେ ଭର୍ତ୍ତି କରାଯାଇଛି । ଉଦୟ ଗୁରୁବାର ରାତିରେ ଧାନ ଫସଲ ଜଗିବାକୁ ଯାଇଥିଲେ। ଏହି ସମୟରେ ଏକ ଦନ୍ତାହାତୀ ଆସିବାରୁ ଘୁହାଇବାକୁ ଚେଷ୍ଟା କରିଥିଲେ। ହେଲେ ବିଫଳ ହେବାରୁ ଦୌଡ଼ି ପଳାଇ ଆସୁଥିବା ବେଳେ ତଳେ ପଡ଼ି ଆହତ ହୋଇଥିଲେ। ନିକଟସ୍ଥ ଗ୍ରାମବାସୀ ଉଦୟଙ୍କ ପାଟିଶୁଣି ତାଙ୍କୁ ଉଦ୍ଧାର କରି ମେଡ଼ିକାଲକୁ ଆଣିଥିଲେ। ତାରସିଂ ରେଞ୍ଜର ଜଣେ କର୍ମଚାରୀ କହିଛନ୍ତି, ଉଦୟ ହାତୀ ଘଉଡ଼ାଇବାକୁ ଯାଇଥିବା ବେଳେ ହାତୀ ତାଙ୍କୁ ଗୋଡ଼ାଇବାରୁ ସେ ତଳେ ପଡ଼ି ଆହତ ହୋଇଛନ୍ତି।
ଗତ କିଛିବର୍ଷ ହେବ ଘୁମୁସର ଉତ୍ତର ବନଖଣ୍ଡର ହାତୀ କରିଡ଼ରଗୁଡିକ ବିଭିନ୍ନ କାରଣ ଯୋଗୁ କ୍ଷତିଗ୍ରସ୍ତ ହୋଇପଡ଼ିଛି । ତେଣୁ ସନ୍ଧ୍ୟା ହେଲେ ହାତୀପଲ ଖାଦ୍ୟ ଅନ୍ବେଷଣରେ ଜଙ୍ଗଲ ନିକଟବର୍ତ୍ତୀ ଗାଁକୁ ଆସି ଫସଲ ନଷ୍ଟ କରୁଛନ୍ତି । ଏହି ସମୟରେ ମଣିଷ-ହାତୀ ମୁହଁାମୁହିଁ ହେଉଛନ୍ତି। ହାତୀ ଯୋଗୁ ଲୋକଙ୍କ ଚିନ୍ତା ବଢ଼ିବାରେ ଲାଗିଛି। ଶୁକ୍ରବାର ସନ୍ଧ୍ୟା ସୁଦ୍ଧା ଉତ୍ତର ଘୁମୁସର ବନଖଣ୍ଡ ଏବଂ ଦକ୍ଷିଣ ଘୁମୁସର ବନଖଣ୍ଡରେ ୫୦ରୁ ଉର୍ଦ୍ଧ୍ୱ ହାତୀ ଥିବା ଜଣାପଡ଼ିଛି । ଦୁଇ ବନଖଣ୍ଡର ଡିଏଫଓ ପ୍ରତ୍ୟେକ୍ଷ ଭାବେ ରାତିରେ ପାଟ୍ରୋଲିଂ କରିବା ସହ କର୍ମଚାରୀମାନଙ୍କୁ ବନ୍ୟପ୍ରାଣୀ ସୁରକ୍ଷା ଲାଗି ସତର୍କ କରାଉଛନ୍ତି ।
